Генадзь Бураўкін - Узмах крыла

Не ўразумець адразу
Яму законаў лес —
Службовы абавязак,
Дзяржаўны інтарэс.

А я ў замежжы дальнім
Вяртаю ўсё назад
I позірк развітальны,
I просьбу як загад.

Калі ж адчай прыдушыць,—
Маленькі мой мядзведзь,
Ты мне шапні на вушка
Здалёку:
«Дзед, прыедзь!..»

* * *

Можа, за дзесятым небасхілам
Край дзіцячай радасці і ўцех.
Я б туды,
Каб меў такія сілы,
Птушкай пералётнай паляцеў.

Крылы ж мне адлегласцю звязалі.
I сярод бязадрасных размоў
Я жыву, нібыта на вакзале,
I чакаю цягніка дамоў.

Хай то будзе учарашні жорсткі
Ці імклівы сённяшні экспрэс,
Толькі б ён спыніўся каля вёскі,
Дзе рачулка чыстая і лес,
Дзе над студняй —
Журавель пахілы,
Залатыя пчолы —
Ля вулля,
Дзе на ўзгорку —
Родныя магілы,
А навокал —
Родная зямля.

* * *

У смугу акіянскую
Неба
Апускае вячэрні кумач...
Гэтак многа сказаць хацеў бы,
А не пішацца,
Хоць ты плач.

Як самотнікі па пустыні,
Разбрыліся словы ў нудзе.
Адбалелае сэрца стыне.
Утрапенне ў радок не ідзе.

Іншаземныя яркія дзівы
Не ўзрушаюць зусім мяне...
Вершы пішуцца на Радзіме.
Сэрца цешыцца на Дзвіне.

* * *

Гартае восень жоўтыя лісты —
Старую кнігу вечных успамінаў
Пра беззваротны век свой залаты,
Дзе доўгі спіс сакрэтаў і правінаў.

Лагодна ціша селіцца ў душы,
Але, з былым сустрэўшыся, няйначай,
То светла заўсміхаецца ў цішы,
То ачышчальна ўпотайкі заплача.

Прылёг свавольны вецер 'на мяжы,
Дзе колецца іржэўнік цёплай шчэццю,
Дзе віснуць зоркі выспелых ажын
I павуцінне серабрыста тчэцца.

А цень лясоў ужо хавае стынь.
З лагчын плыве туман сівы і рэдкі.
Сціхае смех.
I ападаюць кветкі...

Гартае восень жоўтыя лісты...

* * *

Абыходжу родныя аселіцы,
Строгія агледзіны раблю.
Новыя суседзі дружна селяцца,
Абжываюць глёўкую зямлю.

Цёткі з цягавітасцю спрадвечнаю
У дварах вядуць сялянскі рэй,
А бабулі з шумнаю малечаю
Разганяюць качак і курэй.

Люстраю ці лямпай мадэрноваю
Зырка свеціць кожнае вакно...
Толькі вось парою вечароваю
Гаманы на прызбах не чутно.

У застоллях песні не спяваюцца,
Як было ў ранейшыя гады.
I пахмурна мужыкі співаюцца
Ад нядбальства, тлуму і нуды.

Замяло мае сады юначыя
Скразнякоў сцюдзёнае крыло...
Нешта горка, незваротна страчана.
Нешта непрыкметна аджыло.

Невядомасць віратлівай стромаю
Рушыць мой запас душэўных сіл.
I кажу суседу незнаёмаму:
— Мне не чарку —
Песню
Паднясі.

* * *

Удача —
Сяброўка такая,
Што лішне ў адданасць не вер.
То лашчыцца,
А то ўцякае,
Як позна прыручаны звер.
То весела скача,
То плача,
То славіць цябе,
То кляне.

Чужая каханка —
Удача
Аднойчы была і ў мяне.
Гуляла са мной
I спявала,
Збірала сяброў да стала
I ноччу з пустога вакзала
У сінім вагоне ўцякла.
Як здань, адплыла ў наваколле,
Растала ў сутонні бароў...
А мне засталося вуголле
Ад зыркіх бяседных кастроў...

* * *

Як вецер лісце шугане
Па скверу,
Ты засумуеш без мяне —
Я веру.

З-за хмар збяжыць змяркання міг
Па промню.
Як добра нам было ўдваіх,
Я помню.

Плыла ад поўні паласа
Скразная.
Ты страхам поўнілася ўся —
Я знаю.

На зоркі клаўся цень крыла
Ціхутка.
Ноч тая цёплая прайшла
Так хутка.

Ёй грэцца ў памяці маёй,
Як цуду.
Да скону дзён маліцца ёй
Я буду.

* * *

Не перанось спатканне на пасля.
Хто ведае, што заўтра нас чакае —
Ці то ад шчасця спыніцца зямля,
Ці напаткае нас бяда якая.

Сагрэй мне вусны сённяшнім агнём.
Абмый душу мне сённяшняю ўсмешкай.
Хай кажуць,
што жывём кароткім днём,
А не халоднай вечнасцю няспешнай.

Хвіліны нават не паўторыць час,
Хоць папракай яго ты, хоць упрошвай.
Што як сустрэча гэтая якраз
Для нас галоўнай стане і... апошняй?..

* * *

Непрыгожых жанчын не бывае.
Паглядзі —
Вунь насустрач ідзе
Асляпляльная,
Баявая,
Як маланка,
Як выклік нудзе.
Ці плячом павядзе,
Ці брывамі —
Абрываецца сэрца на міг.
Як світальнай расой аблівае,
Ад халоднай зямлі адрывае
I ўзнімае да зор агнявых.