Генрых Далідовіч - Пабуджаныя

Яны зноў змаўчалі, ішлі па вячэрнім, з нізкім сонцам, але вельмі светлым i цёплым горадзе, удыхалі гаючы ліповы пах.

— Керанскі — фразёр i балбатун! — сказаў Лашковіч i перакрывіў майскія прамовы Керанскага перад салдатамі на франтах: — «Нашим лозунгом должны быть не люди, а идеи!», «Очистим Родину и мир от насильников и захватчиков!», «Я знаю правду жизни России. Я знаю, что России нужно, и с сознанием своего права и власти я говорю правду».

— Я згодзен: Керанскі — дэмагог,— прамовіў Скураны.— Але ён цяпер дыктатар... А з дыктатарамі жарты малыя...

— Паглядзім...— буркнуў Лашковіч.

— Toe, што вы, э-э, адвярнуліся ад мяне i маіх сяброў, што пераўтварылі наш камітэт у Раду i палічылі яе «грамадскім i кіруючым органам усяго беларускага нацыянальнага руху», «дзяржаўна-палітычнай арганізацыяй» — не вялікая, э-э, перамога,— зноў напаў Скураны.— Як невядома, ці што дасць тое, што вы шукаеце саюзу з меншавікамі i эсэрамі...

Пасля ён таксама прайшоў крыху моўчкі, супакойваючыся.

— Хоць вы i няўдзячныя, э-э, свінчукі,— затым зноў загаварыў,— але душа мая не змянілася. Баліць за справу. Дык параю: шукайма саюзу з Доўбар-Мусніцкім. Яго корпус — усё ж не малая сіла. Па-другое, Іосіф Раманавіч спачувае нам. Па-трэцяе, сам шукае саюзнікаў. З ім мы можам таго-сяго дабіцца i для сябе.

Калі Скураны надаваў «мудрых парад», на якія сам дагэтуль не зважаў, i адышоўся (за ім услед шмыгнуў i Муха), Лашковіч ухмыльнуўся:

— Пакрыўдзіўся дзед на нас, няўдзячных...

— ...халопаў...—дадаў Васілевіч.

— Ну, а ты, зямляча, чаго ўсё маўчыш? — нечакана прытуліў Лашковіч да сябе Нямкевіча.— I не замінаеш, i не вытыркаешся. Усё маўчыш i маўчыш. Ці то плывеш па цячэнні, ці то расчараваўся ва ўсім, не супраць ужо адысці ад палітыкі, ажаніцца i працаваць у школе...

— Затое вы ўсе гаворыце, крычыце шмат...— усміхнуўся той.

— Што праўда, то праўда,— уздыхнуў Лашковіч.— Сапраўды, балбочам, як індыкі, дыскутуем з-за кожнай дробязі, а справы кот наплакаў... Ці гэта ўжо інтэлігенцкая планіда: ты вяшчай, а на цябе ніхто не зважае!..

— Каб жа толькі не слухалі! A i б'юць! Пад дых! — змрочна прамовіў Шуляк.— А той, хто кіруе, рабіў i робіць сваё...

— Няўжо ніколі тыя, хто цяпер глухі, не спахопяцца? — запытаў Васілевіч.

— Можа, i спахопяцца...— прамовіў Лашковіч,— Ды вельмі позна. Альбо не ў зусім спрыяльны час...

«Сапраўды,— падумаў Алесь Нямкевіч,— мы процьму трацім моўнай энергіі, угаворваем сябе i іншых рабіць тое i тое, спрачаемся паміж сабой i з тымі, хто нас не прымае, a нічога не мяняецца. Здаецца, Часовы ўрад, які цяпер умацаваўся, не развівае рэвалюцыю, а глушыць яе».

— Ну, пра што думаеш? — страсянуў яго Лашковіч.

— Пра рэакцыю...

— Маеш рацыю, Дзед,— згадзіўся Лашковіч.—

Чуецца яе пагрозны подых... А мы... Нічога не можам ёй супрацьпаставіць...

— А жыццё да нас неміласэрнае...— уздыхнуў Васілевіч.—Хіба для нас не знішчальны яго ўдар, што вырвала з нашых шэрагаў Максіма Багдановіча.

Пра смерць паэта яны даведаліся нядаўна i былі азмрочаныя да глыбіні душы.

— Нейкі, хлопцы, жудасны трагізм паўзе за намі...— уздыхнуў Лашковіч.— Светлыя нашы галовы, таленты гінуць, паміраюць зусім маладыя, у самым росквіце...

3.

Мяснікоў праводзіў Фрунзе i Соню на вакзал.

Фрунзе, гарэзуючы i жартуючы, развітаўся ў Савеце, у міліцыі, з даўнімі сябрамі i новымі знаёмымі, але цяпер крочыў з чамаданам па Петраградскай вуліцы задуменны. Па-першае, сумнавата было развітвацца з Мінскам, а па-другое, не было радасці ад цяперашніх петраградскіх падзей.

Рэвалюцыя там не толькі не доўжыцца, але марнее, чэзне — на змену старой тыраніі ідзе новая. Яны, бальшавікі, зноў мусяць пайсці ў падполле, а меншавіцкія i эсэраўскія лідэры сталі на калені перад дужымі свету гэтага. Гэта ж жах, што 14 ліпеня пад звонавы покліч хавалі не ахвяр мірнага шэсця супраць Часовага ўрада, а — казакоў, што злажылі галовы, разганяючы люд, жах, калі побач з крывавым атаманам Дутавым ішоў з апушчанаю галавою «сацыяліст» Цэрэтэлі. А тое, што Часовы ўрад зноў увёў на фронце смяротную кару, што назначыў Вярхоўным галоўнакамандуючым жорсткага Карнілава, што забараніў сходы i з'езды, што зноў прыхіліў да сябе кадэтаў — усё гэта мала сказаць трывожыць...

Не хацелася пакідаць Мінск яшчэ i таму, што тут яны, бальшавікі, нямала чаго дабіліся i цяпер, пры адзінаўладдзі, могуць працаваць легальна. Да слова, вось ваўсю нараўне з іншымі партыямі вядуць перадвыбарчую кампанію ў гарадскую думу. Ва ўсіх гэтых удачах, канечне, ёсць i яго доля турбот.