Генрых Далідовіч - Пабуджаныя

— Значыць, агаляем бальшавіцкія лозунгі, праграму?

— Адкараскваемся ад уяўных саюзнікаў.

— Слухай,— пацішыў голас госць,— а мы не настроім супраць сябе ўсе іншыя сацыялістычныя i несацыялістычныя партыі, люд? Зразумеюць нас ці не зразумеюць?

— Трэба, каб зразумелі. Трэба ісці толькі з Леніным. Троцкі, якому ты калі не сімпатызуеш, то адносішся да яго з увагай, завядзе ў тупік. Цяпер, насуперак яго тэорыі, можна дабіцца сацыялістычнай рэвалюцыі i ў адной краіне. Адпаведна, цяпер трэба націскаць на класавую барацьбу, на саюз пралетарыяту i сялянства, быць болей уважлівымі да нацыянальнага пытання.

— Я згодзен.

— Дык i выдатна! — прыгарнуў яго Фрунзе.— Пераязджай, будзем працаваць разам. I гораду, i фронту, i, думаю, сталіцы спатрэбяцца твой інтэлект, твая страсць i непрымірымасць да тых, хто супраць нас...

— Дзякую, Міша,— прамовіў той.— Скажу шчыра: я часамі падумліваў, што ты адносішся да мяне ці то скептычна, ці то з недаверам. Можа, як ты i кажаш, з-за маёй страснасці, з-за майго характару. А можа, i не толькі з-за гэтага...

— Ну й добра, што паразумеліся,— усміхнуўся Фрунзе.— Надалей нам спатрэбіцца яшчэ большы давер, яшчэ большае адзінства!

Калі выйшлі з будынка, Лашковіч маўчаў. Васілевіч жа, Шуляк, якія дагэтуль маўчалі, цяпер ажывіліся.

— Віншую! — усклікнуў Васілевіч.— Хораша адчысціў!

— Малайчына! — быў уражаны i Шуляк.— Зубасты!

Лашковіч шпарка ішоў, тыя ледзь паспявалі за ім.

— Маленькая парада, мальцы, бывалага чалавека,—-прамовіў урэшце.— Не ўпівайцеся маленькімі поспехамі, не засмучайцеся, не падайце духам ад краху. Найперш вучыцеся. Публікацыяй у «Минском голосе», а вось цяпер у палеміцы Міхайлаў даў нам добры ўрок.

— Патлумач, Максім,— папрасіў Васілевіч.

— Дарэмна, вельмі дарэмна мы пайшлі за ўмеранымі элементамі ды за нашым Мухам, неабачліва паставілі на чале нашага руху Скуранога,— сказаў Лашковіч, шпарка крочачы i трымаючы рукі ў кішэнях паліто.— Бачыце, як нам поркаюць за гэта ў вочы? Калі такое будзе i далей, то на новым з'ездзе трэба будзе выбраць новага старшыню... Не з паноў ды з багатай інтэлігенцыі, а з нас каго...

— Але ж тады адбудзецца раскол, Максім! — напужаўся Шуляк.— А па-другое, можам апынуцца i без моцнай тутэйшай падтрымкі i падтрымкі Часовага ўрада.

— Лепш раскол, лепш меншая падтрымка паноў i буржуа — больш трэба дбаць пра сваё аблічча ды пра сімпатыю нашага люду... Іначай ён зусім адхіснецца ад нас... I яшчэ. Трэба i руплівей утвараць нашы рады, управы, i хутчэй згуртаваць сваю вайсковую арганізацыю. Дзейсную, баявую. Каб стала добраю падмогаю.

Падышлі да невялікага прывакзальнага скверыка. Па ім туды-сюды шнураваў люд, каля адной з лавак сіратліва стаяла маленькая Лашковічава маці, з нейкаю адрачонасцю пазіраючы на чужы ей горад.

— Выбачай, мама, затрымаліся троху,— усміхнуўся Лашковіч, узяў з лаўкі яе хатулёк,—Хадзем. Вунь якраз падыходзіць вагон. Паехалі, мальцы, разам. Гарбаты з малінаю пап'ём, пагутарым...

— Проша, дзеткі,— запрасіла i маці, адчуваючы ўжо душою, што гэта не панічы, а шчырыя сынавы сябры.

Неўзабаве яны ўжо стаялі на пляцоўцы вагона, які цягнула тройка рыжых коней. У салон не пайшлі: там скупіліся афіцэры, багата апранутыя цывільныя мужчыны i кабеты, i тыя маглі збянтэжыць сарамлівую Лашкевічаву маці.

4.

Да Алеся Нямкевіча — а ён разам з Лашковічам уладкаваўся ў губеранскую земскую ўправу — зайшла зямляцкая дэлегацыя.

— Вось дзе яны цяпер, галубкі! — першы ўвайшоў, расставіў рукі i закрочыў да ix былы сябра па семінарыі, налібацкі настаўнік, а цяпер прапаршчык рускай арміі Лямбовіч. Быў перад вайною гладкі таўстун, з «марцаўскімі» вачыма, такім i застаўся.

Услед за ім нясмела ступіў яшчэ адзін некалішні семінарыст, былы прудскі настаўнік, а цяпер таксама прапаршчык Кірыковіч. Ён, ступіўшы ў пакой, толькі буркнуў «добры дзень», асцярожна запыніўся каля вушака i не падымаў вачэй — можа, саромеўся, што некалі, перад судом i на судзе, не толькі бэсціў сваё «местничество», але i нагаворваў на Алеся, стараючыся выбавіцца ад турэмнага зняволення.

Апошнія зайшлі Алесевы аднавяскоўцы, лічы, яго непрыяцелі: былы іхні пісар Дзяжко, паштавік Гарбуковіч i старастаў сын Уладак Дземідовіч. Цяпер Дзяжко, таўсматы, адкормлены, з лянотна-хітрым позіркам, быў у наглянцаваных ботах, у дыхтоўным галіфэ i гімнасцёрцы з кішэнькамі, падперазаны папругаю з арлом на спражцы, з дзвюма лычкамі на пагонах. Гарбуковіч, па-ранейшаму тонкi, худы, як вялены высахлы лешч, ад таго, здаецца, яшчэ болей зрыжэлы, панурысты, быў у простай гімнасцёрцы, падперазаны папругай без спражкі i арла — на рэмені быў звычайны жалезны чатырохкутнік з язычком пасярэдзіне, а на пагонах святлелася па адной лычцы. Высокі, узмужалы, толькі з яшчэ болей выпхнутымі пярэднімі зубамі, Уладак Дземідовіч меў званне фельдфебеля, крыж на грудзіне.