Генрых Далідовіч - Свой дом

Толькі ён хацеў не тое што сказаць, а падумаць з палёгкаю: «Усё, паехалі нарэшце!», як цягнік нечакана не то рэзка затармазіў, не то гвалтоўна таргануўся, тут жа гучна i адчайна засвістаў паравоз, пачуўся лязгат-трэск, i гэты вагон быццам хіснуўся, быццам нават прыпадняўся — i Ландара, i Калмановіча ды Вайсдорфа аж адкінула ад акна да сцяны купэ.

Цягнік спыніўся.

— Што такое, ёлкі-палкі? — абуральна вырвалася ў Вайсдорфа. Тут жа, займеўшы раўнавагу i абапіраючыся абедзвюма рукамі аб сцены, падаўся на выхад. Ландар — за ім. Калмановіч — услед.

Сышоўшы на расчышчаны ад снегу насып i зноў удыхаючы марознае паветра, Ландар убачыў: іхні вагон мала сказаць закалыхаўся, ён увогуле сышоў з рэек i небяспечна стаў на краі ўзбочыны. Наступны вагон пагрозліва нахіліўся, а вагон з кулямётчыкамі зусім поракуліўся.

— Падстроілі ўсё ж, гады, крушэнне...— вылаяўся Вайсдорф, прысеў, абгледзеў усё, а пасля падняўся i патлумачыў: — Падымаць вагоны, манеўраваць некалі, таварыш Калмановіч. З хвіліны на хвіліну можа быць i горшае... Раю: людзям з хваста цягніка выйсці, хутка перанесці ў ацалелыя вагоны кулямёты, тое-сёе з харчу i — гайда далей...

— Давайце,— суха адказаў старшыня Саўнаркома.

Вайсдорф падаў каманду — чырвонаармейцы высыпалі з вагонаў i пачалі хуценька пераносіць зброю i скрынкі з харчам, пасля перакулілі нахіленыя вагоны i прычапілі хваставыя. Ландар з Калмановічам тупалі па ўзбочыне, мусіць, абодва аднолькава люта палымнеючы злосцю на станцыйных чыгуначнікаў i на верхаводаў з Народнага сакратарыята — канечне ж, якраз тыя падбухторылі ўчыніць гэтую аварыю.

Падышоў Мяснікоў.

— Можа, смалянём па станцыі на развітанне? — запытаў.— Падзякуем як след за такія праводзіны?

— Не,— кортка кінуў Калмановіч.— Будем вышэй злачынства i асабістай крыўды...

Праз паўгадзіны, калі пачало ўжо світаць, яснецца паваколле, цягнік зноў крануўся, пакінуў Мінск i хутка паімчаў на Смаленск.

3.

Лашковіч сустрэў паасобку дзесяткі тры цывільнага люду, пяць баявых дружын i паслаў усіх на Саборную плошчу. Пазней, калі ўвабралася ў сілу ноч, ніхто больш не прыходзіў.

Ён, напісаўшы тое, што яму даручалі, паляжаў крыху нераспрануты на канапе, спрабаваў заснуць, але не змог — мусіць, ад вялікага ўзбуджэння. Паварочаўся крыху i не вытрымаў самоты, падаўся да сваіх.

Каля прыцемненага ўвахода ў штаб Народнага сакратарыята яго затрымалі вартавыя. Спачатку запыталі пароль, а пасля загадалі запыніцца — адзін з узброеных ахоўнікаў ггадаўся ў дом i пеўзабаве прывёў адтуль старшага. Той, асвяціўшы яго ліхтаром, пазнаў у твар, дазволіў зайсці, сказаў, што сёння іхні пароль у горадзе «Над Бацькаўшчынай чыстае неба».

У былым губернатарскім кабінеце, цяпер скупа асвечаным адною лямпай, закіданым папераю, сядзелі абапал пастаўленых літараю «Т» амаль усе «міністры», сярод ix i тыя, хто далучыўся да беларускага руху зусім нядаўна: эсэры Макрэеў, Бялевіч, Рэдзька, Белкінд, Злобін, паалейцыяніст Гутман. Заадно, нібы мухі на агонь, самі прыбіліся сюды i былы галава Гарадской думы член ЦК Бунда Ванштэйн, меншавік Пайкес, эсэр Шумскі, той-сёй з кадэтаў i іншых усерасійскіх партый, хто не меў i не будзе мець душы да беларускай справы, але хто вымушапы прыстаць да іхняга берага па волі лёсу.

Лашковіч запыніўся, прыпёрся каля вушака i запыніў пільны позірк на гэтым розным людзе ў дыхтоўным паліто i футрах, у вайсковых шынялях, сялянскіх кажушках альбо ватоўках.

«Мусіць,— падумаў,— меў рацыю Чэхаў, калі гаварыў: часам не так звязвае любоў, сяброўства, павага, як агульная нянавісць да чаго-небудзь».

Пасярод стала важна сядзеў адзін з новых іхніх лідэраў Янка Аўторак — у зашпіленым шынялі i вайсковай фуражцы. Ён то падымаў тэлефоннуто трубку i слухаў, штосьці раіў, то званіў сам кудысьці, ушчуваў, заклікаў да большай смеласці i напорыстасці.

Большая палова душою, сэрцам адчула яго ўчэпісты назірк — павярнулі сюды галовы адразу некалькі чалавек.

— Максім, чаго ты як сірата? — махнуў яму рукою Баравік,— Хадзі сюды, будзем мазгаваць разам!

Ён падышоў, сеў на вольным крэсле напрыканцы стала, моўчкі дастаў з нагруднай кішэні згорнуты ў трубку лісток i падкінуў Баравіку.

Той узяў, разгарнуў і, прабегшы вачыма па напісаным, ажывіўся:

— Вось, спадары, накід Устаўной Граматы да народаў Беларусі. Паслухайма.

I пакуль Аўторак, крыху адвярнуўшыся, зноў гаварыў з кімсьці па тэлефоне, Баравік пачаў чытаць, а пасля першы пахваліў: