Günter Eder - Kindheit und Jugend ohne Computer und Handy

Z`Bassa da kemand af oamoe glei drei Flüsse zamm. Da greßa Fluß bei uns z`Bayan des is d`Donau, vo unsana Seidn aus da kimmd da Inn dazua und von boareschn Woed hea, da kimd d`Eyz außa. Da ka ma se scha vieaschdeyn woß`s da drundn fia ra sauwas Houwossa gem kah. Iadz hama grad von Dadum hea Midde June Zwoadausnd und dreizeah. E de ledzdn boa Wohan, da is a grad wieda a rießn Houwossa z`Bassa drund gwen, ned nua da drund, sondan a iwaroe z`Deidschland und a z`Esdreich und z`Ungan. D`Zeidung had gschriem, das des Houwossa soga na greßa wa is oes olle andan e da Zeid davoa.

Des Houwossa neizehahundadvierafuchzge had`s wahscheinle gem wei s en Winda davoa an ganzn Haufa Schnee ghad had. Da had s bei uns da a an sehan Haufa Schnee hea ghaud, das oes zua gwahed wah, wos a bißl dieafa gleng is. De Schdraß de wo vo da Bruggmeyh uma bei uns vobei zon Brebeg ume und dann af Deindoaf und af Seiwaschdoaf ei gehd, de is herowahoen Meyhmeisl dodal zuagwahed gwen. Dazwischn da hand a na de Bahngleisa via n Zug, dea wo vo Minga awa af Bassa ae ganga is, da is a oes dodal zua gwahed gwen.

Mehra Mana hamd damoes a boa Dag lang herendahoe und drendahoe de Bahngleisa, den ganzn Schnee wegad gschaufed. Wenn`s de Schneegwana ned weggschaufed heddnd, dann hed koana meha zon Brebegg ume geh kina. Fia uns Buam is des oes a Schbaß gwen. Voa unsan Haus is a a Schneegwan gwen, de is von Beag hiedan bis fasd zon Haus zuara ganga. E de Schneegwan, da hama uns mia Buam Leha eigmochd wo ma eingrabben hamd kina. D`Mudde had gschimpfd, wie s Angsd ghad had das da Schnee awa kimd und daß`s uns voschidd und dabadzd. Heid woaß e nadieale daß`s rechd khad had, awa damoes da ha e des iwahaubd ned glaum kina. So vey Schnee wiea damoes had`s schbeda a kam na amoe gem glauwe.

Das ma mia bei uns dahoam na koa elegdresch Liachd und a koan Radeo na ned ghad hamd, des had mia iwahaubd nia nix ausgmochd, a wenn es bei andane Leid efda gseng ha, i ha s a ned andas kennd. D`Mudde de hed awa scha oewei gean des elegdresche Liachd meng. Schbeda amoe, da had sa se dann von Gusdaf Schiggedanz an Simonetta Koffaradeo schigga lossn. En Schiggedanz den gibd s scha lang nimma, schbeda had a Quelle ghoaßn, de gibd s awa iadz a scha lenga nimma. E den Radeo had ma blos a boa Baddarieen ei doa miaßn dann had a a scha gschbeyd, da dazua had ma a ga koan elegdreschn Schdrom ned brauchd. Dea Koffaradeo den wo se d`Mudde da kaufd ghad had, dea had en Ongl scha oewei rechd guad gfoen, da had a dann a meisdns ganz genau zuaghead wenn s d`Nachrichdn brachd hamd und a wenn dann en Midicha oewei s`Wunschkonzead af n Mingara Senda kema is.

Obwoe damoes e deara Zeid iwahaubd a na ned vey Auddo gfahn hand, had s e da Meyhmeislkuavan drend oewei wieda ganz schee schware Umfälle gem. Zwischn an Brebeg und an Hofbaua, da had amoe a Lasdwong dea wo voe Oedeisn glond gwen is umgschmißn und is iwan Bugl aegfoen. A Beasonen Audo des wo eham grad zgeng kema is des had a mid ae grißn und is a na drauf gfoen. Da had ma nimma seng kina wos des fia ra Audo gwen is, en Fahra den had s dodal dabatzd khad. E da andan Kuavn bein Lindna voan da hand s a oewei wieda vo da Kuavn auße gflong und hand en Lindna sein Gmieasgoadn ei grennd. Oamoe da is sogoa a hibsch a groußa Lasdwong e ehran Goadn ae gflong. A bissl komesch iß`s awa scha gwen das de meisdn Audo, de wo da e da Meyhmaislkuavn drend vaunglickt hand vo Minga drom gwen hand.

D`Meyhmeisla hamd gsagd das de Mingara Audofahra oewei a so renand. Ih glaub das des mid den zammghengd is wei s z`Minga drom mehra Audo gem had wiea bei uns hearund. Desweng hand d`Mingara des schney Fahn a ned a so gwähd gwen oes wiea de Leid vo uns z`Niedabayan herundn. E da Meyhmaislkuavn drend da is d`Schdraß a na pflosdad gwen und wenn s naß wa, da wa s na a bissl gfealega oes wiea sunsd oesa druggane.

Voa ra na lengan Zeid scha, da hamd s da drund a ganz a neie Schdraß fasd wiea a Audobahn baud da gehd s nua na gradaus. Af deara Schdraß kimmd ma a nimma d`Schdammham vobei wema vo Minga af Simbach ae fahn muaß.

E de easchdn zwoa Schuejoah da bieh e fast oewei mid de Diagna Buam, mid n Maxe und mid n Franze hoam ganga. Dea anda Weg af den wo da Robead und da Kare geh hamd miaßn, dea had ma ned a so gfoen. Da wa bloß da Diagnbach iwa den wo ma driwa miaßn had, sunsd wa da drent iwahaubd nix Indressands lous. Oa Sach af da Digna Schdregg drend had s scha gem de had ma ganed gfoen, des hand de Imbmheisl bein Kobla drom gwen. De Imbmheisl hand rechds und lings newa da Schdraß gschdandn und agrad da ha e duahe geh miaßn. Wenn e vo da Schue hoam bih hamd me de Mistviecha efda amoe iwafoen und hamd me iwaroe gschdoha wo s grad ganga is. E da Fria da is ma des nia bassiad blos oewei middag wenn e vo da Schue hoam bih. Ih woas na ganz guad das e damoes ofd a greas Hiadl, da wo a Gamsbard drah gwen is aufghad ha. Da hand ma de Misdviecha a na eine grabbed und hamd me en Kobf gschdoha.

D`Oma vo Hoslbach, de had se ofd es Imbmheisl eigsitzd und had d`Imbm geagad und had drauf gwoad daß se s schdehand. D`Oma had gsagd das des geng s Reimaddesch guad is. Friera is ma a ned a jedsmoe wenn a bissl ebs gwen is glei owei zon Dogda hie grennd. Wenn`s iagndwiea ganga is hamd se d`Leid meisdns seywa ghoefa. Ih ka me na guad drah erinnan wiea da Ongl amoe a Zeidl umanand grennd is und gjammad had das eham a Zahn weh duad. D`Mudde had zo eham gsagd ea soed zon Zahnazd af Simbach ae fahn, awa da Ongl dea had niea zon Dogda oda zon Zahnazd geh meng. D`Mudde had zon Ongl gsagd ea soed a bißl an Glousdafrau Melißngeisd nehma, des had da Ongl dann a dah. Nach an Zeidl da is a dann wieda dahea kema und had glochd und had gsagd daß`s eahm iadz bessa gehd. Af oamoe had d`Mudde gsagd, du bisd a bsuffa, hasd leichd de ganz Flaschn ausdrunga? Da had da Ongl glochd und had ja gsagd, a bißl schbeda da had a awa doh wieda Zahnweh ghad.

En nexdn Dag ganz boed e da Fria, da had af amoe d`Hausdiea ganz laud gschewad und da Ongl had au gschriean. Schbeda dann, wiea ma aufgschdandn hand, da is af n Disch a Schnial mid an groußn Zahn wo s Zahnfleisch na drah gwen is dodn gleng. Iatz hama gwißd warum de Hausdia a so zuagschlong is. Da Ongl dea is en Hof drauß auf und a glaufa und had se s`Gsichd ghoedn und had oewei ach ach gjammad. En nexdn Dag da had man awa nimma jamman ghead, wahscheinle had eham des Zahnreißn midn Schnial doh ghoefa.

Damoes da hamd na olle Kinda de wo e de eschde und e de zwoade Glass ganga hand, a Schueschbeisung griagd. Da had a jeda an Leffe und a Hafal dabei ham miaßn, da wos uns dann z`Middag s`Essn eidoa hamd kina. Da hads an jedn Dag ebs andas gem, hie und da wa a a bissl ebs Siaß dabei, awa des is seydna gwen. Des had oewei rechd lusde ausgschaud, wenn a Schuediandl oda a Schuebua dahea kema is, wei a jeda a Hafal oda a Bixn en Schueranzn drah ghengd ghad had. De meisdn hamd a agschnine Konseavndosn mid an Drahdhengl drah heagnuma, des wa am bragdeschan wei ebs andas, bsondas bei de Buam wenn s graufd hamd, e kabud ganga wah. Af da oana Seidn von Schueranzn is meisdns e an Schnial a Schwamm zon Dofe ausleschn außaghengd, af da andan Seidn da is de Bixn fia d`Schueschbeisung drah ghengd.

Damoes da hamd d`Kinda e da easchdn und e da zwoadn Glaß nua mid n Griffe af d`Dofe schreim deafa. Easch vo da driddn Glaß weg, ha ma mid da Dindn und mid n Fedahoeda e a Hefd ei schreim deafa. Des mid n Schreim af d`Dofe is zwa rechd bragdesch gwen, awa wenn d`Buam afn Schueweg efda amoe a bißl graufd hamd, da is a ganz ofd Dofe broha. Da had ma dann dahoam wieda gschimpfd griagd wei d`Eydan wieda a neie Dofe kaufa hamd miaßn. Mia is bein raufa af n Hoamweg amoe Dofe, Zählmaschin und da Setzkasdn kabudd ganga. Wiea e dann hoam kema bih, ha e vo da Mudde ganz schee gschimpfd grieagd, wei ma nix meha richdn had kina und weis ma oese nei kaufa had miaßn.