Günter Eder - Kindheit und Jugend ohne Computer und Handy

A jedsmoe hama a ned de ganze Schdregg aglaufa, Des wah fia unsane kuazn Haxal scha a bißl zweid gwen. Af de anda Seidn von Diagnbach hama eigandle fasd iwahaubd nia ume ganga. Ih ka a ned so genau sang warum, veleichd a wei da drendn blos rechd vey Wiesn gwen hand und sunsd iwahaubd nix andas. Glei drendahoe da Eisnbahnbrugg, da is a gloana Bunga en Beag drin gwen. Da Ongl had gsagd daß s en Bunga baud hamd wei s en Grieag d`Eisnbahnbrugg schbrenga heddn meng, das de rußeschn und de amerekaneschn Soedadn mid n Zug ned iwan Diagnbach uma fahn heddn kina.

Da drundn, da is da Diagnbach de Grenz zwischn Owabayan und Niedabayan, damoes da had me des awa iwahaubd na ned indressiead. Heid da iß s a bisl andas oes wiea s damoes gwen is, heid vaschdeh e des ganze ja a a bißal beßa.

Da Lohbach der kimmd vo Daumbach eina und is bis af a boa Dimpfe meißdns drugga gwen. Bloß wenn s vey grengd had, dann is a a hie und da amoe ganz schee grouß woan. Da hand efda a Bam dahea gschwumma und hamd d`Brugg undahoe unsan Haus voschdopfd. Des is meisdns ganz schee gfeahle gwen wei da s`Wossa efda bis zon Haus aufa ganga is. Ofd hama goaned gwissd ob s veleicht es Haus eina kimmd oda ned. D`Lohbachbrugg de had zwoa Beng ghad, oa Bong is heyzan gwen und oana wa bedanniead. Des wa hibsch gfeale fia de groußn Lasdauddo und fian Weiß und fian Ewen seine Langhoezfuhaweaha. Wenn de da driwa gfahn hand hed dea heyza Bong leichd amoe zammbreha kina.

Schbeda hamds dann d`Hoezbrugg weg grißn und hamd den zwoadn Bruggbong a beddaniead. Unda de Bruggbeng da had da Ongl oewei seine Kutschn und en Heiwong undagschdeyd. Des wa a nia koa Broblem ned, wei s unda da Brugg e oewei drugga gwen is. Bloß wenn s a moe grengd had, dann had ma aufbaßn miaßn das ma de Wang fria gnua außa da had, sunsd heds veleichd da Lohbach davah grißn.

Da Ongl der had oewei mindasdns oa Roß ghad, efda hand s sogoa a zwoa gwen. Da wand a na de Hena und hie und da, da hama a na a Kuah oda a Goas ghad, da had se oewei wos griad bei uns dahoam. D`Mille de wo ma brauchd hamd, de hama wenn ma grad koa Kuah ned ghad hamd bein Dreia ghoed wei ih koa Goasmille ned meng ha. De Mille von Dreia, de ha e a rechd gean ghoed, wei e dann oewei bis d`Mille fide gwen is mid`n Resal na a bisl schbeyn ha kina.

Hie und da wenn e af d`Nachd amoe zon Mille hoen zon Dreia ume ganga bih, da had s a scha amoe a bißl lenga dauad, da is ma a efda scha d`Mudde z`geng kema und had gschimpfd wei e so lang braucht ha. Z`Meyhmaisl da iß`s ma eigndle ga nia langweile gwen, da hads fia mih oewei ebs neis oda ebs andas indressands zon doa gem.

Oamoe ha a ma bein Pfeifal schniazln e d`Hend an Schiefan eizong, des had ganz schee weh da und e da Hend hae dann an ganz an dign Bingl griagd, eigndle iß`s a Blodan gwen de wo schbeda dann ganz blau und grea woan is. De Blodan is oewei digga woan und had a oewei mehra weh da. Da Ongl und d`Mudde hamd gsagd das des ganz beschdimmd a Bluadvagifdung sei muaß. Das e a Bludvagifdung ghad ha, des had ma gseng, wei vo meina Hend a bis iwan Eybong hindare und fasd bis zo da Oxl aufe a rouda Stroaf kema is. Af d`Nachd da had se dann d`Mudde unda da Bedroleumlambm oes genau agschaud und had s a en Ongl zoagd. Wiea dea des gseng had had a gsagd, des muasd aufmoha sunsd schdiabd a da. D`Mudde had dann a Nodl koed und had en Bingl ei gschdoha. Aus n Bingl is dann a so a ganz a geywe Bria außa gruna. Wia e des gseng ha, da is ma schlechd woan und ih bih umgfoen. Danach wia e wieda wach gwen bih had ma gseng das da roude Stroaf oewei weida zrugg ganga is. En nexdn Dag da is des ganze dann a scha wieda ganz guad gwen.

Heid dad ma mid ebs sehan zon Dogda geh, awa damoes wa des ned ganz so eimfach, da hed ma zeaschd s`Ros eischbanna miaßn und dann hed ma a na zon Dogda af Dann auße fahn miassn. Audo hads damoes a naned so vey gem, da oanzege dea wo a Audo ghad had, des wah da Weiß e da Bruggmeyh. Damoes hamd se d`Leid mehra seywa ghoefa wenn eha ebs basiad is. En Dogda aruafa had ma a ned so eimfach kina wei kam oana e da Nah gwen is dea wo an Telefon khad had.

Z`Hoslbach da is ma a amoe so ebs bled`s bassiad, da bih e vo da Odldruga awa gfoen. Des is bein Wofal drom gwen, da had da Wofal Bebal mid de Roß en Odl afs Feyd auße gfoahn ih ha bein Bebal ganz hou drom af n Odlwong sitzn deafa wiea da Bebal zo de Roß viare gschrian had „wiah“ da hamd d`Roß glei richde azong. Wei i ned aufbassd ha bih e vo da Odldruga awa gfoen. Ih woas na das e drund grad na schney meine Fiaß af d`Zeidn drahd ha, sunsd heds me dabresld. Wia e herund gleng bih, da bih e zeaschd amoe a bisl debbad gwen. Heid da dad ma wascheinle zo ebs sehan sang, dea is bewusdlos gwen. Wia de Leid de wo dabei gwen hand gseng hamd wos baßiead is, da hand s olle schney zo mia hea grend und hamd gschaud ob ma ebs feid. Ih bih awa aufgschdandn wei ma nix gfeid had. D`Frau Ellenga had me dann af d`Oam gnumma und had me zon Oba und zo da Oma ae drang. D`Oma de had ma dann glei en Kobf gwoschn, da had s easchd gmeagd das e en Kobf drom a ganz a scheens Loch ghad ha.

Wia me d`Oma fidae gwoschn ghad had, had`s ma an Aneka auf n Kobf aufe da und a Bindn uma bundn. Z`Hoslbach drin iß s a na ned fey andas gwen wia z`Meyhmeisl herend, da hads a na fasd koa Audo ned gem und a nua ganz seydn an Telefon. Da glauwe, das da Hanasnbaua da oanzege gwen is, dea wo a Audo und a an Telefon ghad had. Zon Dogda da, hed ma bis af Grafenau eine fahn miassn, des glauwe des hand a a soa nei Kilomedda gwen, awa i bih a a so wieda ganz schney gsund woan.

Damoes da hamd vey Leid af n Land draußdn a na koa elegdresch Liachd ned ghad, drum hamd s a kam an Telefon und a koan Radeo na ned ghad. Z`Hoslbach, des woas e na guad, da hads bein Wiad drund an Telefon gem da hamd olle telefoniean defa wenn s es brauchd had. We ma aruafa had miaßn, da had ma dera Frau de wo dot goawad had zeasch amoe d`Telefon Nummara sang miaßn. De Frau de had dann a boa Kawe e a so a Kasdl eigschdegd, dann had`s a boa moe e a na Kuawe, de wo e den Telefonkasdl dra gwen is umdraht. Da had se dann e den Telefon af da andan Seidn eba gmeyd, den had de Frau de Nummara gsagd und dann had ma telefonian kina. Da hamd d`Leid dazua gsagd, se loßn se iadz vobindn.

Wia da Max vo da Gfangaschafd hoam kema is, da hamd se boed drauf da Oba und d`Oma a s`elegdresche Liachd eirichdn loßn. Des wa ganz brima, wie s dann a an Radeo griagd hamd. Der Radeo had ma rechd guad gfoen, da is voan dra a so a greas Augn gwen des wo oewei a so gleichd had. E den Augn da had ma seng kina wia guad das dea Senda herganga is den wo ma grad eigschdeyd ghad had, des had ma da Max gsagd. Wenn da Empfang ned so guad gwen is had ma an an Ral drah miassn dann iß`s bessa woan.

Z`Hoslbach da iß`s vo deara Zeid a, wia da Max wieda vo da Gfangaschafd dahoam gwen is oewei rechd indressand gwen. Da Max dea had oewei wieda ebs neis gfundn des wo ma doa had kina. Oamoe da had d`Oma gsagd da Max soed a Hehn aschlachdn weiß`s heid a Hehnasubbm moha mehad. Da Max had dann mih gfragd owe mid eham en Henaschdoe hindare geh mehad zon Hena fanga. Da Max dea had oa Hehn gfangd, de hama dann hindan Schupfa hidare drang da had s da Max dann af n Haggschdog hieglegd und had iah mid an Hagge en Kopf aghaud. Wia ra deara Hehn en Kobf a khaud khad had, had as ausloßn. De Hehn, de is ohne Kobf na a ganz a scheens Schdiggl grennd, dann iß`s umgfoen und is doud gwen, dann had da Max d`Hehn zo da Oma e d`Schdum eidrang. D`Oma had s dann e a Schaffe eiglegd da wo a hoaß Wossa drin gwen is und had iah olle Fedan ausgrupfd. Zon Middagessn da hads dann a Hehnasubbm mid vey Fleisch drin gem.

Hie und da hamds z`Hoslbach drin a amoe a Sau gschlachd, da had dann da Oba oewei gsagd das e da ned dabei sei deaf wei des fia mih nix is. Wenn s zon Schlachdn gwen is, da hand oewei mehra Mana zammkema, de hamd dann a olle aufbassd das e ja ned z`weid zo eah zuare kim. Zo mia hamd s dann na oewei gsagd das e ja neamd sang deaf daß`s a Sau gschlachd hamd, wei sunsd Bolezei kimmd.