Helmut Zöpfl - Bloß nicht aus der Ruh bringen lassen

– ohne Ausnahm versteht se ganz klar –

koa Kartn vom Urlaub schick heuer.

Um Verständnis dafür bittet

Euer …

Ferienwohnung

„I konn“, hat er gsagt,

„mia koa schlimmere Zeit denga

wia jetzt, wo de Ferien wieder ogenga.

Wenn andere Leit se auf d’ Urlaubsfahrt macha,

da müassn mia dahoamhocka nacha.

Scho a paar Jahr is, ja mei,

mit unserm Urlaub leider vorbei.

Vorbei is mitm in d’ Ferien fahrn –

seit ma a Ferienwohnung kauft ham,

müaß ma eisern jetzt sparn.“

Traumtag

A so a Tag wia heut is seltn.

Der lasst se durch gar nix entgehn.

Von so am Tag, da konnst bloß traama,

da paßt von Anfang o alls zsamma.

Koa Wolkn, de vor d’ Sonn se schiabat,

de wo an blauen Himme trüabat.

Am liabstn daad i was erfindn,

a Schnur, an Strick – zum Zeit-Obindn,

damit de Zeit a bisserl stehat,

a bisserl langsamer vergehat.

Doch is de Zeit mir z’schad fürs länga

zwengs der Erfindung nachzumdenka

oder zum Dichtn aa, werst lacha.

Auf den Tag brauchst koa Verserl macha,

weil der Tag für si selber spricht:

der Tag is selber a Gedicht.

Tag im Herbst

Es is, als waar für heut de Sonna

schnell zum Pfüa-Gott-Sagn nomal komma, als daad de Zeit de Luft ohaltn

und für ganz kurz auf Pause schaltn,

als daad se se a bisserl stemma

gegn s’ Welkn und das Abschiednehma,

als daad mitm Falln as Blattl wartn,

als hättn d’ Astern drin im Garten

den großn und so buntn Somma

mit nei in ihre Farbn gnomma,

als hätt der Himmel all de langa,

vergangna Sonnentag eigfanga.

De Luft is staad und schmeckt ganz eigen;

as Jahr werd nomal groß im Schweigen

und zoagt se in der ganzn Fülle.

Und mir is plötzlich in der Stille,

als daad i’n für ganz kurz verstehn –

den Sinn vom Werden und Vergehn.

Urlaubsgrüße aus dem Norden

Da drobn im schönen Friesenland,

dort wo vorm weißn Nordseestrand,

doch – welche köstliche Idee! –

die Kurverwaltung hat die See

ganz in der Nähe installiert,

und wo die Möwe tirilliert,

dort wo die Ebbe und die Flut

auch sonn- und feiertags nie ruht,

dort wo die steile Düne ragt,

ein „Hummel, Hummel“ ganz verzagt

aus meiner Kehle sich entringt,

der Friese froh zur Zither singt,

das Wattenmeer zum Watten ladet,

der Seehund „oben ohne“ badet,

ein steifer Grog im Glase funkelt,

die Quall im Meere freundlich schunkelt.

Wo unterm lila Heidekraut

die Heidschnucke ihr Nest sich baut,

wo Krabben, Heilbutt, Muscheln, Schollen dem Kurgast gern kredenzt sein wollen,

da kannst als Bayer – du werst lacha –

an ganz an nettn Urlaub macha

und richtig schöne Ferien feiern.

Bloß: Lebn, des möcht i bloß in Bayern!

Ortsbeschreibung

Zum Olympiaturm wolln S’?

Des is gar net schwer.

Da genga S’ gradaus

und de nächste Straß quer

nach links bis zur Tankstell

vorn da, am Eck,

und von da geht a Straß

nach rechts wieder weg,

de laufan S’ fuchzg Meter

und dann wieder links

und da biang S’ dann ab

beim Dings da, beim Dings,

beim Supermarkt und

dann genga S’ gradaus,

und dann seing S’ scho steh

so a grün ogmalts Haus.

Danebn geht a Straß nei,

net bsonders breit,

und von da aus, da siehgt ma

dann scho von weit

a Parkwächterhäusl,

a kloans dortn steh.

Auf des, da müassn S’

schnurstracks zuageh,

denn direkt danebn,

wenn S’ dann richtig lurn

na seign S’ schon steh

den Olympiaturm.

Souvenirs, Souvenirs

Kaum wieder z’Haus

pack ma s’ jetzt aus

de Souvenir,

de ma voll Müah

grad vorher no

in Koffer ham do,

weil s’ uns so richtig

für dahoam wichtig

vorkomma san.

Komisch, dass dann

jetzt uns des Hemd

fast a weng fremd

vorkommt und blöd,

wo „Pirat“ drobna steht.

Und gar des Kappe

kindisch und dappe

find i’s jetzt fei

mit dem Kamel.

Was soll i doa

gar mit dem Stoa,

dem Riesntrumm,

des i wia dumm eipackt hab?

Was dua i, sag,

mit de paar Pfund

Muscheln gar und

dem Seestern, der wo

vier Füaß bloß hat no?

Wo stell bloß i

den Tonkruag hi?

Was, um Gottswuin,

soll de Schatuin?

Was mach i nur

mit der Figur

aus Pinienholz,

de wo i stolz

druntn in Rab

roghandelt hab?

Hoffentlich hat’s

all’s wo an Platz

im Speicher, wo

des Graffe no,

für allzeit verpackt,

vom Vorjahr drobn flackt.

Dia-Abend

Heut derf i s’ bewundern,

de Nachbarn, de untern,

auf der Leinwand, der breiten,

wia s’ am Esel drobn reiten,

sie und er in Riccione,

de Kloa mit Melone,

sie beim Bocciaspuin,

er mit Taucherbruin,

sie mit a Chiantiflaschn,

de Kloa beim Handiwaschn,

beim Schlauchbootaufblasn,

beim Kauf auf der Straßn,

beim Schwimma im See,

beim Sitzn, beim Geh.

Alle Buidl ganz bunt

und des – dreiahalb Stund.

Jetzt sans ma glatt eigschlafa meine Fü-aß

bei unsere Nachbarn seine Di-as.

Was zum Nachdenken

Wett ma?

Der Salomon selig in all seiner Pracht,

Alexander und Caesar mit all ihrer Macht,

Lukull, der so guat wia neamad hat gessn,

der Sonnenkönig mit seine Mätressn,

Katharina de Große, de glebt hat recht frei,

der Onassis, mit Geld fast mehra wia Heu …

Dene alle, wia s’ glebt ham in Saus und in Braus,

hast du – drum gfreu di! – was Wichtigs voraus:

Sie alle daadn – wett ma? – was drum gebn,

wenn s’ du sei kanntn – denn dann daadn s’ no lebn.

Vom Kaufen und Net-kaufen-Können

A Auterl, an Schmuck, a Buidl für d’ Wand,

an Teppich, an Radio, Möbeln, a Gwand,

was z’ Essen, was z’ Trinka, a Limo, a Bier,

a Zeitung, a Buach, a Uhr, a Klavier,

a Haus, a Villa, an Wohnwagn, a Zelt,

des alls san Sacha, de kriagt ma für Geld,

de konn ma kaufa, mietn und ham,

de könna oam ghörn, bringt ma ’s Geld dafür zsamm.

Aber es gibt aa Sacha auf unserer Welt,

de konnst net kaufa für no so vui Geld:

Freundschaft und Liebe, fürs Schöne an Blick,

Gsundheit, Humor, Zufriedenheit, Glück,

Vertrauen aufs Guate, as ewige Lebn,

für des alls konnst was doa zwar,

doch konnst du dir’s net gebn.

Du konnst grad bereit sei für alles und offen,

a weng a Vertraun ham, dro glaubn und drauf hoffn.

Haussegen

Gib unsrer Familie, gib Eltern, gib Kind

und denen, die Gast in dem Haus hier grad sind,

das richtige Gspür und den rechten Verstand,

vui Zeit und Verständnis aa füranand,