Hans Schimmel - Wie im Lewe

Dieses "abba" hat nichts, aber auch rein gar nichts mit der gleichnamigen schwedischen Popgruppe zu tun. An dieser Stelle wäre die Frage zu stellen, ob nicht durch die schwedischen Künstler ein kurpfälzer Urheberrecht verletzt wurde.

jogehfort, oder auch machsach - Das ist ja unglaublich, ist das wirklich dein Ernst?

Hat also nichts mit weg gehen im bewegungsintensiven Bereich zu tun

asohalt - es ist wie es ist

Bei zu intensiven Nachfragen wird das „asohalt“ ersetzt durch, a jetzt heb mich doch ind‘ Schees

awwelhawema - eben haben wir

Wird ohne Zwischenpause gesprochen. Klasse dafür geeignet Mundart zu erlernen.

Brotworscht - Bratwurst

Erkennt ihr das System?? Aus "a" mach "o"

De Kleederschrank

Kerzlich her isch ä Gekrisch,

e Gezeter un Gejammer,

vun meim Weib er Schlafeskammer.

Erscht denk isch, es iss was passiert,

doch glei druff, hab isch kapiert,

dass kää Verletzung iss de Grund

der Tön, vun meinem Weib ehrm Mund.

Kumm mol her, Mann, un zwar schnell,

tönt aus‘em Zimmer ihr Gebell.

Befehlend, barsch, isch her‘s am Ton-

Metall is drinn, in ihrer Stimm,

isch ruf, mein Schatz, isch kumm ja schon,

e korz Sekund wird‘s jetzt grad still.

Un trotzdem sacht mer mein Verstand,

dass misch nix Schäänes dut erwarte,

geh isch ihr jetzt net glei zur Hand.

Wie isch nei kumm, seh isch glei,

sie is leider net debei,

isch dacht mer‘s schun, bei dem Geschrei,

sisch naggisch uff des Bett zu lege

um sisch de Liebesfreude hizugewe.

Mann, kumm her, un dess ganz schnell,

häär isch noch lauter ihr Gebell.

Isch wees noch net, um was es geht,

nur, dass die Schrankdier offe steht.

Sach mer jetzt, was siehscht du dort?

Isch wünsch misch an en annere Ort.

Weit weg vum blede Kleederschrank,

denn ens, dess wees isch ganz genau.

Noch dene Worte vun der Frau,

es kann jetzt blos e falschi Antwort sei,

dess sacht mir mei Erfahrung glei.

Do geh her, guck in de Schrank.

Auweia denk isch, jetzt gibt’s Zank,

weil die Schrankdier, wie isch wees,

net ganz rischtisch funktioniert,

weil von mir net repariert

vor drei Woche,

wie versproche.

Tapfer mach isch jetzt en Schritt

in Richtung Schrankdier, die schun litt

unnerm ständisch uff un zu,

denn so e Schrankdier hot kä Ruh.

Unn wenn‘s Schanier dann emol klemmt,

so werd die Öffnung stark gehemmt.

Isch guck unn hab e komisch Gfiehl im Nacke,

seh ach glei halb rechts de Zacke,

wo isch scheinbar ubedacht,

hab en Kratzer neigemacht,

bei de letschte zwee Versuche,

bei lautem G‘stöhne un Gefluche,

die scheiß Schrankdier eizustelle,

bei so ner Ärwet gibt’s halt Delle.

Isch seh‘s, mein Schatz un gebs glei zu,

du hoscht recht un isch mei Ruh.

Isch hol mer jetzt des Werkzeig glei,

dann iss die Schrankdier widder frei.

Sie guckt misch o unn mer werd klar,

dass dess e falschi Antwort war.

Guck noch ä Mol un pass gut uff

was sagscht, mein Freund,

sunscht gibt’s Verdruss.

Isch nemm mein ganze Mut zusamme,

um mich net vor meiner Flamme,

ach noch vollends zu blamiere,

beim bleede in de Schrank nei stiere.

Also de Kleederschrank is voll,

sag isch un find mei Antwort toll.

Als neewer mir was explodiert,

isch hab‘s dann a ganz schnell kapiert,

dass die Antwort war net recht,

denn mei Weibche fand se schlecht.

Misch ärgert jetzt dei Antwort sehr,

denn de Kleederschrank is leer,

tönt se mer ins rechte Ohr.

Isch kumm mir jetzt bescheuert vor,

denn isch seh kään Milimeter,

trotz ihrm dappische Gezeter,

der frei wär vun de Kleedergsstücke,

die kanscht noch net mol mehr verricke.

Do sacht se mir, der Schrank wär leer,

un isch versteh die Welt net mehr.

Nur, dass du‘s wääscht, isch geh jetzt shoppe,

nur wees isch net, wenn isch was find,

wie soll isch‘s in den Schrank neistoppe.

Des Ding iss äfach viel zu klä,

isch find es werklich nimmie schä,

mir so e Schränkche zuzumute.

Uff gut Deitsch, isch muss jetzt blute.

Net nur Klamotte zu berappe,

nä, ach ins Möwelhaus zu schlappe,

um dort e Schränksche auszuwähle,

damit sisch‘s Fräche net muss quäle,

um, ihr Leit isch will net liege,

dem Berg Klamotte noch mehr hinzuzufiege.

Dess iss net leicht, es muss sich lohne,

denn in dem jetzische könnt e Familie wohne.

En Schrank zu finne, der so groß,

wie e komplettes Dachgeschoß.

Isch muss jetzt erscht mol kräftisch schlucke,

an meiner Hos hinunnergucke,

dort wu‘s steckt des Portemonnaie,

nää dess iss wirklisch nimmi schää.

Mei kläänes Bargeldarsenal,

dut mer leid, es war einmal.

Doch es gibt jo Gott sei Dank,

immer noch des Geld der Bank.

Isch steig schunn in mei Auto nei,

do fällt mer‘s widder brennend ei,

die Fraa, die will Klamotte kaafe,

es wär doch besser jetzt zu laafe.

Denn so e Auto braucht Benzin,

dess iss jetzt leider nimmer drin.

Also muss de Mann nun spare,

anstatt im Auto hi zu fahre,

zu de Bank, zwecks em Kredit,

isch hoff dann nur, die macht dess mit.

De Bankbeamte, der iss stur,

was isch ach sach, der schittelt nur

de Kopp

bei mir bitterarmer Tropp.

Wo bleibt se dann, ihr Sischerheit?

Erscht dann bin isch dezu bereit,

dir zu gewähre de Kredit,

doch ohne, mach isch dess net mit.

Die Dier geht uff, e Fraa kummt rei,

dass isch grad do bin - einerlei

Sie guckt de Bankbeamte o,

isch merk‘s a glei, dess iss sei Fro.

Horsch zu geliebter Ehemann,

es muss mol sei so dann un wann,

es misse nei Klamotte her,

denn die Alde duns net mehr.

De Bankbeamte, der werd blass,

ich denk grad, jetzt hab isch de Spass.

Doch als sie aus de Dier geschwebt,

hot sisch‘s der Typ dann üwwerlegt.

Guter Mann, isch kann‘s verstehe,

denn wenn die Fraue shoppe gehe,

iss de Beitel ganz schnell leer

un ohne Kohle geht’s net mehr.

Deswesche krigscht a jetzt Kredit

un isch, isch mach dess Spielche mit.

Isch kanns net fasse, guck verduzt,

weil der jetzt seinen Spielraum nutzt.

Du brauchscht net gucke, isch machs mit

denn isch brauch nochher ach Kredit.

De Handwerker

Ihr kennt mir glawe, es wär en Jammer,

gäb es net die Handwerkskammer.

Denn ded‘s de Handwerker net gewwe,

dann wär unser aller Lewe

reichlisch schwer un öd,

dess wär blöd.

B‘sonners ohne Instatallateur,

ging im Lewe gar nix mehr

Du hockscht morgens uff em Topf,

beim Spüle schießt‘s dir durch de Kopf,

dass irgendwas net stimme kann,

wenn de Wasserpegel steigt

un sisch beim Drücke nimmie neigt.

Dann wescht du dess sofort als Mann,

uff ganz besunnerie Art und Weise,

des iss Scheiße.

Ich denk mer, kann‘s ganz deitlich spiere,

du selwer willsch do net d‘rinn riehre

un du spierscht schun in de Luft,

de unvergleichlisch herbe Duft,

vun dem, was grad do owwe schwimmt,

es riecht wie Scheiße un dess stimmt.

Du hoscht do gar net dro gedacht,

beim G‘schäft hot‘s dir nix ausgemacht,

doch dess b‘sunnere Aroma,

befördert dich jetzt fascht ins Koma.