Алесь Разанаў - Воплескі даланёю адною

*

Да самага воблака ўзняўся
грудок,
а траве ахвота
яшчэ вышэй.

*

Варона закаркала,
дрозд засвісцеў:
с в а е
у горадзе незнаёмым.

*

Нататнік змакрэў:
набраўся
уражанняў ад дажджу.

*

Ці высакосны, ці просты —
што мае
люты наўме?
Зазірае
у шчыліну месяца сакавік.

*

Снег адступае —
займае
трава наступнасць.

*

Колькі гадзін да вясны —
на пальцах
лічыць вярбіна
і лічыць вяз.

*

Лес весялее:
вясна
вясткуе аб наваселлі.

*

Двор у вачах:
з-за плота
дзівіцца вербалоз.

*

Давай пакатаемся!..
Грак
атабарыўся на таксоўцы.

*

Нешта а зловіцца!..
Хлапчукі
закінулі ў сажалку вудачкі –
дождж таксама.

*

Памыўся ўжо?!.
Ззяе
над лазняй маладзічок.

*

Зазелянела вярба:
з азяра
цягнецца качка —
па пацалунак.

*

Нікога,
а ў кірсе
іграе арган:
я нехта?!.

*

Згортваю карту:
вясна
ператрактоўвае краявіды.

*

У столькі прыгод –
уваходзіць
у горад дождж.

*

Разбілася шклянка:
віно —
лужына крыўды.

*

Штось мусіць успомніць?!.
У грамадзе
зялёнага быльніку
ссохлы.

*

Вясна на дварэ:
абмінаю
адтуліны ў падзямлю.

*

Срабрысцеюць гукі:
званіцу
азорвае маладзік.

*

З рукі ў руку –
перакладаю
камень у твор.

*

Самі развяжуцца:
вішня
у белых вузельчыках.
Красавік.

*

Між сказаным і невыказным
працяжнік:
з вакзала
вырушваецца цягнік.

*

Што абяцаецца — будзе!..
У грудзі
б'е сябе гром,
жагнаецца бліскавіца.

*

Нанова знаёмімся!..—
Зелянеюць
бярэзіна і сасна.

*

Спазняюся:
лічыць
кіроўца маршруткі рублі,
я — хвілі.

*

А швы залатыя!..
Вясна
шые шыкоўныя шаты
дубу.

*

Май на дварэ:
цвітуць
спевамі дрэвы.

*

Пакліканы ў будучыню —
ручай
радуюць перашкоды.

*

Варушыцца скіба —
мо хібы
вышуквае грак у раллі,
мо хлеб?

*

Свае!.. —
Акаляюць
аблокі гмах.

*

Гай зелянее:
у словы
просіцца верш.

*

Давай павітаемся!..
Прыкладаю
далонь да ліповых лісцінаў:
давай!..

*

У дзідах і ў ружах:
вядзе
дзень увесь год
да вежы.

*

Мара ўсміхаецца —
твар
падставіла сонцу вясноваму
маладзіца.

*

У лужынах:
дождж
выроўнівае дарогу.

*

Можа, спаткаемся недзе?!.
Кладу
кашулю і швэдру ў кантэйнер:
можа...

*

Мяняемся сонцамі!..-
Маладую
ўгаворвае леташняя трава.

*

Кажа - а што?!.
Выходжу
па тлумачэнне:
дождж.

*

Пацэліла ў самую кропку!..
З вярбы
сарвалася кропля:
кругі на лужы.

*

На сёння:
у дыядэмы
аздобіў пупышкі
снег.

*

Акраец нічыйнага шчасця —
з-за хмар
вынырвае месяц:
наце!..

*

Складаецца верш —
краявід
угадвае словы.

*

У вываратнях:
віхура
атабарылася ў бары.

*