François Villon - Le Grand Testament

Et cuictes en vin de buffet;

Pour manger de ces morceaulx chiers,

O n en feroit bien ung mauffait.

C'est vïande ung peu plus pesante

Que duvet n'est, plume ne liege;

Elle est bonne a porter en tante

Ou pour user en quelque siege.

S'ilz estoiënt prins en un piege,

Que ces matins ne seussent courre,

J'ordonne, moy qui suis son miege,

Q ue des peaulx sur l'iver se fourre.

Item, a Robinet Trouscaille,

Qui en service, c'est bien fait,

A pié ne va comme une caille

Mais sur roncin gras et reffait,

Je lui donne de mon buffet

une jacte, qu'emprunter n'ose;

Sy aura mesnage parfait,

P lus ne lui failloit autre chose.

Item, donne a Perrot Girard,

Barbier juré du Bourg la Royne,

Deux bacins et ung cocquemart,

Puis qu'a gaignier mect telle peine.

Des ans y a demye douzaine

Qu'en son hostel de cochons gras

M'apatella une sepmaine,

T esmoing l'abesse de Pourras.

Item, aux Freres mendïans,

Aux Devotes et aux Beguines,

Tant de Paris que d'Orleans,

Tant Turlupins que Turlupines

De graces souppes jacoppines

Et flans leur faiz oblacïon;

Et puis aprés, soubz ces courtines,

P arler de contemplacïon.

Ce ne suis je pas qui leur donne,

Mais de tous enffans sont les meres,

Et Dieu, qui ainsi les guerdonne,

Pour quy seuffrent peines ameres.

Il faut qu'il vivent, les beaulx peres,

Et mesmement ceulx de Paris,

S'ilz font plaisir a noz commeres,

I lz ayment ainsi leurs marys.

Quoy que maistre Jehan de Poullieu

En voulsist dire et relicqua,

Contraint et en publicque lieu

Honteusement s'en revocqua.

Maistre Jehan de Meun s'en mocqua

De leur façon si fist Mathieu;

Mais on doit honnorer ce qu'a

H onnoré l'Eglise de Dieu.

Sy me soubzmectz, leur serviteur

Et tout ce que puis faire et dire,

A les honnorer de bon cueur

Et obeïr sans contredire.

L'omme bien fol est d'en mesdire,

Car soit a part ou en prescher

Ou ailleurs, il ne fault pas dire,

C es gens sont pour eulx revanchier.

Item, je donne a frere Baude,

Demourant en l'ostel des Carmes,

Portant chierre hardie et baude,

Une sallade et deux guisarmes,

Que Detusca et ses gens d'armes

Ne lui riblent sa caige vert;

Viel est: s'il ne se rent aux armes,

C 'est bien le deable de Vauvert.

Item, pour ce que le seelleur

Maint estront de mouche a machié,

Donne, car homme est de valleur,

Son seau d'avantaige crachié,

Et qu'il ait le poulce escachié

Pour tout empreindre a une voye;

J'entens celuy de l'Eveschié,

C ar les autres, Dieu les pourvoye!

Quant des auditeurs messeigneurs,

Leur granche ilz auront lambroissee,

Et ceulx qui ont les culz rongneux,

Chacun une chaize persee,

Mais qu'a la petite Macee

D'Orleans, qui ot ma seinture,

L'amende en soit bien hault tauxee,

E lle est une mauvaise ordure.

Item, donne a maistre Françoys,

Promocteur, de la Vacquerie,

Ung hault gorgerin d'Escossoys,

Toutefoys sans orfaverie,

Car, quant receut chevallerye,

Il maugrea Dieu et saint George

Parler n'en oit qui ne s'en rie

C omme enragié, a plaine gorge.

Item, a maistre Jehan Laurens,

Qui a les povres yeulx si rouges

Pour le pechié de ses parens

Qui boivent en baris et courges,

Je donne l'envers de mes bouges

Pour tous les matins les torchier;

S'il fust arcevesque de Bourges,

D u cendail eust, mais il est cher.

Item, a maistre Jehan Cotart,

Mon procureur en court d'Eglise,

Devoye environ ung patart,

C ar a present bien m'en advise

Quant chicaner me feist Denise,

Disant que l'avoye mauldicte.

Pour son ame, qu'es cieulx soit mise,

Ceste orroison j'ay cy escripte.

Pere Noé, qui plantastes la vigne,

Vous aussi, Loth, qui bustes ou rocher

Par tel party qu'Amours, qui gens engingne,

De voz filles si vous fist approucher

Pas ne le dy pour le vous reproucher,

Archedeclin qui bien seustes cest art,

Tous trois vous pry que vous vueilliez prescher

L'ame du bon feu maistre Jehan Cotart.

Jadis extraict il fut de vostre ligne

Lui qui buvoit du meilleur et plus cher,

Et ne deust il avoir vaillant ung pigne,

Certes, sur tous c'estoit ung bon archer;

On ne luy sceust pot des mains arracher;

De bien boire ne feut oncques fetart.

Nobles seigneurs, ne souffrez empescher

L'ame du bon feu maistre Jehan Cotart.

Comme homme beu qui chancelle et trepigne

L'ay veu souvent, quant il s'alloit coucher,

Et une foiz il se fist une bigne,

Bien m'en souvient, pour la pie juchier.

Brief, on n'eust sceu en ce monde sercher

Meilleur pïon, pour boire tost et tart.

Faictes entrer, quant vous orrez hucher,

L'ame du bon feu maistre Jehan Cotart.

P rince, il n'eust sceu jusqu'a terre cracher.

Tousjours crioit: «Haro, la gorge m'art!»

Et si ne sceust onc sa seuf estancher

L'ame du bon feu maistre Jehan Cotart.

Item, vueil que le jeune Marle

Desormaiz gouverne mon change,

Car de changer enviz me mesle,

Pourveu que tousjours baille en change,

Soit a privé soit a estrange,

Pour troys escus six brectes targes,

Pour deux angelotz ung grant ange,

C ar amans doivent estre larges.

Item, j'ay sceu en ce voyaige

Que mes troys povres orphelins

Sont creuz et deviennent en aage

Et n'ont pas tetes de belins,

Et qu'enffants d'icy a Salins

N'a mieulx saichant leur tour d'escolle.

Or, par l'ordre des Mathelins,

Telle jeunesse n'est pas folle.

S y vueil qu'ilz voisent a l'estude;

Ou? sur maistre Pierre Richier.

Le Donat est pour eulx trop rude,

Ja ne les y vueil empescher;

Ilz sauront, je l'ayme plus cher,

Ave salus, tiby decus,

Sans plus grans lettres enserichier:

T ousjours n'ont pas clercs l'au dessus.

Cecy estudiënt, et ho!

Plus proceder je leur deffens.

Quant d'entendre la grant Credo,

Trop forte elle est pour telz enffans.

Mon grand tabart en long je fens,

Sy vueil que la moictié s'en vende

Pour eulx en acheter des flans,

C ar jeunesse est ung peu friande.

Sy vueil qu'ilz soient informez

En meurs, quoy que couste basture.

Chapperons aront enformez

Et les poulces sur la sainture,

Humbles a toute creature,

Disans: «Han? Quoy? Il n'en est rien!»

Si diront gens, par adventure:

« Vecy enffants de lieu de bien!»

Item, a mes povres clergons,

Ausquelz mes tiltres resigné

Beaulx enfans et droiz comme joncs

Les voyant m'en dessaisiné,

Sans recevoir leur assigné,

Seur comme qui l'aroit en paulme,

A ung certain jour consigné,

Sur l'ostel de Gueuldry Guillaume.