О забитье злодея при лицы.
Уставуем теж: где бы хто злодея при лицы в дому своем забил, такового злодея забитого того ж часу по оном забитьи маеть оказати суседом околичным и потом што нарыхлей возным и стороною обведшы и до вряду привести и оказати маеть. А потом, будет ли позван о то до вряду, тогды вряд маеть ему допустити отприсегнутися, иж его на злочынстве при лицу в дому своем забил. Так теж, естли бы ся кому трафило на дорозе або где инде полем або лесом утекаючого злодея погонити, а он бы пойматися не дал, а в том при лицы был забит, тогды тот, хто гонить в дорозе за злодеем, маеть при собе мети суседов або сторонных людей и с тыми, привезшы труп, перед врядом маеть высведчытися, иж его при лицы забил. А будет ли о то ку праву позван, также маеть тыми людми, с ким за злодеем гонил, самотреть на том присегнути, иж на злочынстве и при лицы яко злодея своего забил. А ранного злодея маеть вести з лицом до вряду нашого так, яко вышей описано, бо злодея, при лицы пойманого, нихто не маеть ни одного дня в себе держати, але того ж часу вести до враду. А хто бы злодея через день и через ноч в себе в дому держал, тогды, приведшы до вряду, первей винен будеть его навезати водле стану, а ранный естли будучы пойман, а до вряду не ведучы через день и через ноч задержан и там в дому его умер, тогды будеть повинен головщызну платити также водле стану тым же обычаем. Естли бы хто, злодея поймавшы и до вряду не ведучы, в дому в себе або на дорозе, правом не поконавшы, мучыл, таковый также первей будеть повинен его совито навезати, потом у право з ним уступити.
Хто бы што вкрал на дворе нашом, господарском.
Теж, хто бы на дворе нашом, господарском, што вкрал, а то бы стало менш двох коп грошей, а шла бы тая реч не о горло, и правом бы то на него переведено албо лицо вынято, таковому мають ухо одно урезати, а потом естли бы што вкрал, бы теж краденая реч и десети грошей не стояла, тогды вжо горлом маеть быти каран, вед же и в тот час за слушным поконаньем правным.
О жонах и о детех, которые вжывали речей краденых.
А естли бы лице в дому застато и дети и жона при том были, и тых речей краденых, ведаючи их быти крадеными, уживали, тогды они повинни будуть тую шкоду платити, а в недостатку заплаты и сами головами выдаваны быти, нижли не в вечную неволю, одно покуль ся выробить, яко тым, которые бы закуплены были, а горлом тот сам злодей маеть быти каран, который крал.
О выдаванью лица з уряду нашого и теж з двора князского, паньского и шляхетского.
К тому уставуем: естли бы лице принесено было до вряду нашого, господарского, князского, паньского и земяньского, а хотя бы тое лице была речь важная — золото, серебро, грошы, шаты, кони дорогие, тогды от всего того лица, хотя наважнейшого, кождый вряд, взявши доход свой пятьдесят грошей, маеть тое лицо тому, хто его зысчеть, вернути и отдати, а злодей за вину злодейскую горлом каран будеть. А которое бы лицо стояло менш копы грошей, от того выкупна толко шесть грошей брано быти маеть.
О блудяги.
Кнежата и панове хоруговные, панове рада, также и врядники земские о блудяги, также и о то, с чого злодей согнан бываеть, мають ся заховати тым обычаем, нижей описаным, то ест, кгды ся чый конь албо якое иное быдля приблудить або згонное трафиться на йменью их, будеть взято до двора их, а будет ли в тот час в том именью пан сам, то такое быдля можеть у себе ховати, поки его тот, чые будеть, отыщеть. А отыскуючы, маеть от кождого коня тот, чый будеть, дати по два грошы, а быдло маеть отдавати даром. А шляхта, которые седять у поветех, преблудные або згонные клячы и быдло мають водити и давати до дворов наших, а болш трох дней не мають в себе ховати блудяги, также и згонного. По тому ж ся и врядники князские, паньские, кгды приблудное або згонное быдля або колко их в небытности в том именью самых панов их трафить, мають ся заховати и до вряду нашого отдавати, яко о шляхте вышей в сем же артыкуле описано. А вряд наш тую два грошы, беручы быдло, маеть тому, хто его дасть, отдати, а потом то собе у того, чые быдло будеть, озметь. А хто бы з шляхты або з урядников князьских, паньских через три дни в себе блудяги або згонные ховал и до двора нашого не дал, а то будеть на него переведено и лице з дому шляхетского або з двора паньского вынято, тогды того маеть ся справовати яко злодейства.
Читать дальше