Леў Сапега: Статут Великого княжества Литовского 1588 года

Вси обыватели Великого князства Литовского тым одным правом писаным и от нас даным сужоны быти мают.

Напрод мы, господар, обецуем и шлюбуем под тою ж присегою, которую учынили есмо всим обывателем всих земль паньства нашого, великого князства литовского, иж всих княжат панов рад, духовных и светских, панов хоруговных, шляхту, места и всих подданых наших и всих станов в том панстве нашом Великом князстве Литовском и иных всих земль, здавна ку тому паньству прислухаючых, почоншы от вышшого стану аж до нижшого, тыми одными правы и артыкулы, в том же статуте нижей писаными и от нас даными, судити и справовати маем. Также чужоземцы заграничники великого князства литовского, приеждчые и яким колвек обычаем прибылые люди тым же правом мают быть сужоны и на тых врядехь где хто выступить.

Мы, господар, шлюбуем никого не карати на заочное поведанье, хотя бы дотыкалося маестату нашого господарского ображенья або здрады речы посполитое. А хто бы теж на кого што несправедливе в тых речах вел около ображенья маестату нашого господарского або здрады речы посполитое, а не довел, тым сам каран быти маеть.

Теж предречоным прелатом, княжатом, паном радам, духовным и светским, паном хоруговным, шляхте и местам земль великого князства литовского и всих иных земль, здавна и тепер до того панства великого князства литовского належачых, обецуем словом нашым господарским, иж на жадного чоловека выданье або осоченье явное, таемное подозренье тых станов, вышей мененых, которою колвек виною пенежною, крывавою, везеньем албо достоеньств, врядов або именья одыймованьем винити и карати не маем и не будем, ажбы перво на сойме у суду явным рядом и поступком права, коли жалобник, то ест повод и отпор обжалованый очевисте стануть и достаточне наконець будут поконаны. Которые по суде и по таковом поконанью винные мают быти карани виною в арьтыкулех, нижей описаных, меновите назначоною. А хто бы теж колвек кого обмовляючы в тых речах около ображенья маестату нашого або здрады речы посполитое винил ку соромоте а зельживости, а шло бы таковому обвиненому о честь або о горло, або которое колвек каранье, тогды тот, хто на кого мовить и ведет, а не доведет, тым караньем сам каран быти маеть.

Ображенье маестату нашого господарского в чом се розумети маеть и яко за то карати.

Коли бы хто змову або спикненье, або бунт учинил на здоровье наше, господарское, хотя бы пан бог уховал, иж бы оная змова не была учинком пополнена, таковый за слушным доводом, яко о том нижей в артыкуле пятом сего розделу ест описано, честь, горло и именья тратить. Теж маестат наш ображон бываеть с тое причины, кгды бы ся хто бунтовал, покой посполитый взрушаючи, против нас, господаря, або ку шкоде речи посполитое мынцу без воли нашое бил, або по зейштью з сего света нашом господарском, также и потомков наших, королей полских и великих князей литовских, хотечи хто осести и опановати тое панство великое князство и господарем на нем быти, и войско, люд служебный збирал, выводил. Хто бы теж з неприятельми нашими порозуменье мел, листы до них або послы, радечи против нам, господару и речи посполитой, або остерегаючи слал, тым неприятелем якую помоч давал. Хто бы теж замок наш неприятелю здрадою подал, кроме причины голоду кгвалтовного. Хто бы теж люди неприятелские в панство нашо великое князство литовское здрадливе привел, а то бы на него слушне а справедливе было переведено таким же доводом, яко нижей написано, таковый с права, кром суду нашого с паны радами нашими великого князства литовского, честь и горло тратит. А сынове такового зрайцы дорослые, и которые бы теж за доводом слушным оказалися быть ведомыми тое здрады отцовское, также честь и горло тратити мають. А тые сынове, которые бы не были лет зуполных дорослых, або другие, и дорослыми будучы, а тое здрады отцовское не были бы ведоми, таковые чести ани горла не будуть тратити, однак же и таковые недорослые и дорослые а здрады неведомые сынове за таковый выступ отца своего от всих именей отчизных, выслужоных и которым колвек обычаем набытых вечне отпасти мают. Але вси именья здрайцы такого мимо детей и близких на реч посполитую и на нас, господара, ку столу нашому великому князству припадати будуть. А жоны таковых здрадец, которые не будут ли ведали тое здрады мужов своих, а с того ся выведуть присегами своими, таковые именей своих отчистых и материстых и вена, перед учинком тое здрады им от мужей их описаного, не тратят. А дочки теж тых здрадец, ачколвек почстивости своее не тратят, але до именей отчистых не прийдуть. Толко по смерти маток своих до именей материстых и до вена матчиного восполок из сынами, яко вышей описано невинными, водле права их прирожоного приходити мають.