Леў Сапега: Статут Великого княжества Литовского 1588 года

О спокойном и учстивом захованью при дворе нашом господарском.

Уставуем, кгды бы хто будучи при дворе нашом а не поважаючи пристойне зверхности нашего маестату, смел того ся важити, а на кого другого на палацу нашом торгнути словы быстрыми, ущипливыми, славе доброй и учстивости шляхетской шкодливыми, а о то бы ся укривьжоны до нас утекл з жалобою, тогды мы о тую реч ображоному справедливость неотволочную назавтрее ж, а надалей третего дня, маем с паны радами нашими, пры нас на тот час будучими, вделать, и найдет ли ся в том винным, маем того за нашу вину везеньем на замку шесть недел карати. А жалобной стороне о прымовку справедливость ведле права учинити. А хто бы на кого перед нами, господарем, або хотя и не перед обличностью нашою, але на палацу, в замку и на дворе нашом торгнулся рукою и дал кому другому поличок, таковый черезь вряд двору нашого маеть быти зараз прыстигнен и не спущаючи з замку або з двору нашого ставлен перед нами и сужон. А найдеть ли ся то с права, же он и початок учинил и ударил, за тую вину нашу маеть быти каран везеньем, седеньем на замку нашом, где будеть воля наша, в том паньстве нашом чверть року. А оному ображоному навезку водлуг стану его совито маеть заразом без складанья жадных роков заплатити. А естли при поличку роскрывавит, тогды навезку также совито платити маеть и черезь полрока везенье терпети винен будеть. Хто бы теж перед нами, господарем, корда, шабли або якое иное брони достал и ранил, тот горло тратит. А где бы от тое раны умер або хто зараз забит был, тот горло и почстивость тратит, а головщина або навезка совито з именья и маетности его мает быти плачона и отправена без отволоки. А хотя бы хто, торгнувшися на кого и добывши брони перед нами, не забил и не ранил никого, тот руку тратит. А хто бы в замку, на палацу або в дворе том, где быхмо сами особою нашою господарскою были, на кого другого брони ку зваде достал, таковый, хотя бы не ранил, тогды везеньем у вежи на замку чверть року без вшелякое фолкги каран будет. А естли бы ранил, тогды за доводом руку тратит, а з ыменья або маетности рухомое ранному навезька совито отправлена быти мает. А пакли бы хто так шкодливе был ранен, ижбы не мог быть жыв, тогды за такового ранного шляхтич и вшелякого стану и достоенства чоловек мает быти через нас або вряд наш дворный шлюбом завязан до росправы, поки тот ранный с тых ран або умрет, або жив зостанеть. А естли бы от тых ран умер, тогды тот, который ранил, с права за доводом горлом мает быти каран, а головщина з именья або маетности винного теж совито плачона будет. А где хто не толко на палацу и дворе, але в месте на улицы або в дому и на котором кольвек местцу в месте том, где мы сами персоною нашою господарскою будем, кого ранил, збил або насмерть забил, тогды тот такой же вине подлечи маеть, яко бы на полацу нашом то вделал. Естли ж бы хто, будучи о такий выступ через вряд наш дворный заказан, не усправедливившися проч зехал, тогды таковый за доводом и поконаньем стороны жалобное водлуг права маеть быти зараз с панств наших выволан, а за учинок, пополненый перед обличностью нашою, або за уеханье через шлюб и чьсти отсужон. Але потомкове за выступ отца своего никоторой вине за то не подлегають, только стороне ображоной отправа водлуг вины на именью и маетности его чинена быти маеть. А хто бы перед заказом уехал, а о то бы до заказу очевистого не пришло, маеть по обвиненого позов наш дворный толко на две недели дан быти, и кладен тот позов по оселого на близшом именью его, а по неоселого позов такий выданый маеть быти прибиван у брам замковых и местских, и пры костелех, и через возных обволыван, рок ему ку справе также за две недели назначаючи. А не станет ли и за позвом, то также верхуописаное выволанье и иншое каранье водлуг учинку противко него стегатися маеть. Вед же где бы шло о якую реч, што ся чсти дотычеть, тогды то аж на сойме с паны радами нашими здешнего паньства судити маем. А будеть ли такий свовольный на горачом учинку пойман, а тот бы учинок вину отсуженья чсти и горла за собою тягнул, тогды таковый, яко тот, который сам собе тым учинком вольность свою шляхетскую зкгвалтил, маеть быти у везенью лжейшом до сойму осажон, и потом на сойме первшом ку розсудку в той речи ставен.

О погамованью хоженья и стрелянья непотребного з ручниц и з луков при дворе нашом господарском и при кождом вряде нашом судовом.

Еще теж видячи мы в многих людях зуфальства и своволеньства збытечные, а хотячи то срокгостью права посполитого обваровати и завстегнути, уставуем, абы жаден, якого кольвек стану будучи, не смел при дворе нашом господарском, где коли двором нашим мешкати будем, так на палац и двор наш, яко и по месту збройне и з жадными иншими бронями ходити, звлаща з ручницою, гаркабузом и з луком, и з жадною иною стрельбою, окром меча, корда, шабли, шпады и иншое ручное брони. И для того ж кождый приеждчаючи до места того, где мешкати будем, винен будеть ручницы перед местом выстрелити и, скоро приехавши, ручницы, гаркабузы, луки и иную стрельбу в господе поховати и з ними по месту и на палац, ани до врядов наших так в день, яко и в ночи ходити и стрельбы жадное на месте и в господе чинити не маеть. А где бы хто кого якою стрельбою на палацу або на дворе нашом господарском ранил, тот с права горлом за то каран быти маеть. А естли хто кого в месте на улицы, або в господе стрельбою ранить, тот маеть у вежи на дне полрока седети и раны совито платити. А естли бы на палацу або в дворе нашом там, где сами двором нашим будем, стрельбою забил, такий почстивость и горло тратить. Вед же то детем и потомком его ничого шкодити не будеть, только головщина з именья або маетности его плачона быти маеть. Пакли ж бы хто кого в месте том, где мы, господар, двором нашим будем, на улицы або в господе стрельбою якою забил, тот горлом каран, а детям або близким забитого головщина троякая водлуг стану его з именья и маетности такого мужобойцы плачона быти маеть. А хто бы над сюю уставу и заказ наш смел з ручницою або з луком по месту або на палац, або до двору нашого приходити, хотя бы з нее не стрелял, не ранил, ани забил, предся такий бронь тую на вряд наш тратить. А к тому вины на вряд маршалка нашого або тому вряду, до которого бы з бронью такою пришол, винен будеть дванадцать коп грошей заплатити и, поки то заплатить, у везенью седети. А хто бы не мел чим вины тое заплатити, тот дванадцать недель у везенью седети маеть. Вед же для направы до ремесника ручницы ненабитые а луки неналожоные и без стрел приносити и назад односити вольно. А около притягненья до росправы в таком обвиненью мы, господар, и вряды наши дворные заховатися мають водлуг артыкулу вышей описаного в сем же розделе девятого. А иж вряды наши судовые за порученьем нашим, шафуючи справедливостью людскою, местце нашо господарское заедають , прото, беспечность их варуючи, хочем мети, абы таковый же покой з стороны неуживанья тое стрельбы помененое был захован завжды так при судех земских, кгродских, подкоморских и комисарских. А против выступных с тое уставы при врядех наших такое каранье маеть быти стегано, яко тут в сем артыкуле нижей ест описано. То ест где бы хто з ручницою або з луком по месту ходити або до вряду нашого судового приходити смел, хотя бы з нее не стрелял, не ранил, ани забил, таковый такою ж виною каран быти маеть, яко бы то при дворе нашом господарском вделал. Которых вин естли бы заразом заплатити не хотел, тогды то на именью его порядком статутовым отправено быти маеть. А хто бы з ручницы або з лука и якою кольвек стрельбою ранил кого, будь на месте, в господе альбо перед судом, тот маеть навезку совитую водлуг стану ранного за доводом з розсудку того ж вряду, под которого отправованьем судов то бы се стало, заплатити, будучи винен ку росправе становитисе заразом за заказом врядовым. А к тому за тое своволеньство у вежи земленой чверть года седети в дворе нашом судовом того ж повету. А хто бы через заказ не усправедливившися уехал альбо везенья подняти не хотел, тот, кгды будет о то позван, на рок первшый завитый до того ж вряду, под которого судом то се станеть, совитой вине верхуменованой подлегати маеть. А где бы и за позвом не стал, альбо и ставши и правом в том переконаный будучи, досыть сказанью врядовому з стороны везенья чинити не хотел, тот на выволанье до нас, господара, отослан быти маеть. А с канцлярии нашое заразом выволанье маеть быти давано, выволываючи со всих паньств наших, и поступок против него маеть быти чинен, яко в инших артыкулех о выволаньцох ест описано. Пакли ж бы хто кого такою бронью з ручницы або з лука и якою кольвек стрельбою забил, а был бы на горачом учинку поиман альбо за заказом врядовым сам в право вдавшися, а слушным правным доводом в том переконан, таковый горло тратить. А головщина троякая водлуг стану забитого детям альбо близским его з маетности оного мужобойцы лежачое и рухомое плачона и отправована быти маеть. И где бы ся то стало под урядом земским на рокох земских, тогды такого, на горло сказаного, вряд земский и суд подкоморский и комисарский маеть до вряду кгродского на покаранье водлуг учинку его отослати. А вряд кгродский винен будеть то выполнити, фолькги в том не чинечи, под присегою своею, на вряд его учиненою. А естли бы такий обвиненый через заказ врядовый, не усправедливившися, зехал, тот, будучи позваным до вряду кгродского и правом слушным переконаный, также горло тратити маеть, а головщина четверако отправлена быти маеть на маетности его.