Леў Сапега: Статут Великого княжества Литовского 1588 года

О ображенье маестату нашого господарского, иж кождый обвиненый справоватися винен. И о том, хто перестережеть и где таковых судити. Также о словном мовенью або писанью о господару.

Теж, коли бы хто якого ж кольвек стану был найден явне подойзраный, иж маестат наш господарский образил, таковому жаден привилей, ани зацность, ани достоенство не маеть помагати, ани ся он им щитити можеть, абы ся не мел справовати, и где будеть правом поконан абы не мел каран быти. А хто бы в час перед учинком, милуючи пана бога и пана своего и реч посполитую, справедливе перестерег або обявил таковые речи, тот маеть ласку нашу господарскую мети и чти подвышенья годен будеть. Ведь же в том выступе коло ображенья маестату нашого господарского, где кому идеть о честь и о горло, таковых шляхту подданых наших нигдей инде одно на сойме великом валном с паны радами нашими великого князства литовского мы, господар, судити и подле выступу кождого их тым караньем, яко вышей описано, карати роскажем.

А где бы теж хто заочне што образливого о нас, господари, мовил и теж хто бы особу нашу, господарскую, явне и через листы свои явные писанья албо с подписаньем властное руки своее шкалевал, тогды о то перед нас, господара, на рок завитый маеть быти позван. И покажет ли ся слушным доводом водлуг права шляхтою того панства за его и тых светков присегою, же што ущипливого о нас, господари, мовил або писал неправдиве, тогды за то повинен будет в замку верхнем виленском у везенью учтивом седети шесть недел, а не болш. Вед же может быти менш за ласкою нашою, господарскою, а неоселый — там, где мы, господар, назначим, ведь же не инде одно у великом князстве литовском. А таковую справу на первшом року теж не индей одно у великом князстве литовском с паны радами нашими судити маем, в жадную лимитацыю тое справы не впущаючи. Што если бы ся на первшом року не скончило, тогды вжо в том обвиненый волен быти мает. А покажет ли ся невинность обвиненого, тогды тот хто такового помовил, сам той вине подлегаеть. А для того мы, господар, того, хто таковое мовенье албо писанье нам ознаймить, меновите в позве писати роскажем. А вед же естли бы хто з глупства або шаленства в том выступил, за то мы, господар, братися не будем.

О доводе ображенья маестату нашого господарского.

Яко в кождом учынку, за который горлом карають, потреба доводов явных и ясных, так и в ображенью маестату нашого, неледа за осоченьем або обмовеньем, маем ся на подданых наших сквапяти. Але хто на кого ображенье маестату ведеть, маеть довести сведецством веры годными и неподозреными, людми добрыми, шляхтою, семма светками и их и своею присегою. И то при слушных правных доводех и явных а певных знакох того такового учинку. А естли бы хто кого обмовил в том учинку, а звлаща где бы на его менил, же нам, господару, на здоровье стоял або реч посполитую здрадити и ку упадку привести хотел, а на то ся готовал и усажал, а таковый поведач и сок естли бы таким явным сведецством не довел, сам отсуженьем почстивости и горлом маеть быти каран.

Хто бы колвек с паньства нашого до земли неприятельское утекл.

Теж уставуем, хто бы колвек с подданых наших утекл с паньства нашого до земли неприятельское умыслом злым на здраду а ку шкоде нам, господару, и речы посполитой, такий честь тратить. А дети ачкольвек для того выступу отца своего почстивости своее не тратять, але от именей отца своего отпадывають, которые до столу нашого господарского привернены быти мають, яко ж всих таковых именей по здрадцах яких же кольвек на нас, господара, припалых, мы, господар, николи никому отдавати не маем, абы ся на вси потомные часы здрада такового выступного показывала. А кождый, хто бы што таковых добр у нас, господара, собе упросил, а будучи о то упомненый, зася до столу нашого господарского пустити не хотел, тогды и тот сам за такого ж безецного розумен быти маеть. А ведь же дети того здрайцы естли бы што мели властного набытья своего албо перед тым учинком отца своего от него отделены были, тогды при том зостати мають. Таким же обычаем и жоны, естли будуть не ведали таковое здрады мужов своих, таковые в том будуть заховани, яко в третем артыкуле сего розделу о таких ест написано. А если бы тот здрайца, утекаючы до земли неприятельское, был пойман, тот горло и почстивость тратить. А иж вжо заплату свою возметь, дети его яко при чти, так и при именьях отца своего зоставати мають, так же и жоны при маетности, им належачой.