Леў Сапега - Статут Великого княжества Литовского 1588 года

О злодею, которого на злодействе не в дому поймають.

Естли бы злодей был пойман на злочинстве, а не в дому своем, а тые речи краденые в дому еще не были, таковый злодей сам один маеть за тое злочинство каран быти, а жона, дети и домовая челяд от того будуть волни, одно шкода, злодейством его вчыненая, з маетности того злодея за доводом плачона будеть, што бы болш над тое лице украл.

О знаки злодейские на чоловека подозреного.

Уставуем: кгды бы на чоловека которого простого стану подозреного, то ест который, хотя бы при лицы не был, але однак был бы вжо поволаным або злодейство кому платил, хто жаловал, менуючи собе от него шкоду в злодействе яких речей, а мел бы на то светков трех або двух людей добрых, неподозреных, веры годных, которые бы того злодейства з яких слушных причин ведоми были, тогды за сведецьством таким мает быти тот чоловек подозреный на муку выдан и мучон маеть быти от стороны поводовое один раз. Вед же не далей, толко через годину, одно бы его на члонку не охромил; и домучит ли ся злодейства, тот ма быти горлом каран. А естли ся ничого не домучит, тогды маеть его навезати водлуг стану его.

Трикроть злодея приличного одного дня можеть мучыти.

Уставуем: кгды бы поймано злодея приличного, а на тот час без лица будеть пойман, тогды такового злодея три кроть одного дня можеть мучыти, толко бы на котором члонку не образил. А естли бы ся не домучыл, тогды за кождым разом муки оное маеть его навезати водлуг стану его.

Пакли ж бы в оной муце злодейства на нем домучытися не мог, а оною мукою уморен або на члонку охромен, таковый будеть повинен за умерлого головщину совито, а за хромоту яко за цалого чоловека платити подлуг стану его. Нижли естли бы тот злодей в оной муце для чаров спал, а муки не чул, а тые чары были бы при нем найдены ув устех або на голове, у волосех, подпахами або где инде, тогды навезки ему не повинен дати и еще токовый приличный злодей хотя бы ся за такими чары до злодейства не признал, будеть повинен стороне жалобливой шкоду платити, на чом присягнеть.

О злодеях и розбойниках, которые бы врядника своего поволали.

Уставуем: кгды бы чыих колвек подданых злодеев або розбойников и яких колвек злочинцов поймано, а они бы, идучи на смерть, поволали врядника своего, иж того злодейства их сведом и тым лупом с ними ся делил, а тот врядник был бы шляхтичь, таковый маеть первший кроть отприсегнутися самодин, а потом, естли бы таковых других и третих злочинцов поймано, а тые также, идучи на смерть, того ж поволали и на шыбеницы не отволали, тогды тот от тых поволаный маеть отприсягнутися так, яко о шляхтичу вышей описано. А четвертым разом, естли бы тым же способом был поволан, тогды вжо без кождого отводу и присяги, и без лица, леч однак за доводом маеть быти сказан на смерть яко злодей, а шкода з ыменья або маетности его укривжоному плачона будеть.

А где бы тот врядник не был шляхтичь, тогды за первшым поволаньем злодейским, которые бы то смертью запечатали, маеть стороне жалобливой шкоду всю платити, на чом присягнеть. Пакли ж бы того ж врядника нешляхтича повторе таковые ж злодеи и тым же способом поволали и также смертью запечатали, таковый нешляхтичь вжо без кождого лица также за доводом маеть сказан быти на смерть яко злодей, и по такового за тыми знаки слушными и поволаньи правными поконаного маеть вряд наш кгродский повету кождого зеслати и, поймавши его и на вряде перед собою поставивши, казати на него стороне жалобной фольдровати.

О чоловека неподозреного.

Уставуем: естли бы шляхтич которого нешляхтича и неподозреного помовил, менуючы, ижбы его злодеем был, от него в злодействе ему шкода ся становила, и, не маючых никоторых слушных знаков, хотел его о злодейство поприсегнути, тогды тот чоловек, яко будучы неподойзреный, близшый будеть от того самотреть з суседы своими, людми неподойзреными, будь чужоволостцами албо з людми того ж одного пана, але однако ж в особливых домех мешкаючыми и людми добрими, вери годными, неподойзреными и неприличными, отприсягнутися, а суд ему того маеть допустити. А естли бы тот чоловек самотрет на том не присегнул, тот тую шкоду, о што жалоба будеть, повинен будеть заплатити, а другий раз, кгды бы того ж о злодейство было обвинено, тогды за другим разом и обвиненьем от шляхтича маеть быти поконан водле права и присеги яко злодей.