Helmut Haberkamm - Fier immer jung (eBook)

Weid drauß haddsmi noodriem zu am Dutznd dooda Meere

Ich woor zehrdausnd Meiln in am Maul von am Friedhof

Es werd arch, es werd arch, es werd arch, es werd arch

Es werd a archer Reeng nu roofalln auf uns

Sooch, wos hasdn na gsehng, mei Engerla, mei Buu?

Sooch, wos hasdn na gsehng, mei ganzer Scheener, du?

Doo woor a naggerds glanns Bäby und wilda Wölf umna rum

Doo woor a Deerstrass voll Diamandn, und ka Mensch is dort gloffn

Doo woor a schwarzer Ast, und des Blut is vonna roodropfd

Doo woor a Sool voller Männer mid lauder Hämmer, wu bludd hamm

Doo woor a weißa Laddern, die woor versunkn im Wasser

Doo woorn zehrdausnd Redner und ihr Riggrood woor brochn

Doo woorn Gwehrer und Messer in die Händ vo glanna Kinner

Es werd arch, es werd arch, es werd arch, es werd arch

Es werd a archer Reeng nu roofalln auf uns

Sooch, wos hasdn na keerd, mei Engerla, mei Buu?

Sooch, wos hasdn keerd, mei ganzer Scheener, du?

Doo woor a Grolln und a Dunnern, des hat doobd und hat gwarnd

Doo woor des Rumbln vo aana Welln, wu die ganz Welt ieberschwemmd

Doo woorn hunnerd Drommler, und ihr Händ woorn am Brenna

Dausnd hamm doo gflisderd, und ka Mensch haddna zukorchd

Aans woor am Verhungern, und a Haufn woorn am Lachn

Doo woor des Lied von am Dichter, der wu gstorm is in der Gossn

Des Geglooch von am Glaun, der hat griena im Gässla

Es werd arch, es werd arch, es werd arch, es werd arch

Es werd a archer Reeng nu roofalln auf uns

Sooch, wen hasdn na droffn, mei Engerla, mei Buu?

Sooch, wen hasdn droffn, mei ganzer Scheener, du?

Doo woor a glanns Kind gleeng neeber an doodn Bonny

Doo woor a weißer Moo mid am kollschwarzn Hund

Doo woor a junga Fraa, und ihr Leib woor in Flamma

Doo woor a glanns Maadla, in ihr Händ woor a Reengboong

Doo woor a Moo, der wu verwund woor vom Liem

Und a annerer Moo, wu verwund woor vom Hassn

Es werd arch, es werd arch, es werd arch, es werd arch

Es werd a archer Reeng nu roofalln auf uns

Sooch, wos wersdn etz machn, mei Engerla, mei Buu?

Sooch, wos wersdn etz machn, mei ganzer Scheener, du?

Ich machmi ausm Staab, wall der Reeng ball auf uns roofälld

Ich laaf in die diefsdn, allerdunklsdn Wälder

Wus wimmln dudd vor Leit, obber ihr Händ sinn all leer

Wu des Gifd all derwischd und wus rumschwimmd im Wasser

Und des Haus drauß im Greena werd a kalts, modrigs Gfängnis

Und in Henker sei Gsicht, des gricht kanns zu sehng

Der Hunger dudd alla fressn, und die Seeln wern vergessn

Und schwarz sinn die Farm, und null und nichdi die Zohln

Ja, des soochi, des siechi, des maani, des draami

Des lassi leichdn am Berch droom, dass die Leit alla sehng denn

Und ich steh aufm Wasser und ich geh scho fast unter

Obber ich waaß, wossi sing, und ich sing mei Lied weiter

Es werd arch, es werd arch, es werd arch, es werd arch

Es werd a archer Reeng nu roofalln auf uns

Die Herrn mid ihrm Griech

Masters Of War

Ihr Herrn mid eierm Griech

Ihr baut Drimmer Granoodn

Ihr baut Bombn und Fliecher

Ihr baut Gwehre und Rageedn

Ihr versteggd eich hinter Mauern

Ihr verschanzd eich hinter Diern

Eier Maskn hobbi durchschaut

Ihr kenndmi net hinters Licht fiehrn

Eier Leem lang machder nix annersch

Wie wos baua zum Zersteern

Ihr spield mid dera Welt

So als däädsi eich keern

Ihr driggd uns Gwehre in die Händ

Und na dädder eich verziehng

Eich gricht kanner mehr zu Gsicht

Wenn die dödlin Kugln flieng

Wie doomools der Judas

So liengd ihr und bscheißt

An Weltgriech kammer gwinna

Des macht ihr die Leit weis

Obber ich durchschau, wos ihr macht

Wos ihr sacht und wos ihr dengd

So gloor wie des Wasser

Wossi siech in meina Händ

Ihr zeichd uns, wimmer abdriggd

Obber die annern, die schießn

Ihr verziechd eich und macht Strichle

Wenn die Leit ihr Blut vergießn

Ihr versteggd eich in eirer Villa

Wenn des warme, rote Blut

Rausschießt aus ihrm Leib

Bevors in der Erdn drinna ruht

Ihr versetzt uns in Angst

Dassi jeder die Frooch stellt:

Wer setztn doo nu Kinner

In a sedde Welt?

Ihr bedroht unner Kinner

Sinnsi aa nunni am Leem

Fier eich is jeds Blut zu schood

Fier eier blutigs System

Obber wos waaßn scho ich

Walli so schlau du und red?

Ihr sacht, dassi zu jung bin

Dassi doo dervoo nix versteh

Obber des Aane waaßi gwieß

Waaßi aa net vill iebers Leem

Net amoll der Jesus werd eich

Amoll a Vergebung mehr geem

Des Aane mussi eich nu froong:

Hat eier Geld na so a Macht?

Bringt des eich na die Vergebung?

Gell, so habder eich des dacht?

Ich glaab, dass ihr des nu mergd

Wenn der Dood eich bezwingt

Dass des Geld, wu eich kerd

Fier eier Seeln nix mehr bringt

Ach ich hoff, ihr dädd sterm

Und eier Dood, der kummt ball

Na laafi hinter eierm Sarch

Und ich freimi ieber eiern Fall

Wenni siech, ihr fohrd in die Gruum

Zu eira letztn Loschie

Na stehi an eierm Groob

Und ich waaß: Etz seider hie!

Bloß so a Benner

Only A Hobo

Ich bin eikaafn ganga neili drin in der Stadd

Doo siechi an altn Benner rumlieng in der Einfard

Sei Gsicht woor ganz dreggi aufm Bodn dort gleeng

Die Nacht hadder dort zubracht und vill Leit hammna gsehng.

Bloß so a Benner, obber a Mensch, der is fort

Kanner is doo etz, wu a Lied fierna singd

Kanner is doo etz, der wunna hamm bringd

Bloß so a Benner, obber a Mensch, der is fort.

Mid lauder alta Zeitunga woor sei Leib zugedeggd

Der Bordstaa woor sei Kopfkiss, die Strass woor sei Bedd

Sei Gsicht wennsd des gsehng hast, hast gwissd vo seim Kampf

A boor Geldstigg hadder kabbd, in der Fausd neivergrampfd.

Bloß so a Benner, obber a Mensch, der is fort

Kanner is doo etz, wu a Lied fierna singd

Kanner is doo etz, der wunna hamm bringd

Bloß so a Benner, obber a Mensch, der is fort.

Wos werdn aus am Menschn, wenn aus seim Leem nix mehr werd?

Wenner nausschaud in die Welt von am Loch in der Erdn?

Wenner wartn dudd auf die Zukunft, wie a Gaul mid brochna Fuß?

Wenner rumgriechd in der Gossn und muss sterm ohna Gruß?

Bloß so a Benner, obber a Mensch, der is fort

Kanner is doo etz, wu a Lied fierna singd

Kanner is doo etz, der wunna hamm bringd

Bloß so a Benner, obber a Mensch, der is fort.

Hans Schoor

John Brown

Der Schoors Hans woor im Griech

Und hat kämpfd fier Ehr und Siech

Sei Mudder woor so stolz auf ihrn Buum!

Sei Aussehng woor wie gschleggd

Schneidi woorer in der Uniform gsteggd

Sei Mudder hat bloß gredd vo Mut und Ruhm.

»Ach Hans, wie fesch Soldoodn sinn!

Ich freimi, dass ich dei Mudder bin.

Ich bin so stolz, wall du dusd etz dei Pflicht.

Mach, wos dei Vorgsetzdn soong

An Haufn Ordn wersd na droong

Na stehsd du in der Zeitung und a jeder kennt dei Gsicht!«

Wirrer fort is na zum Zuuch

Hat sei Mudder die Leit aufgsucht

Ich heer ihr Werder heit nu in mei Ohrn:

»Schaudner noo, des is mei Sohn!

Etz werd noo nooch Frankreich zoong!«

Sie hat scho gsorchd, dass alla des derfohrn.

Manchmoll is a Feldbosd kumma

Wie im Schnee die Friehjohrsblumma

Voller Freid haddsis na alla Leit glei zeichd.

Sie hat rumbrohld mid ihrm Buum

Mid sei Schlachdn und seim Ruhm

Vor lauder Griech und Zeich hamm ihr Aang ner bloß so gleichd.

Na hadds lang ka Bosd mehr gricht

Eewich lang hadds nix mehr keerd