Helmut Haberkamm - Fier immer jung (eBook)

Damit hat dieser Songpoet die Populärmusik moderner Prägung reif und erwachsen gemacht, angereichert mit literarischer Tiefe und stilistischer Sprachkraft. Und dies in immer neuer Gestalt und Verwandlung – über viele Jahrzehnte hinweg. Für Millionen Menschen in der Welt ist Dylan zum Genre-Schöpfer und zum Anregungs-Genie schlechthin geworden – und immer blieb er dabei eigenwillig und unabhängig, rastlos kreativ und auf beeindruckende Weise unberechenbar.

Am 24. Mai 2021 feiert er seinen 80. Geburtstag, und dieses Buch soll ihm Reverenz erweisen – als eine tiefe Verbeugung vor einem Jahrhundertkünstler, der uns unglaublich viel gegeben hat, das nun ganz fest zu uns gehört. Zur fränkischen Sprache und zu unserem Leben. May he stay forever young!

Helmut Haberkamm

Frühjahr 2021

@ Helmut Haberkamm

I

Ganz leis bloß im Wind

Blowin’ In The Wind

Wievill Strassn muss a Mensch noogeh

Bisser als Mensch amoll wos zälld?

Durch wievill Länder muss a weißa Daum flieng

Bissi a Ruh find in dera Welt?

Wie oft missn Bombn und Granoodn nu falln

Bis Friedn mehra zälld wie Macht und Geld?

Die Antwort, mei Freind, heersd ganz leis im Wind

Die Antwort heersd ganz leis bloß im Wind

Und wievill Johr kann a Berch besteh

Bisser ganz flach is und eem?

Und wievill Johr hält a Volk des aus

Net frei und selbstbestimmt zu leem?

Und wie oft kann a Mensch wechschaua

Und so doo, als dääder goor nix sehng?

Die Antwort, mei Freind, heersd ganz leis im Wind

Die Antwort heersd ganz leis bloß im Wind

Und wie oft schaut a Mensch in die Heh

Bevor er in Himml amoll sicht?

Und wievill Ohrn braucht woll a Mensch

Bisn an die Annern ihrm Leid wos lichd?

Und wievill Menschn missn etz nu sterm

Bis amoll a End is mid dera Gschicht?

Die Antwort, mei Freind, heersd ganz leis im Wind

Die Antwort heersd ganz leis bloß im Wind

Hängdi net noo, des is okee

Don’t Think Twice It’s Alright

Des hat kann Wert, dassd rumhängsd und bloß rumglotzd

Hasders immer nu net kabierd?

Des hat kann Wert, dassd rumhängsd und bloß rumglotzd

Doo is scho vill zu vill bassierd.

Wenn dei Wegger schelld in aller Herrgoddsfrieh

Na is mei Koffer fort und dei Bedd, des is leer.

Du bist schuld, dass ich im Reeng draußn steh

Obber hängdi net noo, des is okee.

Des hat kann Wert, dassd aufstehsd und an Kaffee mäggsd

Ich geh nichdern meiner Weech.

Des hat kann Wert, dassd aufstehsd und an Kaffee mäggsd

Mich wärmd nix mehr auf meim Weech.

Ach, ich wollerd, du soochersdmer an freindlin Satz

Dassi doobleim meecherd, bismer der Groong widder blatzd

Mir hamms nie verstanna, des Blaudern und Versteh

Obber hängdi net noo, des is okee.

Des hat kann Wert, dassd blägn dusd und rumgreinsd

Des hast doch sunst aa net gmacht.

Des hat kann Wert, dassd blägn dusd und rumgreinsd

Des hat doch nu kann wos bracht.

Ich ieberleech und frooch mich in aana Duur

Wu isn die Fraa hie mid dera Grafd und dera Figur?

Mei Herz hobberder gschengd, obber du grallsder ja mei Seeln

Obber hängdi net noo, des is okee.

Ich laaf etz auf am langa, finsdern Weech, heersd

Wennis net schaff, na pfeifi eem drauf.

Ich laaf etz auf am hardn, kaltn Weech, heersd

Ich soochder aans: Bass auf dich auf.

Ich kann net soong, dassd gemein zu mir woorsd

Du häsd freindliä sei kenna, obber des woor nie dei Oord.

Mei Zeit hasdmer gstolln und mei Leem hasdmer verpfuschd

Obber hängdi net noo, des is eh scho worschd.

Denk nämmer droo, bassd scho, alles gloor.

Mid Godd auf unnera Seitn

With God On Our Side

Ach, mein Nooma kannsd vergessn

Und mei Alter na erschd recht

Ich kumm vo doo aus Frankn

Mer lebbd doo net schlecht

Dassmer Gsetze befolng muss

Hammsmer beibracht beizeitn

Ja, des Land, wu ich leem du

Hat Godd auf seina Seitn

Ach, die Gschichtsbiecher derzällns uns

So wohr glingd die Gschicht

Die Soldoodn woorn arch dichdi

Und die Feind, die sinn gflichd

Die Soldoodn hamm neigfungd

Dass a Ruh woor mid die Heidn

Ja, des Reich, des woor heilich

Mid Godd auf seina Seitn

Mir hamm kämpfd geecher die Franzosn

Die Heimood zu bewohrn

Ob ludderisch odder kadoolisch

Wos falsch is, des woor gloor

Mir hamm kämpfd bis aufs Blut

Aa geecher die eigna Leit

Die Heldn stenna im Gschichtsbuch

Und hamm Godd auf ihra Seitn

Ach, der Erschde Weltgriech

Woor a bludicha Gschicht

Des Ganze woor so sinnlos

So vill Leem hadder vernichd

Manche soong, des woor needi

An bessern Boodn zu bereidn

Und drum zäll net die Doodn

Die hamm Godd auf ihra Seitn

Wussi na in Zweidn Weltgriech

Vom Zaun brochn hamm

Hamms alles kabudd gmacht

Wos gut woor in dem Land

Hamm Milliona Judn umbracht

Heid wissmer Bescheid

Heid hammer obber aa widder

Godd auf unnera Seitn

Uns werd gsochd, wu der Feind hoggd

Ob Moslem odder Grisd

Des kann widder der Russ sei

Odder ergnd a Derrorisd

Die kemmer na widder hassn

Wall sowos därfmer net leidn

Denner zeingmer scho, wos gschloong hat

Mid Godd auf unnera Seitn

Heidzerdooch doo gibbds Waffn

Die joong alles in die Lufd

A Verriggder wenns in die Gralln gricht

Is die ganz Welt glei verbuffd

A Finger driggd aufs Gnepfla

Den Schlooch spiersd na weltweit

Mer därf goor net droo denkn

Mir hamm ja Godd auf unnera Seitn

In so manchera dunkln Stund

Hobbi drieber noochdenkn gmissd

A Kuss woor der Oofang

Wu Grisdus greizichd worn is

Ka Mensch kann des wissn

Doo drieber kammer streidn

Woor beim Verräder Judas

Aa Godd auf seina Seitn?

Etz machermi auf die Soggn

Ich bin saumäßi mied

Ich bin ganz neeberder Kabbn

Und am End mid meim Lied

Die Wörder fliengmer durchn Kopf

Vielleichd dassis falsch siech –

Obber is Godd auf unnera Seitn

Verhinderder na in näggsdn Griech?

Die Fraa aus die dunkln Wälder

Girl From The North Country

Wennsd widder naufkummsd, zu die dunkln Wälder nauf

Wu der Wind gscheit pfeifd und beißd so greisli streng

Sooch scheena Grieß, ich hoff, sie is wohlauf

Ich woor amoll so arch annera kängd

Und driffsders oo, wenns in Schnee roodrabbd

Wenn der Frost na kummt und der Summer geht

Na schau, dass an warma Mandl hat

Dass net friern muss im Wind und im Schnee

Horch, schau fier mich, obs ihr langa Hoor nu hat

Ob ihr Loggn roofalln denn bis auf die Brusd

Schau fei nooch, obs ihr langa Hoor nu hat

So stehtsi vormer, so wie doomools im August

Ich frooch mich, obsersi nu derinnern dudd an mich

Ach, wie oft denk ich an sie

In mei ganzn finsdern Nächd

Und all Dooch scho in aller Frieh

Wennsd widder naufkummsd, zu die dunkln Wälder nauf

Wu der Wind gscheit pfeifd und beißd so greisli streng

Sooch scheena Grieß, ich hoff, sie is wohlauf

Ich woor amoll so arch annera kängd

A archer Reeng werd nu roofalln auf uns

A Hard Rain’s A-Gonna Fall

Wu bistn na gwesn, mei Engerla, mei Buu?

Sooch, wu bistn gwesn, mei ganzer Scheener, du?

Rumgstolberd binni zwischer zwölf raacherda Gipfl

Ich bin gloffn und grochn auf zehr grumma Strassn

Rumgstiefld binni middn in siem stinggerda Wälder