Salvatore Di Giacomo - 'O voto - Scene popolari napoletane in tre atti

Nun te ne ncarricà! Addò te vene fatto tu nzagne e miette sanguette.

'O chinino! È asciuto n'ato Cardarelle! ( entra nella sua bottega )

Ma lle vene sempe, sta mossa?

Lle vene quanno… ll'ha dda venì. Si mme stesse a sentere a me, forze forze, ve dico a buie ca starrie pure buono. Ma quanno chillo, a l'aità che tene, tene ancora 'a capa 'e nu guaglione! Già, pe me, nun è stato maie ommo 'e carattele. È buono a fa bu bà, e pò se fa mettere 'e piede ncapo 'a tuttu quante.

Ave raggione.

E tenitelo mente, comme s' è fatto! Vuie v' 'avite ricurdà, che piezzo 'e guaglione ca era!

Overo, ch'era bello! Nu piezzo 'e giovene, chiatto, russo…

I' chessà! Mo mme pare comme si se fosse arrugnato!

Embè, avite visto? Mo chiagne mo, mo se va arraccumannanno a tutte 'e sante, se va addenucchianno pe dint' 'e cchiese… E po', parlanno parlanno, quanto, 'e bbello, s'avota e bà 'e faccia 'n terra!..

Uh! Mamma mia!

Madonna mia, scanzece!

'Assateme ì a vedè che se dice. ( S'avvia, poi tornando ) Sentite chello ca ve dico io. Chest'è na patella ca si nun se scrasta 'a faccia a chillo scuoglio, io nun lle dongo manco n'ato mese 'e vita…

Rafè! Iesce ccà!..

Sto ccà… ( a Sofia e Assunta, sottovoce ) Chillo ha dda lassà 'onn Amalia!.. ( corre alla bottega. Assunta e Sofia guardano, di sfuggita Annetiello che seguita a rimescolare le carte. Movimento improvviso nella folla che s'è adunata davanti alla tintoria ).

Neh, cu premmesso!.. Premmettete… Premmettete!.. Faciteve nu poco arasso, aggiate pacienzia!.. ( La folla s'apre. Vito Amante appare, sorretto da Nunziata e dai garzoni che gli sono intorno. Ha le maniche rimboccate, le braccia tinte variamente ) Nu poco d'aria!

Nu poco d'aria!

Aria! Aria!

Nun ll'affucate!

Lassate 'o risciatà!

Princepà?

Comme ve sentite?

È niente, è niente! ( a Vito ) Assettateve nu poco a ll'aria… Neh, na seggia…

Na seggia! Na seggia!

Ccà sta 'a seggia… ( Vito siede, in mezzo alla folla, disfatto, il cappello buttato in dietro, delle ciocche di capelli sulla fronte, pallido, quasi tremante )

Me', ch'è cos' 'e niente…

Ccà sta 'a mistura!

Nunziatè, 'a mistura!

Miette ccà! ( Toglie di su il bicchiere la carta che lo ricopre. A Vito, dolcemente ) Ve ne vulite vevere nu surzo? Me', ca chesta fa miracule… ( Vito beve. Nunziata gli regge il bicchiere ) Comm'è? N'ato surzetiello, me'!.. ( Vito fa cenno che è buona. Nunziata restituisce il bicchiere a Teresina ) Io v' 'aggio ditto, ca chesta ve risturava…

'On Vì?.. ( chinandosi su Vito ) Ve so' mancate 'e fforze, nun è overo?

'E fforze? Chillo è ghiuto 'n terra!

Vuie pazziate! Io era cammenante a Nnincurabbele… Ogne mumento nu sparpetulo 'e chiste…

Assù, va 'o conta a n'ata parte!

Me', ch'è niente… Veviteve n' ato surzo 'e mistura… ( cerca Teresina ) Miette ccà, ce n'ha dda sta n'ato dito…

Chella 'a guagliona s' 'a vevuta!

Neh, ma vedite!

C'ha fatto, s' 'a vevuta? Giesù, Giesù! Vuie vedite sti criature! ( Teresina mortificata si allontana )

Princepà?.. Comme ve sentite?

Meglio, meglio… Mme sento meglio… Mm'è quase passato… ( si guarda intorno smarrito )

E nun avite appaura!

'Assate fa Dio!

'E chi è sta seggia?

Miette ccà, è dd' 'a mia… ( prende la seggiola, ma rimane in iscena )

Avite… mannato a chiammà… a mammema?

Sissignore, avimmo mannato. Ma vuie mm'avite fa 'o piacere, mò che bene, nun ll'avite spaventà, oh! Chesto che cos'è? Embè, nu giovane comme a bbuie ca s'abbelesce 'e chesta manera?..

Figlio mio, vuie mme parite nu piccerillo! Ma ch'è stato? Che ve sentite?.. Pecchè chiagnite?..

Io… nun mme sento niente… Io mme veco disperato, chest'è… Io nun saccio cchiù a chi mm'aggia raccumannà… Io nun 'o ssaccio io stesso chello che tengo… Io mme veco perzo!.. ( singhiozza e si guarda intorno come smarrito )

(Sentite a me, chello è affetto 'e neveratura).

(A fratemo 'o surdato lle faceva tale e quale!)

Ve vulite assettà n'ato ppoco?

No… Nun voglio niente…

E che bulite? Dicite. Nun v'appaurate. Nuie stammo tutte quante ccà… Me', arraccumannateve a chillo bello Giesù Cristo, ( indica il Cristo ) c' 'a misericordia soia è grossa assaie!..

Isso mm'ha sanato a ppatemo!

Isso v'ha dda fa sta buono!

Ah, Giesù Cristo mio! ( Si sberretta. Tutti gli uomini si sberrettano. Le donne fanno gruppo. Gente alle finestre. Quelle della mala casa si schiudono e qualche figura appare disotto le persiane ) Io a vuie mm'arraccumanno!.. ( Cade lentamente in ginocchio. A uno a uno tutti si piegano o s'inginocchiano. Appare, in questo, dal vicolo a destra, donn'Amalia, s'arresta, sorpresa, e ascolta ) Io a te mm'arraccumanno cull'anema e c' 'o cuorpo! Tu mm'aie da scanzà, tu mm' aie libberà, e p' 'e patimente ca 'è patuto e pe sta curona 'e spine… ( levandosi risoluto, il braccio teso verso il Cristo, il berretto nella mano ) Io te faccio 'o voto 'e levà na femmena d' 'o peccato!