Адам Міцкевіч - Пан Тадэвуш

Я абвіняць не ў праве, я свой гнеў пакінуў,

Я абвіняць не ў праве - праз мяне ён згінуў,

Але і ён...

* * *

Каб раз ужо адказ мне пэўны даў адкрыта,

Бо знаў пачуцці нашы, каб маіх візітаў

Больш не прымаў, хто знае, мо б я пасварыўся,

Пагневаўся, паехаў, болей не з'явіўся.

Але ён тут прыдумаў хітры план і новы:

Аб тым, як быццам, не магло быць мовы,

Каб я пасмеў пра сувязь вымавіць два словы.

А я яму патрэбны быў, бо у пашане

Быў я і ў шляхты, і ў магнатаў пры спатканні.

Дык ён, нібы маіх пачуццяў не заўважваў,

Прымаў мяне, як і даўней, са мной расхаджваў,

Прасіў часцей наведваць. А як толькі ў залі

Мы заставаліся удвух, уміг вязалі

Мае пачуцці, просьбы, план ужо гатовы

Яго сумысля абыякавыя словы

Пра сеймікі, суды, пра паляванні...

* * *

Не раз за чаркамі, пачуццям даўшы волю,

Ён кляўся ў дружбе, абдымаў мяне да болю,

Бо я патрэбны быў са зброяю ці ў сойме.

Калі я мусіў абдымаць яго, хто ж пойме,

Якая злосць ва мне кіпела! Ў вуснах сліну

Трымаў, рука сціскала шаблю. Думаў, кіну

Ўсё гэта, плюнуўшы на дружбу ваяўніча,

Ды Ева, бачачы мой зрок, маё аблічча,

Угадвала, не знаю як, што ўсё кіпела

Ва мне. Глядзела з просьбай на мяне, бляднела.

А гэта ж галубочак быў такі лагодны,

І зрок яе быў гэткі ветлівы, пагодны!

Такі анёльскі, што спыняў я пыл імклівы,

Не меў адвагі гневацца, сядзеў маўклівы.

І я, ва ўсёй Літве задзіра ўсім вядомы,

Перад якім дрыжалі панскія харомы,

Які не толькі Стольніка б не пабаяўся,

А нават каралю у крыўду б мо не даўся,

Што ў шал мяне прыводзіла любая спрэчка,

Я ў той час злы, п'яны маўчаў, нібы авечка!

Як бы Santissimum угледзеў!

* * *

Ці раз збіраўся сэрцам я яму адкрыцца,

Унізіцца да просьбаў перад ім, скарыцца,

Ды, глянуўшы у вочы, сустракаў пагляды

Халодныя, як лёд. Дык сам зноў быў не рады

Сваім пачуццям і стараўся зноў упарта

Аб іншых справах гаварыць ці строіць жарты.

Сапліцаў прозвішча, каб толькі не прыблізіць

Сябе да пана і не атрымаць адмовы,

Бо колькі ж паміж шляхтаю было б размовы,

Каб ведалі, што я, Яцак...

* * *

Гарэшкі за Сапліцу дзеўкі не аддалі!

Мне, Яцку, чорнай поліўкі на стол падалі!

Ўканцы, не ведаючы, што і як уладзіць,

Надумаў я са шляхты полк малы зграмадзіць

I, кінуўшы павет свой і свой край каханы,

Прабрацца ў бок Масквы ці дзе на басурманы,

І ваяваць. Паехаў я на развітанне

Да Стольніка з надзеяй, што калі ён гляне

На сябра даўняга, якога у пашане

Усё ж меў за вернасць і вялікія карысці,

Які вось зараз хоча выехаць кудысьці,

Дык можа ўзварухнецца ў ім пачуцце трошкі

І мо пакажа ён мне, як слімак той рожкі,

Крыху душы людской!

Ах, той, хто хоць крыху для сябра сэрца мае,

Хоць іскрачку пачуццяў у душы хавае,

Дабудзе тую іскрачку пры развітанні,

Як аганёк жыцця апошні пры скананні!

Калі апошні раз над сябрам схіліць скроні,

То вока найцвярдзейшае слязу аброніць.

* * *

Бядачка, чуючы, што еду, пабялела,

Як труп, звалілася без памяці - самлела.

Прамовіць не магла і колькі мела сілы,

Душыла страшны плач - такі я быў ёй мілы!

* * *

Я помню, першы раз тады слязьмі заліўся

Ад радасці і роспачы. Пра ўсё забыўся

I думаў кінуцца старому проста ў ногі

І віцца вужам, і крычаць: "Вярні з дарогі,

Як з солі слуп, стаў весці ветліва, нягодны,

Гаворку, ды пра што? Пра доччына вяселле!

У гэткай хвілі! Гервазы, ты ж у целе

Душу людскую маеш!

Кажа: "Пан Сапліца,

Якраз ка мне прыехаў сват Кашталяніцаў.

Ты сябра мой, што скажаш мне аб гэтых сватах?

Дачка ж мая прыгожая, з сям'і багатай,

Каштэлян Віцебскі, як знаеш, у сенаце

Пачэснае займае крэсла! Дык як, браце?"

Зусім не памятаю я свайго адказу,

Здаецца, моўчкі выбег, на каня сеў зразу!"

* * *

"Ты, Яцак,- мовіў Ключнік,- мудрыя прычыны

Знаходзіш, ды твае не зменшацца тым віны!

Здаралася ж ужо, і то не раз на свеце,

Што дочку караля ці пана на прыкмеце

Хто меў, дык думаў, як схапіць яе, украсці,

Адкрыта помсціць. Але хітра так напасці

І пана польскага ў адно забіць з Масквою! "

"Не быў я ў змове!- ксёндз пярэчыў галавою.-

Браць гвалтам? Мог бы я яе з-за крат, з-за клямак

Забраць, разбіць бы мог у пыл яго той замак!

Я Добрынь меў з сабой і іншыя засценкі.

Ах, каб яна была, як іншыя паненкі,

Здаровая! Калі б уцёкаў і пагоні

Цяжары вынесці магла, каб зброя, коні

Яе не страшылі, не ждаў бы я й хвіліны!

Але ж яна была, як чэрвік матыліны -