Ludwig Fels - Dou di ned o

weil mi der Wegger in Oasch zwiggd.

Des Wasser schdeihd mer bis zum Hals

und a Fischla beißd mer ins Gnagg

kann a a Wurm sei

middn in der Nochd

wos waß mer.

Mid aner aldn Zeidung

bau i mer a Bood.

Scho

segld a Wolgn

durch mein ledschdn Draum.

subdiles boem

I hob nix gecha di

i hob nix gecha mi

nix gecha Godd

glabd mer blouß ned jeds Wodd

hob nix gecha Kindä

bin selber blouß a glaner Sindä

hob nix gecha Kadzn

hob nix gecha Hund

sulang mi di Mais ned freßn

bleib i kugelrund

hob a nix gecha Liebe

hob a nix gecha Luschd

im Hobbala der Driebe

werd ofd a Kuß verbfuschd

i bin am Leem

ned grang und no ned doud

wos Scheeners derfds edz länger nemmer geem

des ledschde Lichd is dick wäi Bloud.

kurzgedichd

Edz härd er scho

middn im Sadz af

zu dengn.

Edz härd er scho

middn in der Zeiln af

zu schreim.

Edz moch i a nemmer

weiderlesn.

lideradurgridig

I hob dou a Bouch

ka Bildla drin

blouß lauder Wörder

und der Name vom Audor

den i mer ums Verregn ned

mergn ko

(irchendwos mit Kitzferald

Kuß odä su ähnli)

und drin im Bouch

schreibd der goude Mo

die Seidn gar ned vull

und i frouch mi warum

wou doch no su viel Bladz is

und so gäid des

bis zur ledschdn Seidn

les i hald a no des Weiße

zwischn die Zeiln.

ode an f.k.

Des Leem dou is ka Widz

des waß sogar der Fitz

des Leem is häichschdns wäi a falscher Gruß

des waß sogar der Kusz.

Die Eckschischdenz glaichd einem aldn Omnibus

der nichd mehr huben muß

weil seine Reifn luv- und leewärds rolln

wos däi gar ned missn oder solln.

Ach, ich liebe seine Schbrache

dieses frängische Genache.

Herr und Godd, laß ihn mir breisn

und niemals hinderm Komma

einen Bungd vurdaischen.

dialegd

I moch die Frangn, moch die Daidschn

a wenns mi mid die Zunga beidschn.

I moch mein Dialegd

a wenn der Hund ned dro verregd.

I moch die daidsche Schbrouch

vo ihr gräich i ned gnouch:

sie klingd so schdolz, sie dönd so edl

schbrechn kanns a ned a jeder Bledl.

Am liebschden moch i aber doch des Frangnword

weil i bin scho viel dslang vo Frangn fodd

leb woandersch af der Weld

dou wou mer hald ganz andersch belld.

griegserglärung an die Bayern

Machd Frangn frei

i zähl bis drei

i zähl bis vier

bschdell mer a Bier

weil wir san mir.

Laßd Frangn endli Frangn sei

dann zähl i nemmer lang bis drei

erhebe meine Stümme

und sing die Frangnhymne

denn i bin a Badriod

und souch den Jodldod.

Текст предоставлен ООО «ЛитРес».

Прочитайте эту книгу целиком, купив полную легальную версию на ЛитРес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.