Wilhelm König - A Gosch wia schwärt

Wilhelm König

Saga

A Gosch wia schwärt Copyright © 1976, 2019 Wilhelm König und SAGA Egmont All rights reserved ISBN: 9788711731383

1. Ebook-Auflage, 2019

Format: EPUB 2.0

Dieses Buch ist urheberrechtlich geschützt. Kopieren für gewerbliche und öffentliche Zwecke ist nur mit Zustimmung von SAGA Egmont gestattet.

SAGA Egmont www.saga-books.com und Lindhardt og Ringhof www.lrforlag.dk

– a part of Egmont www.egmont.com

i woeß et

waa dees ischt

miad bee-e et

hongr hao-e koen

i ko saua

wia noh abbar

wenne wett no

keede beschtemmt

ao fliaga

abr i will et

i will garet

so hao naus

s dääbmr schao langa

wennes do honda noh

a weile aushalta keed

abr s siit et drnooch aus

i wiir miad

i friß schao ällas

waamr vor d gosch kommt

ond am liabschda geenge

gar nemme ussm haus

i woeß et

waa dees ischt

s oobst em kern vrfaualt

dussa vrreggad beem

em faß

goot dr mooscht omme

abr uff oemool

isch dees et komma

sisch midr zeit so komma

ond ets isch halt do ond so vill

dasses bald nemme

schlugga ko

Waa kommsch?

Wa witt?

Ets goosch ond holesch

waadr fäält

no kommsch ond nammsch

waade brauchsch

Sisch a guata Wält

sisch a baesa Wält

abr sisch mei Wält

Isch koe guata Wält

isch a baesa Wält

ko-ase jo bessr macha

Wenne abr schaffa soll

muaße freile ao

abbas dsassat hao

Oen noolao

oen uff saen Bladds noohogga lao

oen hogga lao oen noolao and

Schalthebl der Macht

bis dranoo oen lao

Beir Bolizei oen noolao

oen ozaega bei sälle

mos et wissa daffat

waama boosgat hot

Nohlao mitm Breis

No lao wennse gar niks

drfiar zaala wellat

wennse blooß mitr Hood

drenrommdalga wellat

Oen dro lao wennr sae Sach

räacht macht ond gmacht hot

oen no lao wennr bessr ischt

odr blooß domm rausschwäddst

a Bild an dr Wood

a alta Dabeet dro lao

a Regiirong an Schultes

s Weib am Häard

Oen wäggdua

an guata Epfl an Zäamarkschae

vom groaßa Haufa namma

Oone oen nia gao

oone oena oone oes

oone Schirm oone Daschamässr

oone Personalausweis

oone druffdsguggat

wäar sischt waa sischt

Et annen nookomma

et no komma wenn

ällas dschboot ischt

Nooheeba s Broot

an Briggl Floesch oen

no heeba wennr zuaschnabbt

dassr nemme beißa ko

Ettafall schtoot

en dannr Schbrooch

ao et mae ond et wenigr uffm Schbiil

als en jedr andra Schbrooch

ettafall bees

äwwl blooß i

Sisch et wäaga damm

sisch wäagade Leit

wäaga sällam

keebmas gao lao.

I haerde i Siide

i schmeggde

dees muaßdr langa solangde

noh et zaala ko

Aescht wenne

mei Gäld kriag

firs Senga vorde Leit

am nägschda Aeschda

uffdr nägschd Leich

beir nägschd Haozich

No reegde oo

ond no haerde ao

no siide

no schmeggde

Abr et

Omasonscht

So koma d Epfl ao raadua

ma säagat da Boom

oefach omm ond liist

d Epfl vom Booda auf

D Kiischa frissma

schao uffdr Loedr

blooß wenns ausgeit

vrkaofma a baar Grädda

Abr et weilma abbas

vrdäana wett drmit

halt damma nochr koe

Arbat hot midm fortkeia

Uff dia baar keems jo no

ao nemme oo – sovl

nammt dr Weed raa –

abr dammas keed hot

So koma s Läaba ao rommbrenga

nochdr Schual

schiggma d Kendr glei ens Gschäft

dasse abbas vrdäanat

ällas andre kommt nochr

s Weib d Schwiigrleit ond d Jonge

So koma mitnandr ao auskomma

ma geit oem a Gschäft

schtelltn anna Maschee noo

zaaltn hia ond do iibrtarif

em Juni/Juli machtr mit Weib ond Kendr

drei Wocha Urlaub

oemads odr dahoem

maeschdens abr do henna odr do hooba

bei de Schwaaze ond Braone

no machtr weitr

mo-ar aufghaert hot gscheitr

ischtr jo noh et woara

I dääd jo meine nägschde

Schulda zaala vore nuie mach

wenne gwiiß wiißt

oob dees ällas ischt

waas do uffme zuakommt

S Oobst isch honda

zaalt aagwooga ond

vrdoelt and Ässr

Ets send Beem wiidr alloe

wia d Kia

nochm Mälga

daffatse iare Eitr

brav aezia

Abr saagens: saagens

se solles hussa lao

d Leit waarte blooß druff

oenr miaß da Ofang macha

No heebatse da Schwanz

vrdräat d Aoga

pfeifat uff d Hernr

lant ällas wia sisch

Ets goots a baar so

wianens äwwl ganga nischt

se wiißde sowiso niks bessrs

Andre goots so

wianens äwwl noh gao muaß

weilses et andersch wellat

Waa niddsdr

schao a Geburdsdaag

wennde et

gscheitr wirscht?

Haeland saage

will fluacha

will graad nochr langa

no schleet dees Luadr

mide Fliigl

ond seddst sich

aescht räacht

uff mein Grend ond dees

fir lengra Zeit

Verstärkter Druck auf Faßbierpreise

– i saag jo!

Hao-es et gsaet?

Dia machat mit ons

waase noh wellat

abr ets langabmrs

ets drengge Wei

Jo no

glaobe dees

ao noh

A Schächtale

fir vrdorbane Witz

(wuud oemool

endr Woch gläart)

a andrer Ausdrugg fir Fäachta:

Räachthao ond Räachtkriaga

Nui en Bättlmoos Beitl

isch däar Muat

zom Weitrgao ond dui Wuat

uff gschwollane Fiaß

Schaltrschtonda ond Betriibs-

Schtillegonga

Nui en Bättlmoos Beitl

isch a Hood vool Pfennig

zom Rausgee uff a Mark –

Adressa zom librnaachta

Briaf vo andre Bättlleit

a Schrift

wias dia gmacht hant

mo ets dia milda Gaba ausdoelat

ond nemme sae wellat

waase amool gwäa send

Nul en BättImoos Beit

dia Fliach, dia Blee

fir Friidenszeita

dia Ooweisonga

zom Wiidraufbau

– nemme sovl Schbrich

mae Ooschbrich

wenigr Schempfwertr

drfiar Nodizbiachr:

Jeder schreib ets doo

saene Aefäll selbr auf

vorse vrlaora gant

odr vo andre iibrsäa want…

Do ischtr jo friar

niks anders iibrigbliiba

als gefäachta gao

wenndede hoscht

iibr Wassr halta wella

bei danne Breis

bei danne

anhaltende Niidrschlääg

Gooscht? Gooscht?

Hosch schao gnuag?

Gnuag vom Gschäft

Gnuag vom Gschdangg

Gnuag vom Biar

Gnuag vom Wei –?

Hosch d Noos

schao vool –

vode Leit

vom Frialeng

vom Wentr

Vo damm Land

vom Näabl

vor Sonn

vor Wuuscht

vom Broot?

Gooscht? Gooscht?

Hosch schao gnuag?

Gnuag vom Noschtao

beim Beggr

beim Meddsgr

beim Schiffa?

Gnuag vom Soecha

Читать дальше