епископ Арсений Уральский - Книга об Антихристе и о прочих действах иже при нем быти хотящих

Брашно же зде глаголет не духовное, но чувственное брашно. Понеже сам той святый Ефрем о антихристе выше рекл глаголя: «Вонмите братие великую злобу зверину, ков и лукавство, яко от чрева начинает, да егда кто оскудеет брашна лишен, то понудится печать его прияти». А яко всячески сие глаголет о чувственном брашне, отсюду познавается: понеже он приведе уподобление прельстившагося в пустыни Израиля исходяща от Египта, егда чрез Валаама постави Валак жены безстудныя пред людьми, и трапезы исполни треб и жертвы пред враты. Сие же уподобление привед, потом и сия будущая рече: яко от чрева начинает, и прочая. Темже отсюду явственно показует, яко не о духовном, но о чувственном брашне сие сказует.

Тогда ли уже многая пища, или наслаждение, в таковыя богопопустныя раны, о нихже выше с начала главы сея от Апокалипсиса объявихом. Или якоже святый Ипполит сказует: «Егда небо не даст росу свою, облацы не дадят воду, земля отвержется плодов своих, море исполнится смрада, рыбы его изомрут, реки изсохнут, блата изсякнут, студенцы оскудеют, зверие на человеки востанут, скоти и четвероногая помрут, человецы от глада и жажди скончаются, отец сына объем и мати дщерь, вкупе умрут, и не будет погребающаго их: но и земля вся от телес повергнутых умерших смрада исполнится. Море же не приемля речныя струи смраду подобие возсмердится, и зловония безчисленнаго и гнуса исполнится. Тогда глад крепок по всей земли, тогда рыдание неутешно: тогда плач безмерен, тогда стонание непрестанно. Тогда ублажат человецы мертвых, глаголюще к ним: отверзите гробы ваша к приятию утомленных нас сродник ведомых. Блажени вы, яко не видесте дни сия. Блажени вы, яко жизнь сию не достигосте видети, ниже глад сей неутешимый, ниже нужду сию обдержащую душа наша». И егда вся сия будут, то кая может быти тогда сласть или пища, при таковых скорбех воистинну неизреченных. Сего ради и влепоту тем же святым Ипполитом речеся: яко тогда все земное рыдание, и плач утехи неимеяй.

Ныне же нецыи мудрствуют, аки бы сим чувственно не быти, но все сие разумеют таинственно сицевым подобием: мнят убо еже зде святым Ипполитом и прочими писании реченное: небо аки бы Церковь есть, облацы – учители церковнии, роса и вода – учение церковное, земля же – человеки, рыбы в мори – души человеческия в мире сем, иже умирают духовною смертию, зане не имуще воды живы, рекше чисты, сиречь учения благочестна.

Сие разумение аще и правдоподобно мнится быти, обаче не истинно есть. Понеже аще будут они тако разумети, то не точию от других писаний и обстоятельств, но от самех таковых разумений явственно покажется, яко о истине погрешиша. В других убо местех писания в другом разуме и вещи приемлются сия тако. Зде же у святаго Ипполита, подобно и у прочих, не имать места тако разуметися. Ибо откровенно признается сим показанием. По мнению убо таковых: земля – человеки, а море – мир сей, яве яко те же человеки. Ибо аще мысленно толковати, то море – мир не о четырех стихиях долженствует глаголати, имиже состоится мир сей: но о человецех, в мире живущих. И паки скоты и четвероногая помрут, и сие аки бы не о скотах речеся, но о человеках скотски живущих. И паки, человецы от глада и жажди скончаются. Что же убо? Мнят тии землю – человеки, рыбы – человеки, скоты – человеки: и паки самые человеки тоже человеки. Темже отсюду яве показуется, яко не справедливо сих таковое толкование, но поистинне погрешительно есть. Понеже аще бы святый Ипполит разумевал сия по духовному смыслу, то почто бы трижды нарекл человеков, рекше, чрез землю, чрез море, чрез рыбы: и по сих паки четвертое тех же человеков нарицал бы человеками, рекий, и человецы от глада скончаются. Аще ли же человеков яве называет человеками, то почто ему под другими именами тех разумевати. Темже отсюду явственно открывается, яко то святый Ипполит сказует не о духовных, но о всех чувственных, якоже о стихиях, о воде и земли, тако и о прочих вещех, сиречь о рыбах и реках, о человеках и о скотах, и четвероногих. Рече бо, и четвероногая помрут. Кто же суть сия четвероногая? Души ли человеческия? Никакоже. Что бо таковаго неистовства будет нелепейше! Но сие разумеется яве о чувственных четвероногих: подобно и о прочих всех вышереченных. Понеже убо зрится в божественном писании, яко тогда всякое сотворение превратится, склоняющися ко всеконечному потреблению. Ибо и сам той святый Ипполит мало выше в том же слове рече, яко тогда и сами стихии своего чина отвергнутся. И Апокалипсис являет тогда разрушение чина тварнаго (зач. 19). И синоксарь в Неделю мясопустную глаголет: «И тогда глад будет велик, вещем всем превращающимся, яко потребитися вмале убо всем». И еще выше речено, яко тогда злато и сребро много, и повапленныя ризы никому же на пользу будут в скорбь ту великую» (Ефрем Сирин, слово 105). О каких же сие речеся ризах, и злате и сребре? Или кто мнит, яко сие речено о духовных, сиречь, акибы злато убо есть учительское слово, такожде и сребро? Ризы же заповеди Божия и святых отец добродетели?