епископ Арсений Уральский - Книга об Антихристе и о прочих действах иже при нем быти хотящих

Но опаснаго ради ведения потребно есть зде и от бесед еже на Евангелие святаго Иоанна Златоустаго воспомянути, глаголющаго сице: «Евангелие. Якоже бысть во дни Ноевы, ядуще и пиюще, женяшеся и посягающе, до негоже дне вниде Ное в ковчег и не уведеша, дондеже прииде вода и взят вся. Тако будет и пришествие Сына человеческаго. Толкование. Сия же рече, являя яко внезапу приидет и неначаянне, и множайшим в сластех живущим. Ибо Павел о сем тако глаголет, егда рекут мир и утвержение, тогда внезапу нападет на них всегубительство. И яко то будет нечаянно, являя глаголаше, якоже болезнь во чреве имущая. Како убо рече по скорби дней онех? Аще бо наслаждение тогда и мир и утвержение, якоже рече Павел: како убо глаголет, по скорби дней онех? Аще наслаждение, како скорбь? Наслаждение не чувственне пребывающим и мир. Сего бо ради не рече, егда будет мир и утвержение, нечувствие их показуя, якоже бывших при Нои, егда в таковых злых наслаждахуся. Праведнии же не тако, но в скорби и печали они пребываху. Отсюду показуется, яко антихристу пришедшу, безместныя сласти умножатся в законопреступных и своего спасения отчаявшихся. Тогда чревообъядения и козлогласования, тогда пиянство. Темже наипаче указания полагает приличествующее вещи: якоже бо ковчегу бываему не вероваху, рече, но предлежаше ковчег посреде, будущая предвозвещая злая: тако и ныне, аще и явится антихрист, по немже скончание и мучения нестерпимая, обаче пиянством злобы одержимии, ниже страх ощутят быти имущих. Темже и апостол рече, яко болезнь во чреве имущей, тако им предстанут страшная она и неизбежная» (на Матфея беседа 77).

Подобно сему и во Апостоле толковом сице сказуется: «Апостол. Егда бо рекут мир и утвержение, тогда внезапу нападет на них всегубительство: якоже и болезнь во чреве имущая, не имут избежати. Златоуст. Сим являет второе пришествие Господа нашего Исуса Христа, хотящее неначаянно приити судити живых и мертвых, еже и Христос рече: якоже бяше во днех Ноевых, ядяще и пиюще, женящеся и посягающе, дондеже вниде Ное в ковчег и не уведеша, дондеже прииде потоп и взят вся. Тако будет и пришествие Сына человеческаго. И паки, якоже болезнь во чреве имущая. Сия рече, являя яко внезапу приидет нечаянне, и множайшим питающимся и во благодеянии живущим, и вам напаствующи и не чающи приити концу, но всяко приидет. Какоже внезапу приити погибанию солнцу? Прежде приити антихристу вещахом, концу бо знамения сия, пришествию же Христову не есть тако, внезапу бо приидет, и Той воздаст комуждо по делом его. Добре же указ положи от имущия во чреве, ибо и та знамения рождению имать, дня же и часа не весть? Аще тогда мир и утвержение, како глаголет Христос: по скорби дней онех? Аще бо пища тогда, како скорбь? Пища нечувственне пребывающим и мир. Сего ради не рече, егда мир и утвержение, но егда рекут мир и утвержение, нечувствие сих показует, якоже и при Нои сущих» (Апостол толковый, зач. 271, л. 884).

Выше речеся во Евангелии, якоже при Нои внезапу прииде потоп и потопи вся, тако будет, рече, и пришествие Христово. Обаче ведети надлежит, бысть ли внезапу всем той потоп во дни Ноевы? Никакоже. Но бысть он внезапу того ради, и тем токмо, иже не прияша наказания Ноева, еже он предвозвещаше и прещаше словесы и ковчегом. Аще бы они тогда пришедше в чувство прияли его претительное наказание, то не бы было им внезапу. Тако и во время будущее, аще кто приимет наказующее священное писание, и пророческую Илии и Еноха проповедь, то сим не будет внезапу: но токмо тем будет внезапу, иже имети будут злый и жестокий и нечувствительный нрав, иже и ничему веровати не имут, ни писанию, ни пророчестей тогдашней проповеди, ниже богопопустными наказательными ранами уцеломудритися восхощут. Но будут, рече, яко фараон, паче же и сего жесточайше (Апокалипсис толковый, зач. 52): и таковым поистинне будет внезапу.

А яко потоп Ноев не бысть просто внезапу, о сем сказует Иоанн Златоустый, глаголя: «Слышасте ли вси о потопе, егда и оная прещения ради рекошася, или сбышася и быша. Сицевая и онии многая глаголаху: и в сто летех ковчегу созидаему, и древесом устрояемым, и праведному вопиющу, никтоже бе веруяй» и прочая (8-е нравоучение на 2-е послание к солуняном). И паки той же, в 1-м послании к Тимофею, в нравоучении 15-м, сказует: «Яко о потопе предречено было прежде множайшаго времени тогда». Еще же в послании к Филимону в нравоучении 3-м, и в послании к евреом в беседе 23-й сказует: «яко было тогда прещение людем прежде потопа, но они не убояшася, но и Ной посмеян и поругаем бысть тогда». И преподобный Ефрем в книзе своей в слове 8-м сказует, глаголя: «яко во дни Ноевы ядяху и пияху, женяхуся и посягаху, и купли творяху, дондеже прииде потоп и погуби вся. Дивно бо бе тогда воистину видети вещь ту страшную братия моя. Зряще дивияго живота собираема во едино место: слоны от Индии и Персиды грядуща, львы же и рыси со овцами и козами смешены, и коегождо их друг друга не вреждая. Гади и птицы пернатыя, никомуже гонящу их, грядуща, и окрест ковчега водворяеми. И се по днех довольных самому Ноеви потщавшуся уготовати ковчег, и к ним вопиющу: покайтеся, и не внимаху: ни зряще собора безсловеснаго живота, не покаяшася, да быша спасени были».