епископ Арсений Уральский - Книга об Антихристе и о прочих действах иже при нем быти хотящих

ПРИСТИЖЕНИЕ. Выше писахом, наипаче же во главе сей почасту напомянушася некая новопредания, рекше триперстное знаменование на лице своем, подобно и иная некая нововводства и ереси: да не возмниши, акибы мы оная похваляем или приимаем. Сего ради извещательне изъясняем, да не будет на нас блядивое то порицание, понеже и слышати не терпим в том обретатися. Но еже святая соборная и апостольская Церковь предает или приемлет, тому преданию и мы последующе, все оное приемлем и облобызаем: а еже та отверже и прокля, тое и все и мы отреваем и проклинаем. Зде же вышеписанная нововводства причиною напоминахом, не яко похваляюще или оправдающе, но истиннолюбно священным писанием объявляюще, яко оная не есть печать антихристова, но просто новости или заблуждения, или ереси суть и разумеются, якоже показуют вся вышеписанная свидетельства и доводы.

Во время убо антихристова на землю пришествия не от антихриста токмо постраждет человеческий род, но наказан будет и богопопустными язвами, или богогневными муками, якоже и выше в знамении пятом речеся. Егда Енох и Илия имут затворити небо от дождя и преобратити воды в кровь, и поразити землю всякою язвою, елико аще восхотят. Таковыми язвами тогда уцеломудряя Бог человеческий род, от тела и души сугубе сотворенный: ово убо напаствуя и казня, ово же милуя и щадя. И о сем повествует возлюбленный ученик Христов Иоанн Богослов во Откровении. Словеса коего приведем с толкованием Андрея Кессарийскаго по киевскому изданию Апокалипсиса: «И по сих видех, и се отверзеся храм скинии свидения на небеси, и изыдоша седмь ангели, имущии седмь язв». Ниже: «И едино от четырех животных даде седмим ангелом седмь фиал златых, исполненных ярости Бога, живущаго во веки веком». Ниже: «И никтоже можаше внити в храм, дондеже скончаются седмь язв (седми) ангел (зач. 45). Толкование. Отсюду непщуем, яко донележе негодование божественное нечестивых не разлучит праведники (от неправедников), никакоже святии получат жребий в небеснем Иерусалиме, и священнодейство и покой в храме Божии. Подобает бо скончатися (глаголет) язвам, имиже мздовоздаяния греховная достойным подаются. И сии изволенный им получат ответ. Посем сице дано будет обитание святым в горней митрополии. Куюждо же язв обретающимся в кончине примиряяй кто, не погрешил бы (мню) подобающаго, человеколюбец бо сый Бог, к ежеумалити безконечныя муки в будущем, и в настоящей жизни достойным попустит да наведены будут чрез Еноха и Илию пророка мучительныя язвы, и чрез припадающия болезненныя от браний противомерному согрешенных возмездию».

Зачало 46. «Сущее. И слышах глас велий из храма глаголющий седми ангелом: идете и излияйте седмь фиалы ярости Божия на землю. И отыде первый ангел и излия фиалу свою на землю: и бысть гной зол и лукавей на человеки, имущия начертание зверево, и на покланяющияся образу его. Толкование. Фиала зде, якоже и чаша, вместо мучительнаго действа приемлется, ейже глаголет от ангела излиянней, гной лукавей бысть, аки млеко ссело, в сердцы болезнь трясущуюся знаменующий, бывающую в сердцах отступничих, егда богопопущенными язвами биеми ни едину же цельбу от обоготвореннаго ими антихриста получат. Подоболепно же яко и чувственне сих уязвляются телеса, на обличение гнойныя их душа диавольскими прелести стрелами лестьчими (и антихристовыми и отступничими).

Зачало 47: «Сущее. И вторый ангел излия фиалу свою на море, и бысть аки кровь мертвеца, и всякая душа живая умре в мори. Толкование. Не велие есть божественней силе (и) на обличение немощи антихристовы, и на удобство прельщаемых, святыма пророкома Енохом и Илиею преложити море в кровь аки мертваго, сиречь, аки закланнаго, и тлю содеяти сущих в нем, якоже древле во Египте чрез Моисея сотвори». Ниже: «Яко да известнии в вере вжилятся, и неутвержденнии убоятся, зряще тварь ополчающуюся им о чести губителя». «Сущее. И третий ангел излия фиалу свою на реки и на источники вод, и быша в кровь. И слышах ангела вод глаголющаго: праведен еси сый, и иже бе, преподобие, яко сия судил еси. Занеже кровь святых и пророков излияша, и кровь дал еси им пити, достойни суть. Толкование. И отсюду показуется, яко ангели учинени суть над стихиями, якоже и горе речеся, из нихже единаго (суща) и иже на водах, глаголет, яко воспевает Бога, о наведением по достоянию осуждении на преступники, яко осквернившим руки кровьми святых, кровь к питию даде. Показуется же чрез сия, или еже мнозем сподобитися во времени оном, твердым в вере стоянием, пророческаго дарования, и убиенным быти от диавольских защитников: или (сие) яко отвращающийся божественных пророк проповедания, и оправдающе их убиение от жестосердых иудей, предложением общницы бывают заклания их».