Salvatore Di Giacomo - Assunta Spina - In due atti

Scusi, ha visto passare il giudice Bernardi?

Nonzignore.

Volete 'o giudice Bernardi?

Per favore!

Sta abbascio 'o cafè. S'è sospesa l'udienza.

Oh! Grazie sa! (via per la destra).

'A vedite chella signora? 'A sera, a San Carlo, canta dentro agli Ugonotti. E 'a matina vene cca ncoppa…

E mena stuccate.

Don Diodà! (Sgueglia si volta). Potete venì nu mumento qua?

Pronto! (a don Peppino) Permettete? (s'alza e va in fondo).

Oi cumpare Tumaso!

Oi cumare Santella! E che ce state a fa ccà ncoppa?.. Pe Micalangelo ce state?..

E buie che ce state, neh, cumpare Tumaso?

Mbè! pe testimmone. Ccà stace pure lu prèvete 'e Santa Zufia.

Addo' è ca 'o voglio vasare la mano! (alla villanella) Menechè, ce stace pure lu prevete 'e Santa Zufia!

E tu che faie ccàne? (alla cafona che gli bacia la mano).

Pe Micalangelo, parrucchià!

Parrucchià, nun buttate! (va a sedere alla sua tavola).

Causa Mazzucchelli! I testimoni!

Uh, Mamma Ncurunèta! E chesta è 'a causa 'e Micalangelo, parrucchià!

E va, va, a nomme de Dio!

Uh, aneme de lu Priatorio! E purtatemmillo nzarvamiento! Uh, Micalangelo mio!.. (entra nella 8.ª Sezione. Il prete v'entra anche lui).

Michele Boccadifuoco , dalla destra, in mezzo a due carabinieri, ammanettato. È un uomo sui trentacinque, alto, robustissimo, pieno di forza. Un terzo carabiniere allontana la folla che segue Michele . Nella folla sono Filomena , Furturella e Tittariello .

La folla nella sala tace, curiosa.

Passaggio! Passaggio!

Sie' Filumè?.. Addo' sta?..

Sto ccà.

Mamma addo' sta?

Sta ccà: sta venenno appriesso…

Tenitevella mmiezo a bbuie!

Stateve a penziero cuieto.

Furtù!

Avanti!

Nu mumento, brigadie'! Pe favore!

Don Miche', che bulite?

Teniteve a mmamma mmiezo a bbuie! Datele chiacchiere!

Jammo cu stu detenuto!

Avanti!

Jate! Lassate fa Dio ca è cosa 'e niente! (a Filomena) Ah, Signò! E ched'è? 'Onna Cuncetta è rummasa abbascio?

Sta ccà. Chella è gravante e nu' po' correre.

Sta saglienno 'a gradiata chiano chiano. 'A vedite lloco…

Ah, Mamma d' 'a Libbera! Io si nun moro stammatina nun moro cchiù!

E assettateve! (a Sgueglia) Neh, signori mieie, ce putite favurì na seggia? (prende una sedia dal tavolo di Sgueglia).

Bella figlió, ca ccà 'e segge ce servono!

E ba buono, me', pe favore… (a Concetta) Assettateve. Curaggio, curaggio!

E che guaio niro, neh, che guaio niro ch'è chisto!

Avite raggione! Ma vedite, io mo ve vulesse dicere na cosa… (si volta e prende un'altra sedia) Già, vuie sapite (siede) ca io so chiara e sincera e chello che tengo mmocca tengo pure…

Dentro al cuore. Bella figliò, v'avite pigliata n'ata seggia!

'O ssapite, si nun 'o ttenite p'offesa mo v' 'e pavammo sti segge!

E che stammo int' 'a cchiesa?

Va bene, prufessò. Mme pare ca mo vi fate troppo a ttenere per una picciulezza di nisciunissima cunziquenza!

È vero?

Ci vuole un poco di sciordezza!

Ma, vedete, io sta sciurdezza…

E va buono me! È cosa 'e niente… (sottovoce a Sgueglia) (Nun 'o rispunnite) Signo', aggiate pacienza!..

Anzi! Vi prego. Fate 'o comodo vostro. Volete un'altra sedia?

Cerini volete!

Vattenne! (Mo mm' 'a sconto c' 'o cerenaro)!

Addo' se fa, sta causa?

Là, rimpetto.

E ched'è? Già è accumminciata?..

Tittarie', trase, va vide!

Michele addo' sta?

È trasuto llà dinto.

Allora è accumminciata?

I testimoni, fuori!

Uh, Mamma d' 'a Libbera! Io t' 'o metto int' 'e mmane toie miraculose! Avummaria e grazia plena! E dominus teche… (borbotta) E nunche et in ore…

E mortissi nostri!..