Леў Сапега - Статут Великого княжества Литовского 1588 года

О листы заручные.

Теж обецуем и маем давати о беспечность здоровя подданым нашим шляхте за похвалками и звазненьем чиим кольвек противко их на кождого з великих и ровных аж до низших станов с канцляреи нашое листы заручные и закладу на них казати описовати межи шляхтою з обу сторон особ собе ровных; маеть быти заклад або зарука покладана так великая, якое жалобная сторона потребовати будеть, аж до десети тисечей коп грошей. А где бы шляхтич против особы стану вышшого и можнейшого заручного листу потребовал, таковому маеть быти зарука в листе описана, также великая аж до десети тисечей коп грошей. А тая зарука покладана быти маеть в листех заручных о обеспечность здоровя самых особ шляхетских. А хто бы, за похвалкою або звазненьем своим обнесен будучи врядовне листом нашим або вряду нашого заручным, а через тот заклад наш кого сам або з направы своее через кого кольвек иного забил, тогды с права за слушным доводом горлом маеть быти каран без милосердья, хотя бы и на горачом учинку не был пойман. А тое заруки, на листе описаное, половица на нас, господара, до скарбу земского великого князства литовского, а другая половица на дети, потомки або близкие забитого и на именью противного отправлена быти маеть без жадное фолькги. А хотя бы хто и не забил, але предсе ранил або бой через заруку учинил, тот также у заруку упадываеть. А навезку водлуг стану и шкоды за доводом слушным платити будеть повинен. А тое заруки также половица нам до скарбу земского, а другая половица стороне жалобной отправлена быти маеть. А ведь же где бы шляхтич, в заруки попалый, так много маетности лежачое и рухомое не мел, на чом бы тая вся зарука отправлена быти мела, ино, колько ж маетности мети будеть, тое половица до скарбу земского, а другая половица стороне подана быти маеть, а остаток заруки на особе самой водлуг порядку сего статуту отправлено быти маеть. И не маем никому таковых закладов отпускати, а то для завстегненья своволеньства и злости людское и для захованья покою посполитого. А если бы тот, которий заруку вынес, сам або з направы своее через кого кольвек иного забойство або зраненье оному, на кого заруку взял, учинил, тот сам такою ж виною маеть быти каран. А в небытности нашой в здешнем паньстве воеводове и старостове судовые, где книги лежеть, будуть мочи листы заручные под печатьми своими шляхте давати по тому ж, яко вышей ест описано. А на воевод, старост судовых в небытности нашой в том паньстве великом князстве литовском вряд наш земский судовый листы заручные и кромя роков судовых шляхте давати маеть под такими ж заклады. Ведь же то предсе варуем, иж где бы и по вынесенью заруки трафилосе то, жебы слуги, бояре, подданые обеюх сторон где на торгу, на дорозе або в корчме, в небытности панов своих повадившисе, промежку себе забойство або бой, раны одна сторона другой учинила, ино одна сторона другой под заруки не подлегаеть, одно справедливости неотволочное поступком права доводити собе мают. А естли бы которая сторона при обжалованью своем того правне довела, иж самой особе его обельживость, зраненье, бой альбо забитье сталосе, особе, убеспечоной заклады, тогды позваный где бы слушный довод противко нему не показалсе, близший будеть отприсегнутисе, же то без росказанья и ведомости его сталосе. Вед же с тых слуг и подданых своих, которые помененый о тот выступ маеть ставити на том вряде, и заразом справедливость з них укривжоной стороне чинена от вряду быти маеть, и подле заслуги коранье онесуть с того ж вряду. А где бы шло не о тую особу, которим заклады служать, але о слуги и подданые, жебы се таковый бой або забойство стало з волею оного, тогды за доводом и переконаньем правным навезка и головщизна трояко маеть быти плачона водлуг стану кождого с таковых укривжоных.

О отповедникох неоселых.

Теж уставуем: хто ж колвек неоселый, будь тубылець панства нашего, великого князства литовского, яко и чужоземец, кому теж кольвек иншому отповедь обличне або через лист, або теж заочне учинил, таковый отповедник мает быти поставлен через заказанье от нас, господара, або вряду замкового або земского перед правом, где бы колвек при котором вряде то се деяло. И естли бы тот оное отповеди перед врядом на него довел водле права, то ест будь то писмом его властное руки або сведецством трох або двух шляхтичов, тогды таковый отповедник неоселый маеть быть на замку нашом посажон и седети маеть дванадцать недель. А вед же, и выседевши дванадцать недел, не маеть быти с того везеннья выпущон, аж первей себе рукоемством уистить, абы тот, против кого отповедь чинил, в покою от него был. А где бы жалобник доводу писмом або светками на тую отповедь мети не мог, а ку присязе бралсе, тогды обжалованый близьший будеть отприсегнутисе и от того волен быти маеть, же ему не отповедал.