авва Дорофей Array - Аскетика. Том I

Вопрос 722.Аще обедаю с некиими от отец, и благословит кто от них предлежащую пищу, еда должен есмь, хотя вкушати, глаголати ему: благослови, и пождати, донележе паки благословит мне или доволен быти первым благословением? Понеже случается, яко инуде имать ум свой и коснит отвещати, и присно скорблю. Еда же ли добро есть, да, егда положу руку на пищу, запечатлею ю, рекше назнаменую крестным знамением.

Ответ.Единою благословил есть; излишне убо есть сие. И ради еже запечатлети, ниже сего потреба есть. Благословение бо печать есть. И паки да не даси помысла благословившему, или иному кому, аки не веруяй благословению того, и будет то в соблазн.

Вопрос 723.Аще понуждают мя отцы к нимже прихожду, благословити предлежащую пищу, послушаю ли их, или ни?

Ответ.Да не послушаеши, глаголя: ниже причетник есмь, ниже образ иноческий ношу, но человек есмь мирянин, и грешен, и превосходит меру мою сие; но простите мя Господа ради.

Вопрос 724.Аще миряне будем вси сущии на трапезе, что сотворим не имуще благословящаго?

Ответ.Добро есть и миряном приемлющим пищу благословити Бога: памятию бо Божиею пища освящается. Сие же благословение несть, якоже благословение причетническое: но славословие есть, и память Божия. Всем бо лепо есть поминати Бога и славословити Его. Добро убо есть и мирским сие творити, аще не имут могущаго благословити.

Вопрос 725.Аще убо сумнятся, кто первее благословит, кийждо попущая друг другу, что подобает творити?

Ответ.Иже сих возбудивый к тому, должен есть просити, егоже хощет благословляюща, благословити. Егда же никтоже приимет то да не будет любопрение, должен сам восприяти и рещи: молитвами святых отец, Господь да сотворит с нами (милость). Аминь.

Вопрос 726.Понеже рекосте, яко добро есть и миряном поминати Бога в пище, да памятию Того освятится пища она: убо добро ли есть, не у положену бывшу хлебу на трапезе, предреченный стих глаголати и молитву?

Ответ.Можно убо сия рещи; но понеже в молитве глаголет кто: благослови предлежащая, добро есть и последовательно предлежащим хлебом глаголати молитву.

Вопрос 727.Аще глаголют ми отцы суд сотворити в некоем деле, и не зело надеюся на себе, что должен есмь сотворити? Отрещися ли, или прияти? И еже мнится ми рещи, или вопросити ведущих лучше, и тако судити?

Ответ.Повеления ради отец, приими, и рцы судящимся, яко по видимой мне правде имам судити. И блюди, еже прав имети помысл твой;

и да не уклониши сердца твоего к некоему по страсти, ниже по благоприятству; и правду, яже видится тебе, рцы. Произволение бо судит Бог, Иже Сам точно истину ведый. Аще ли же и возможеши вопросити ведущаго известнейше тебе, то не безместно есть.

Вопрос 728.Аще дело тое требует клятвы, уставити ли им, или ни?

Ответ.Никогдаже да установиши клятве от кого данней быти: Бог бо запрети клятися кому; но глаголи, яко дело сие клятвы требует. Аще убо хощете клястися, в вас есть. Аще ли же повелен будеши от большая власти судити, то понуди уставити клятву: сиречь полезная прежде известно испытав, и тогда установи, ничтоже сумняся.

Вопрос 729.Аще сежу близ человека старца, или велика лица чтуща, и погрешает в ударении, или речении, и вем аз тое правее: реку ли ему? или ни?

Ответ.Аще веси, яко с радостию послушает, то рцы: аще ли же ни, ничтоже да речеши ему. Внемли себе, да не возтщеславишися в помысле твоем. Полезно бо тебе молчати паче, нежели с тщеславием рещи что.

Вопрос 730.Ин христолюбец вопроси тогожде старца: аще инок просит мя пособити ему в некоей вещи, и не мнится мне быти по Богу: что сотворю?

Ответ.Аще несть по Богу, да не пособиши; но отступи от вещи тоя, глаголя ему самую истину: зане, якоже мнится мне, не просиши от мене праведная. Аще ли же есть по Богу, и не приносит ти яковаго вреда душевнаго, пособи ему по силе: будет бо мзда. Аще ли же будет тебе вред, да не влагаеши себе в вещь тую: не истязует бо тебе Бог сотворити вредящее душу твою.

Вопрос 731.Егда вижду кого досаждающа иноку, или обидяща его, смущаюся нань: убо добре ли творю, или ни?

Ответ.Ничтоже со смущением бываемое есть добро, но от действа диаволя с самооправданием. Аще убо смущаешися, ничтоже да речеши, понеже и онаго множае смутиши: злоба бо злобы не убивает. Аще ли же не смущаешися, рцы ему с кротостию: не боишися ли греха, без правды досаждая авве? Не веси ли, яко образ, егоже носит, Божий есть? И (яко) прогневается Бог? И тако глаголя, обретаешися по Богу глаголяй. Силен же есть Бог, якоже хощет, онаго укротити.