епископ Арсений Уральский - Книга об Антихристе и о прочих действах иже при нем быти хотящих

Четвертое, мерзостию запустения нарицается нечестие и ереси, иже сташа на месте святе в Божиих церквах. О сем сказуется в Большом катихизисе. «Вопрос. Чесо ради людие в последняя времена от веры отступят, и абие к ереси приступати имут? Ответ. Трех ради вин. Первая убо сия есть, еже Даниил пророк рече: мерзость запустения станет на месте святе, сиречь, еже обладает нечестивая ересь церкви святыя. Сия убо мерзость толкуется по писанию Иоанна Златоуста, воинство антихристово, разоряющее Церковь Божию. Тогда людие, не имуще где скрытися от таковых скорбей и великих мучений их ради гонения, приступати имут ко ересем» (Катихизис большой, гл. 4).

О мерзости запустения сие сказание в Катихизисе двояко может разуметися, сиречь и на время прошедшее и настоящее, и отчасти на время оное будущее. Однако наивернейши видится быти, яко сие не о той самой мерзости глаголется, яже при антихристе станет, которая от самого его произыдет, о ней же ниже покажется: но яве яко о иной, понеже сия мерзость, сиречь нечестие или отступление и ересь, антихриста предупреждает. И о сем в том же Катихизисе о знамениих сказуется сице: «Знамение 15-е, нецыи отступят от веры. 16-е, станет мерзость запустения, реченная Даниилом пророком на месте святе. 17-е, потом приидет антихрист» и прочая (Катихизис большой, гл. 23).

Пятое, есть и называется мерзостию запустения и самый той антихрист, еже Феофилакт святый толкуя на Матфея глаголет: «Нецыи мерзость запустения антихриста глаголют, разумеют же сице: яко иже на храмине, сиречь, иже на высоте добродетели, да не снидет от высоты добродетели взяти телесная. Подобает же и от села бежати, сиречь от земных» (Благовестник, от Матфея зач. 99).

Еще же к сим и тии, иже прелагаются от благочестия в нечестие, нарицаются мерзостию запустения: обаче гадательне и участие, преносне же и уподобительне тако разумеются. Нам же не о сих настоит слово, но о той истой мерзости запустения, яже хощет стати на месте святе во время антихристова пришествия, имать же сице.

Шестое, есть бо и нарицается мерзостию запустения кумир, или истукан антихристов, еже есть икона, или образ его, иже имать стати на месте святе, во святых Божиих церквах, не токмо во Иерусалиме, но и в прочих: понеже единому тому человеку антихристу разделитися и повсюду быти невозможно, не бо есть Бог и не сый всюду, но местом определяется, того ради окаянный яко льстив сый и коварен, вместо себе поставити всюду потщится свою таковую икону, сиречь образ подобия своего.

О сем повествует во Апокалипсисе великий во апостолех Иоанн Богослов, емуже Духом Святым открыся вся сия хотящая быти. Сказав убо о лжепророце, хотящем тогда при антихристе быти и велия чудеса сотворити, потом же сице о нем рече: «И льстит живущая на земли ради знамений, яже дана быша ему пред зверем творити, глаголя живущим на земли, сотворити образ зверя, яже имать язву оружную и жив бысть. И дано бысть ему дати дух образу зверину, да проглаголет икона зверина. И сотворит, да иже аще не поклонится образу зверину, убиен будет» (Апок., гл. 13). От толкования. «Сей заступник антихристов ничтоже кроме демон содеет: сотворит бо образ звериный, и покажет й глаголюща, дабы прельстил люди: осудит же избивати, иже ся ему не поклонят». И во Апостоле толковом в зачале 150-м святый Иоанн Златоустый глаголет: «Еще же беснующеся глаголют еретицы, яко литургия есть мерзость Божия, яже по писанию в царстве антихристове имяше стати на месте святем, но да возмут сполна словеса у Марка святаго, ибо тамо тако рече Господь, егда узрите мерзость запустения стоящу на месте святем. Да смотряем же и словес Даниила святаго, тако глаголет: от времени пременену учащения, дней 1290. Зриши ли, яко мерзость запустения не есть свята жертва любезна и приятна Богу, но спустошения ея, еже соделает антихрист пред пришествием Господним, свой образ на то место поставивши» и прочая (Апостол толковый, л. 549).

Отсюду познавается, яко не инако как сядет антихрист в Божиих церквах, но станет оная мерзость, сиречь истукан его, и не во Иерусалиме токмо, но и в других всюду Божиих церквах. О сем святый апостол Павел глаголет: «Яко ему сести в церкви Божии аки богу, показуя себе яко бог». Толкование Златоустово: «Не токмо во Иерусалиме, но и в церквах Божиих» (Апостол толковый, зач. 275). И в беседах глаголет: «И сядет в храме Божием, не иже во Иерусалиме, но и в церквах».

Якоже видится убо в писании некий древний обычай царский: «Внегда царю в начало на царский престол восшедшему и царским венцем венчану, образ подобен ему хитрецы сотворяют, сиречь икону его, и царю царствующу, образы его в митропольския грады, рекше в стольныя, вносими бываху, народи усретаху я, честь яко самому царю образу цареву вдаваху. Епархийским бо градовом видети царя разстояния ради многаго не возможно, и убо сего ради иконы царевы вношахуся к ним во грады» (Соборник малый, л. 16).