Robert Burns - The Complete Works

O death! thou tyrant fell and bloody!
The meikle devil wi’ a woodie
Haurl thee hame to his black smiddie,
O’er hurcheon hides,
And like stock-fish come o’er his studdie
Wi’ thy auld sides!
He’s gane! he’s gane! he’s frae us torn,
The ae best fellow e’er was born!
Thee, Matthew, Nature’s sel’ shall mourn
By wood and wild,
Where, haply, pity strays forlorn,
Frae man exil’d!
Ye hills! near neebors o’ the starns,
That proudly cock your cresting cairns!
Ye cliffs, the haunts of sailing yearns,
Where echo slumbers!
Come join, ye Nature’s sturdiest bairns,
My wailing numbers!
Mourn, ilka grove the cushat kens!
Ye haz’lly shaws and briery dens!
Ye burnies, wimplin’ down your glens,
Wi’ toddlin’ din,
Or foaming strang, wi’ hasty stens,
Frae lin to lin!
Mourn, little harebells o’er the lea;
Ye stately foxgloves fair to see;
Ye woodbines, hanging bonnilie,
In scented bow’rs;
Ye roses on your thorny tree,
The first o’ flow’rs.
At dawn, when ev’ry grassy blade
Droops with a diamond at its head,
At ev’n, when beans their fragrance shed
I’ th’ rustling gale,
Ye maukins whiddin thro’ the glade,
Come join my wail.
Mourn, ye wee songsters o’ the wood;
Ye grouse that crap the heather bud;
Ye curlews calling thro’ a clud;
Ye whistling plover;
An’ mourn, ye whirring paitrick brood!—
He’s gane for ever!
Mourn, sooty coots, and speckled teals;
Ye fisher herons, watching eels:
Ye duck and drake, wi’ airy wheels
Circling the lake;
Ye bitterns, till the quagmire reels,
Rair for his sake.
Mourn, clam’ring craiks, at close o’ day,
‘Mang fields o’ flowering clover gay;
And when ye wing your annual way
Frae our cauld shore,
Tell thae far warlds, wha lies in clay,
Wham we deplore.
Ye houlets, frae your ivy bow’r,
In some auld tree, or eldritch tow’r,
What time the moon, wi’ silent glow’r,
Sets up her horn,
Wail thro’ the dreary midnight hour
’Till waukrife morn!
O rivers, forests, hills, and plains!
Oft have ye heard my canty strains:
But now, what else for me remains
But tales of woe?
And frae my een the drapping rains
Maun ever flow.
Mourn, spring, thou darling of the year!
Ilk cowslip cup shall kep a tear:
Thou, simmer, while each corny spear
Shoots up its head,
The gay, green, flow’ry tresses shear
For him that’s dead!
Thou, autumn, wi’ thy yellow hair,
In grief thy sallow mantle tear:
Thou, winter, hurling thro’ the air
The roaring blast,
Wide, o’er the naked world declare
The worth we’ve lost!
Mourn him, thou sun, great source of light!
Mourn, empress of the silent night!
And you, ye twinkling starnies bright,
My Matthew mourn!
For through your orbs he’s ta’en his flight,
Ne’er to return.
O, Henderson! the man—the brother!
And art thou gone, and gone for ever?
And hast thou crost that unknown river
Life’s dreary bound?
Like thee, where shall I find another,
The world around?
Go to your sculptur’d tombs, ye great,
In a’ the tinsel trash o’ state!
But by thy honest turf I’ll wait,
Thou man of worth!
And weep the ae best fellow’s fate
E’er lay in earth.
THE EPITAPH
Stop, passenger!—my story’s brief,
And truth I shall relate, man;
I tell nae common tale o’ grief—
For Matthew was a great man.
If thou uncommon merit hast,
Yet spurn’d at fortune’s door, man,
A look of pity hither cast—
For Matthew was a poor man.
If thou a noble sodger art,
That passest by this grave, man,
There moulders here a gallant heart—
For Matthew was a brave man.
If thou on men, their works and ways,
Canst throw uncommon light, man,
Here lies wha weel had won thy praise—
For Matthew was a bright man.
If thou at friendship’s sacred ca’
Wad life itself resign, man,
Thy sympathetic tear maun fa’—
For Matthew was a kind man!
If thou art staunch without a stain,
Like the unchanging blue, man,
This was a kinsman o’ thy ain—
For Matthew was a true man.
If thou hast wit, and fun, and fire,
And ne’er guid wine did fear, man,
This was thy billie, dam and sire—
For Matthew was a queer man.
If ony whiggish whingin sot,
To blame poor Matthew dare, man,
May dool and sorrow be his lot!
For Matthew was a rare man.

There were five carlins in the south,
They fell upon a scheme,
To send a lad to London town,
To bring them tidings hame.
Not only bring them tidings hame,
But do their errands there;
And aiblins gowd and honour baith
Might be that laddie’s share.
There was Maggy by the banks o’ Nith,
A dame wi’ pride eneugh;
And Marjory o’ the mony lochs,
A carlin auld and teugh.
And blinkin’ Bess of Annandale,
That dwelt near Solway-side;
And whiskey Jean, that took her gill
In Galloway sae wide.
And black Joan, frae Crighton-peel,
O’ gipsey kith an’ kin;—
Five wighter carlins were na found
The south countrie within.
To send a lad to London town,
They met upon a day;
And mony a knight, and mony a laird,
This errand fain wad gae.
O mony a knight, and mony a laird,
This errand fain wad gae;
But nae ane could their fancy please,
O ne’er a ane but twae.
The first ane was a belted knight,
Bred of a border band;
And he wad gae to London town,
Might nae man him withstand.
And he wad do their errands weel,
And meikle he wad say;
And ilka ane about the court
Wad bid to him gude-day.
The neist cam in a sodger youth,
And spak wi’ modest grace,
And he wad gae to London town,
If sae their pleasure was.
He wad na hecht them courtly gifts,
Nor meikle speech pretend;
But he wad hecht an honest heart,
Wad ne’er desert his friend.
Then wham to chuse, and wham refuse,
At strife thir carlins fell;
For some had gentlefolks to please,
And some wad please themsel’.
Then out spak mim-mou’d Meg o’ Nith,
And she spak up wi’ pride,
And she wad send the sodger youth,
Whatever might betide.
For the auld gudeman o’ London court
She didna care a pin;
But she wad send the sodger youth
To greet his eldest son.
Then slow raise Marjory o’ the Lochs
And wrinkled was her brow;
Her ancient weed was russet gray,
Her auld Scotch heart was true.
“The London court set light by me—
I set as light by them;
And I wilt send the sodger lad
To shaw that court the same.”
Then up sprang Bess of Annandale,
And swore a deadly aith,
Says, “I will send the border-knight
Spite o’ you carlins baith.
“For far-off fowls hae feathers fair,
And fools o’ change are fain;
But I hae try’d this border-knight,
I’ll try him yet again.”
Then whiskey Jean spak o’er her drink,
“Ye weel ken, kimmersa’,
The auld gudeman o’ London court,
His back’s been at the wa’.
“And mony a friend that kiss’d his caup,
Is now a fremit wight;
But it’s ne’er be sae wi’ whiskey Jean,—
We’ll send the border-knight.”
Says black Joan o’ Crighton-peel,
A carlin stoor and grim,—
“The auld gudeman, or the young gudeman,
For me may sink or swim.
“For fools will prate o’ right and wrang,
While knaves laugh in their sleeve;
But wha blaws best the horn shall win,
I’ll spier nae courtier’s leave.”
So how this mighty plea may end
There’s naebody can tell:
God grant the king, and ilka man,
May look weel to himsel’!