Коллектив авторов - Триодь Постная (на цсл., гражданский шрифт)

Слава, и ныне, Богородичен :Богородице, не презри мене требующа заступления Твоего: на Тя бо упова душа моя, помилуй мя.

По 6-й песни мученичен:

Просветивый святыя Твоя паче злата, и прославивый преподобный Твоя, яко Благ: теми умоляемь бывая, Христе Боже, жизнь нашу умири, яко Человеколюбец, и молитву исправи, яко кадило, едине во святых почиваяй.

В СРЕДУ НА УТРЕНИ, по 1-м стихословии седальны крестны:

Животворящий Крест Твоей благости, егоже даровал еси нам, недостойным, Господи, Тебе приносим в молитву: спаси страну, и град Твой молящийся, Богородицею, едине Человеколюбче.

Стих: Возносите Господа Бога нашего, и покланяйтеся подножию ногу Его, яко свято есть.

Имже образом плени враг Адама древом снеди, Господи: такоже пленил еси и Ты врага Древом Крестным, и Страстию Твоею. В сие бо пришел еси вторый Адам, взыскати заблуждшаго, оживотворити умерщвленнаго: Боже, слава Тебе.

Слава, и ныне, Крестобогородичен :Дева и Мати Твоя, Христе, на древе зрящи Тя мертва простерта, плачущи горько, Сыне Мой, глаголаше: что страшное сие таинство? всем даруяй живот вечный, волею на Кресте како умиравши смертию поносною?

По 6-й песни мученичен:

Страстотерпцы Господни, блаженна земля, напившаяся кровьми вашими, и свята селения, приимшая телеса ваша: в подвизе бо врага победисте, и Христа со дерзновением проповедаете. Того яко Блага молите спастися, молимся, душам нашим.

В ЧЕТВЕРГ НА УТРЕНИ, по 1-м стихословии седальны апостольстии:

Умудривый паче ветий ловцы, и пославый якоже проповедники всей земли, неизреченным человеколюбием, Христе Боже: теми утверди Церковь Твою, и верным ниспосли благословение Твое, едине милостиве и Человеколюбче.

Стих: Во всю землю изыде вещание их, и в концы вселенныя глаголы их.

Уловивше языки рыбарие, и научивше концы Тебе покланятися, неизреченным Твоим человеколюбием, Христе Боже: теми утверди Церковь Твою, и верным ниспосли благословение Твое, Едине во святых почиваяй.

Слава, и ныне, Богородичен :Тя величаем, Богородице, вопиюще: радуйся, незаходимаго света облаче, Того носивши в недрех, славы Господа.

По 6-й песни мученичен:

Апостоли, мученицы и пророцы, святителие, преподобнии и праведнии, добре подвиг совершившии и веру соблюдшии, дерзновение имуще ко Спасу, о нас Того яко блага молите спастися, молимся, душам нашим.

В ПЯТНИЦУ НА УТРЕНИ, по 1-м стихословии седальны крестны:

Пречистому Твоему образу поклоняемся, Благий, просяще прощения прегрешений наших, Христе Боже: волею бо благоволил еси плотию взыти на Крест, да избавиши яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

Стих: Возносите Господа Бога нашего, и покланяйтеся подножию ногу Его, яко свято есть.

Спасение соделал еси посреде земли, Христе Боже, на Кресте пречистеи руце Твои простерл еси, собирая вся языки, зовущия: Господи, слава Тебе.

Слава, и ныне, Крестобогородичен :Препрославлена еси, Богородице Дево, поем Тя, Крестом бо Сына Твоего низложися ад, и смерть умертвися, умерщвленнии востахом, и живота сподобихомся, рай восприяхом, древнее наслаждение. Тем благодаряще, славословим яко державнаго Христа Бога нашего, и единаго Многомилостиваго.

По 6-й песни мученичен:

Страдания похвалою, и венечною почестию, славные страстотерпцы, одеяшеся Тобою, Господи: терпением бо ран беззаконных победиша, и силою божественною с небесе победу прияша. Тех молитвами даруй нам, Боже, велию Твою милость.

В ПОНЕДЕЛЬНИК НА УТРЕНИ, по 1-м стихословии седальны умилительны:

На Страшнем Судищи без оглагольников обличаюся, без свидетелей осуждаюся: книги бо совестныя разгибаются, и дела сокровенная открываются. Прежде даже во оном всенародном позорищи, имаши испытати мною содеянная, Боже, очисти мя и спаси мя.

Стих: Господи, да не яростию Твоею обличиши мене, ниже гневом Твоим накажеши мене.

Доколе, душе моя, пребывавши в прегрешениях? доколе приемлеши покаяния преложение? приими во уме суд грядущий, и возопий Господу: Сердцеведче, согреших, прежде даже не осудиши мя, помилуй мя.

Слава, и ныне, Богородичен :Кийждо идеже спасается, тамо праведно и притекает: и кое иное таковое прибежище, яко Ты, Богородице, покрывающее души наша?