Коллектив авторов - Триодь Постная (на цсл., гражданский шрифт)

version="1.0" encoding="utf-8"?> religion_rel religion_christianity religion_orthodoxy Коллектив авторов 35044 Триодь Постная (на цсл., гражданский шрифт)

Данная электронная версия Постной Триоди полностью сверена с бумажной версией. Верстка выполнена в полном объеме, начиная с Недели о мытаре и фарисее и заканчивая Полунощницей во Святую и Великую субботу. Содержит все великопостные чтения из Ветхого и Нового заветов, Великий канон Андрея Критского, песни Троичны, Светильны и Седальны на 8 гласов (в Приложении). Выполнена разметка текста для удобочитаемости, а также ссылки для удобного перемещения по Триоди.

2.0 — корректировка верстки; выполнена сверка текста с бумажным источником Триоди; выполнена разметка текста для удобочитаемости (28.08.19, www.fblib.com).

1.0 — исходная верстка (Maximus, Святая Гора Афон, Великий Пост–2019).

По предначинательном псалме, стихословим Блаже́н муж: 1-ю кафисму всю.

На Го́споди воззва́х, поставим стихов 10: и поем Осмогласника стихиры воскресны 3: и анатолиевы 4: и Триоди самогласны две, повторяюще первую. Глас 1.

Не помо́лимся фарисе́йски, бра́тие: / и́бо вознося́й себе́ смири́тся. / Смири́м себе́ пред Бо́гом, / мыта́рски поще́нием зову́ще: / очи́сти ны, Бо́же, гре́шныя.

Фарисе́й тщесла́вием побежда́емь, / и мыта́рь покая́нием приклоня́емь, / приступи́ста к Тебе́ еди́ному Влады́це: / но ов у́бо похвали́вся, лиши́ся благи́х: / ов же ничто́же веща́в, сподо́бися дарова́ний. / В сих воздыха́ниих утверди́ мя, Христе́ Бо́же, / я́ко Человеколю́бец.

Слава, глас 8: Вседержи́телю Го́споди, / вем, коли́ко мо́гут сле́зы: / Езеки́ю бо от врат сме́ртных возведо́ша, / гре́шную от многоле́тных согреше́ний изба́виша, / мытаря́ же па́че фарисе́я оправда́ша: / и молю́ся, с ни́ми причта́в, поми́луй мя.

И ныне, Богородичен 1-й, рядоваго гласа.

На литии стихира святаго обители, по обычаю.

Слава, глас 3: Мытаря́ и фарисе́я разли́чие разуме́вши душе́ моя́, / о́наго у́бо возненави́ждь горды́нный глас, / о́ваго же ревну́й благоумиле́нной моли́тве, и возопи́й: / Бо́же очи́сти мя гре́шнаго, и поми́луй мя.

И ныне, Богородичен воскресен, в тойже глас: Без се́мене от Боже́ственнаго Ду́ха, / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́, / и Младе́нца млеко́м пита́ла еси́. / Те́мже не преста́й моли́ти, / изба́витися от бед душа́м на́шим.

На стиховне стихиры Осмогласника по алфавиту.

Слава, глас 5: Отягче́нныма очи́ма мои́ма от беззако́ний мои́х, / не могу́ воззре́ти и ви́дети высоту́ небе́сную: / но прими мя, я́ко мытаря́ ка́ющася, Спа́се, / и поми́луй мя.

И ныне, Богородичен, в тойже глас: Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой Христо́с Госпо́дь, / во тьме спя́щим яви́ся, / со́лнце сый пра́вды, / просвети́ти хотя́, я́же созда́ по о́бразу Своему́ руко́ю Свое́ю: / те́мже, Всепе́тая, / я́ко ма́терне дерзнове́ние к Нему́ стяжа́вши, / непреста́нно моли́ / спасти́ся душа́м на́шим.

Тропарь: Богоро́дице Де́во: трижды. И бывает благословение хлебов, и раздаяние. И чтение велие в Посланиих апостольских.

Последование прилучившагося святаго в Неделю сию, и в блуднаго, поем в пяток на Повечерии, или егда екклисиарх разсудит: Аще токмо не случится коего великаго святаго, или святаго храму: зане храм и не великаго святаго, больши воследуется великаго святаго, на свой ему храмный праздник, еже должно есть бдению бывати, и никакоже оставляти в память его, ниже прелагается на ин день. Но поем службу храму, якоже и Сретению Господню, во вся дни, в няже и Сретение Господне бывает.

По шести псалмех, Бог Госпо́дь, на глас Осмогласника. И глаголем тропарь воскресен дважды, Богородичен единожды, и обычная стихословия. Седальны Осмогласника. По Непорочных тропари: А́нгельский собо́р: ипакои. Степенны и прокимен гласа: Вся́кое дыха́ние: Евангелие воскресно ряду. Воскресе́ние Христо́во: псалом 50.