Корнилий Комельский: Общежительный устав

Милостыня же, аще от кого некуду в монастырь бывает, то никомуже от братий милостыни себе по рукам ни от кого не имати ничто же, яко же ныне обычай сей безсловесный от врага душ наших привниде, еже во общих монастырех милостыню приимати по рукам братиям. От Святых бо Отец предано во общих житиях особнаго стяжания никакожде имети, ниже милостыню кому себе, или ино что от кого приимати, или самем творити, но вся обща бывают. Аще кто от великих, и всяк Христолюбец приидет в монастырь, и восхощет давати милостыню по рукам, или кто пришлет с кем милостыню, принесый же от неискуства любопряся глаголет: «Мне убо повелено есть давати милостыню по рукам; и аще тако не емлете, мне вам тоя милостыни не давати»; то лучше да не будет такова милостыня, еже приимати на раззорение общаго чина; но глаголати к таковым: «Аще творити нам милостыню, даждь нам вообще всем; мы убо особно по рукам не приемлем, Божественное Писание не повелевает во общих житиях особному чему быти отнюдь». Такожде и Священником и прочим церковным служителем, аще кто даст что на службу, или на молебен или милостыню, того им себе не имати никакожде, но отдавати вся в монастырь такожде, аще кто на стан послан будет на приятие милостыни, или кто от братий вне монастыря у кого будет где; и неких Христолюбцев учнет давати ему что, глаголя: «В монастырь убо аз дах милостыню, се же тебе даю особо», и ему того не приимати, но рещи: «Святии бо Отцы не повелеша во общих житиях ничему особному быти; но аще хощеши, даждь нам всем обще». Аще ли же кто и приимет, или кому что откуду пришлют, то он сия вся отдает в монастырь. Аще ли же кто, презря страх Божий, начнет не хранити Святых Отец законоположения, и наше предание преступати, держати отай Настоящаго что мало или велико, сребро, или ризы или иныя кия вещи у себе в келлии, или у кого в монастыри, или вне монастыря у кого где ни буди, таковый, по Божественному Писанию, святокрадец есть. И Василий Великий глаголет: «Инок, имея что в монастыри, или вне, да будет без причащения, и чужд есть любве Божия, и отлучен Соборныя церкви»;. И Феодор Студит рече: «Всяка вещь без благословения проклята есть».

Аще кто от великих и всяк Христолюбец приидет в Монастырь, и возхощет какое питие, еже имать пиянство во утешение быти братиям в трапезе, то никакожде сему не быти никогда же отнюдь. Аще и у себе в келии, иде же стоит, или инде где учнет от братий кому таковое питие давати пити, или понуждати кого, то не послушати его и не пити: лучше убо в том его оскорбити, нежели преступите устав монастырский. Вся же, яже в Писании сем написах недостойный моею рукою аз инок грешный Корнилий, а предах о Господе братии моей в месте сем постригшимся и приходящим всем живущим с нами, и сущим по отшествии моем, хощу, да и живу ми сущу, и по смерти моей тако творима да будет и прочитаема начасте, на воспоминание к пользе и во спасение душам, сия убо вся положим, братие, в сердцах наших, и сохранити потщимся, да не будут во осуждение словеса сия в день суда. Но молю вы, братие, аз недостойный, поживите во братолюбии, кротости, покаряющеся брат брату, и любовь имейте со истинною, и мир от сердца; и Бог мира да будет с вами, и той да сохранит вы, и утвердит в любви его молитвами Преславныя Богородицы и Преподобнаго и Богоноснаго Отца нашего Антония Великаго, и всех Святых, Аминь. И о мне грешнем, Господие мои, Бога молите, яко да вашими молитвами получу от Христа Бога милость в день Славнаго Его пришествия.

Хощу вам, братие, и о сем возвестити, аще жив сый, аще по моем отшествии некий брат от инаго монастыря приидет, имать же у себе стяжание некое особное сребро или ризы, или ины, какия вещи излишны, кроме иконы и книги и нужныя одежда и обуща, и восхощет с вама сожительствовати; о имении же своем глаголет: «Оставите ли, — речет, — дондеже попекущуся с вами пожити, и аще подаст Бог ми терпение, и помощию Его, тогда сотворим по совету вашему». Вы же, братие, таковаго приимите понаучитися ему на лето едино. А еже имать стяжания свое особное, вся сия скажет Настоятелю и братиям воображенным на то, что есть, и где стоит; и аще будут с ним и он вся она поставит в монастырской казне за своею печатью; а в монастыри живущим братиям никомуждо ничего в любовь не дает, ниже мирским, ни в милостыню странным, ниже покупает кому что. Аще ли и восхощет дати в милостыню в монастырь некий, или инудь куды, и он, по повелению Настоятелеву и братий, шед с Казначеем да даст кому что, и аще пребудет лето едино, и Господь Бог укрепит его, и восхощет прочее с вами по преданию нашему пожити; и он еже имать стяжание свое излишнее, все раздаст, амо же хощет на пользу души, себе же в соблюдению не оставит ничего ничуть. Аще ли же по лете оном на лучшее не приидет, и тако пожити не хощет, яко же предахом вам от Святых Посланий, таковаго от монастыря с миром отпустити, и со всем его стяжанием.