Корнилий Комельский: Общежительный устав

В трапезу же и в хлебню и в поварню и в прочая служебныя келлии безвременно кому не приходити, просить Келаря и воображенных и пекущихся о благочинии, якоже глаголет Великий Василий: «Еще кто безвременно приходит в служебная чрез совета служителей, да будет без благословения, или да отлучится». В служебных келлиях о благочинии попечение имети большим, яко же Великий Василий рече: «Аще кто от начало-служителей обрящет кого служаща, или беседующа в служебных, и не изженет его вон от места, да будет без благословения». Из монастыря же да не исходит кто без благословения Настоящего, кроме вображенных на какову службу вне монастыря.

На монастырское же каково дело или службу в монастыри, или вне монастыря, егда позовут или возвестят, всем вкупе собратися вскоре без замедления, кроме немощных, и еже кого Настоятель в каково дело устроит. Сходящеся на дело, делати без свары и без прекословия и без роптания. Святый Ефрем бо рече: «Ропщай чернец исчезновение себе творит»; и инде: «Проклят, — рече, — и окалян, иже послушания не стяжа, но роптание; таковый бо в монастыри язва велика и соблазн братии, служит миру. Всяк бо ленивый и роптивый впадет в зло». И Святый Исаак Сириянин глаголет: «Вся немощи человеку носит Бог; человека же присно ропщуща не терпит, аще не накажет его». Ниже суетная глаголати и глумная. Глаголет бо тойже Святый Исаак: «Пребываяй в суесловии и глумлениих, душею и телом блудник есть». Ниже празднословити и глаголати словеса и мирских, реку, о царех, и о князех и о войнах [?земских] ниже о житейских, о брацех, и о дарех, и о [тугех], и о прочих мирских вещах, ниже о монастыре, или о иноце, еже и о прочих испытовати и преогорчевати; от того бо бывают вся злая и осуждение. Пишется бо, яко об всяком празднем слове ответ имамы дати Богу (Мф.20,28). Чужды бо нам суть таковая повести и суесловия мира отрекшимся. Наипаче же, егда будем негде вне монастыря и близ мирских человек, блюстися, и ничто же при них не глаголати, ни монастырских ни братних вещей износити, да не похулено будет чернеческое житие и соблазнятся мирская чады. Но о сем едином да будут словеса наши, о нем же изыдохом от мира, о терпении и подвизе, о смирении, о жизни духовней, о ратеях бесовских, о надежди жизни вечныя, о безконечней муце грешным, от Божественных Писаний, еже на пользу души. Больше же с молчанием и с молитвою дело творити, да и дело благословится. Такожде и всем братиям, сущим в ручных делех и во всех службах, без празднословия дело творити, но с молитвою, да благословенно будет и душа освятится.

Происхождения же из монастыря, творити не просто, и яко же прилучится, во грады или в веси, или же по плоти к своим исходити, или монастыри обходити безвременно и неблагословенно, нам ненадобно, но точию уставленная и нужная, яко же глаголет Великий Василий. Настоятель благочине да управляет братии раздаяние делов, такожде и отхождение комуждо ключимое и подобное да повелевает, и посланный да не отрицается, еже о Господе послушания, точию да не службу вину нерадением вменит, но со страхом Божиим, и мнозем трезвеннем да утверждается, и да себе и сущим с ним польза бывает. И Святый Ефрем глаголет: «Аще послан будешь от Настоятеля во град или в веси, службу свою со страхом сотворити, яко Богу соблюдающу пути твоя». Аще убо нерадити и сопротивная творя, о Бозе нерадиши, лихопитаяся и упиваяся, и блудно живый, похоти своя творя, без страха Божия; темже не содела послушание но ослушание якоже се нецыи Бога славят о тебе, видяще тя безмолвстующа в монастыри, Владыце Христу работающа; такожде и соблазнятся о тебе, видяще тя во граде, или в весех творяща, якоже не угодна суть Богови. И что? Кая ти милость, есть соблазнити человеку совесть? Сего ради внимаем, да не похулено будет нами чернеческое житие. Велико бо зло есть и страшен ответ от Бога, еже человеком соблазн быти, и своим небрежением укоризну нанести, на иже в монастыри сущих братию, аще и добре пребывающих. Тем же аще случится от нас кому некия ради нужды быти в мире, и со благоговением да пребывает, и много опаство подобает имети; наипаче преданная сохраняти, да и сущим в монастыри братиям похвала, и зрящим его польза бывает. И тако убо суть словеса Святых Отец, и ина множайша. Сих ради, испытавше Божественная Писания, и еще жив сый, изложих сия написана предания живущим с нами братиям и требующим сих; паче же не мы (недостойни бо есмы), но Блаженнии Святии Отцы от Божественных Писаний, и по завещанию Великаго Василия; да сущим с вами, и по моей смерти Настоящему и всем братиям тщитися согласно пожити, и опасно сия вся сохраняти Аще ли же кто от братий от разленения, или небрежения попадет от преданных ему в неких: исповедати подобает сия Настоящему; и той, яко же подобает, исправит согрешение, и тако аще в келлии, случится согрешение, или вне где изшедшему, исповеданием. Много же опаство имети да подобает, изшед где от келлии, наипаче преданная сохраняти. И аще тако во страсе Божии пребудете, и благочинно поживете зде, со страхом и трепетом соделовающе свое спасение, и зде убо ублажени будете, и вечная благая приимете. Аще ли нерадити о Господних заповедех, и Святых Отец законоположениих и о наших предании; то и зло от человек поношение и уничижение приобрящете, в будущий же век от Бога осуждение. Аще ли речете, немощни есмы: но токмо по своей силе начало подвигу сотвори, яко же можеши; и видя Бог подвиг твой, даст ти помощь на прочая благая дела. Аще ли же кто нечто от общаго жития и чина разоряти, то ему вси единодушно возбраняйте и запрещайте. Аще ли не исправится, прочее из монастыря изгоните таковаго, яко уд гнилый и непотребный, да и прочии страх имут не преступати устава монастырскаго «Горе же человеку тому, — Господь рече, — им же соблазн приходит». И Давид глаголет: «Проклята уклоняющиеся от заповедей» (Псал.118,21).