Геннадий Новгородский - Послания

Аще ли пак кто от православных во обличение всхощет стати на них про их ереси, и они отметници бывают своих ересей, да и проклинают всех тако творящих, да и ротятся без страха, а сами то творят, да и греха себе в той клятве не ставят. Ино как же их мощно доити, аще не Христос бог свободит от тое ереси молитвами пречистыя его матере, и грозою и обыском великого князя, да и подвигом господина отца нашего Геронтиа митрополита всея Руси, да и вашего боголюбья потщанием купно с архимандриты и прозвитеры, въспоминаа государю великому, чтоб государь прадеда своего великаго князя Владимера веру потвердил, а от еретическиа прелести православное христианство свободил, а онамо в приидущем нетленный венец въсприимет с православным царем Констянти ном купно и с прадедом своим Владимером, иже крестил всю Рускую землю? Аще ли ся совръшатся, страх ми гнева божиа, тебе же, о боголюбиве, с умилением [3] прошу, яко да подщателне о сем подвиг покажеш, купно с архимандриты и с прозвитеры, чая от господа бога мзду въсприати. [4]А что числа поставлены в Шестокриле 276 девятьнадесятиц, ино то учинили на прелесть христианскую — хотят рещи: [5]лета христианскаго [5] летописца съкратишась, а наша пребывают. А то хотят ту прелесть явити как изойдет наша пасхалиа, занеже и аз испытно его прошел, да и написано у меня. Ино те числа, что поставлены, 276 девятьнадесятниц лет будет 5228. И потому ино у них еще пришествия христова несть, ино то они ждут антихриста. Ино то прелесть великая! А яз нашел в писании, что который царь по котором был, и колко которой царь жил, тако же которой патриарх по котором был во Иерусалиме, или папа в Риме которой по котором был, да и колко кто лет жил, а пишет их епископы, а не патриархы. Ино написано сице: мирскых лет 5000 и шестсот и 21, а от божественнаго воплощенна лет 121, римский епископ 9 Угиин [6] лет 4, а Ерусалиму епископ 14 Иосиф лет 2, таче Иерусалиму же епископ 15 Июда, то были крещены от июдей при том Июде Андреяном, конечное и последнее пленение [7] градное и жидовское бысть. Да по сем первый епископ Марко лет 8 был от язык необрезающихся [8]. Ино там писано 5000 лет и 6 сот и 21 в неже лето и пленение их бысть последнее. И оттоле до сех мест 400 лет да 1000 в гневе божи пребывают. Да еще к тому безстудствуют, развращающе наше превославие, яко же о них писано: ни сами входяще, ни хотящих внити оставляюще. Да что которые лета украли у нас еретици жидовскыми числы, и в те лета которые цари и папы и патриархи писаны по именом, и то тех где вмещати? А что Шестокрыл они собе изучив да тем прельщают христианство, мня яко же с небеси знамение сводят, ино не по их съставлениа бысть! Шестокрил бо взят от астрономии [9], яко капля от моря. А то звездозаконное дано бысть Сифу третьему сыну Адамову. Да потом Енох праведный исписал дни и часы и лета, и потом Ной последнему роду предаде. Авраам в Египет шед египтяна учил землемериа да и розчет земный. Да потом и жидова от них тому навыкли. А во всяком языце то есть, а христианстии учители тому были велми горазди — Иоан Златоуст, Василий Кесарийский, Григорий Богослов. А в Григориеве житии Акраганского писано: дондеже де арифмитикию и кгеомитрию и мусикию и астрономию всю до конца извыче. [10]Сего ради въспомянух твоему боголюбию онех мерзостная съпротивоглаголемая божественному повелению учениа еретическаа числы онеми жидовскими преставляема. А о летех скончания богу мощно приложить и уложить. А богословцу [11] Григорию изъясняющу, да и в Зерцале мужу мудру повинуюся, на того же Григория свидетельство приводящу: егда наполнится горний мир, тогда ожидай скончаниа. И Енох праведный написал: «Преже даже вся не быша, постави бог века тварнаго и потом сътвори всю тварь видимую и невидимую, и по всем том създа человека в образ свой, и тогда раздели бог век человека ради на времена и лета на месяци и на дни и часы, и да разумеет человек времен премену и чтет своея жизни конец. И егда скончается тварь, юже сътвори бог, тогда [12] времена погыбнут, и лет не будет, к тому дние и часы не почтутся, но станет век един». И прочая сам не невеси [13], а милость [14] господа бога вседръжителя и пречистыя его матере и нашего смиренна молитва, купно же и благословение да есть всегда с твоим святительством и боголюбием. Аминь.

Примечания

[1] Так А; Т про на поле приписано клинаю . [2-2] Так А; Т явлено да что есть ересей нет, но на этом месте стоит знак вставки [3] На этом месте прерывается текст в А. [4] Начинается текст в Б [5-5] Т лета христианского на поле; Б в тексте [6] Так Б; Т Усиин [7] Т пленение вставлено на поле; Б в тексте [8] Б обрезающихся [9] Так Б; Т астромеи. [10] Отсюда продолжается текст А . [11] Б богослову; А так . [12] Так БА; Т от господа [13] Кончается текст в Б [14]!] Т после милость одна выскреблена

Читать дальше