авва Дорофей Array - Аскетика. Том I

134. Тогожде к томужде великому старцу.Рцы ми, авво мой, от утра до часа близу втораго ощущаю помыслы, и не вем откуду сие стражду. Паки рцы ми сие: како может бес лице жены, или чесого иного живонаписати в мысли моей? В самом бо том помысле есть и лице, а не раздельно помысл бывает и лице, но купно помысл, купно лице, и что сотворю во еже свободитися? Моли о мне.

Ответ.Брате, егда празден пребывает кто, упраждняется в приходящих ему помыслех. Егда же делает, не имать когда прияти я. Утреннюй убо, и держи жернов, и молоти имать пшеницу твою, — хлебы пищи. Аще ли же соперник твой предварит, то плевелы вместо пшеницы молоти будеши на нем. О другом же: брате, у живописцев живопишемая лица купно с вапами пребывают: аще ли же преднаписана будет дщица, то уже ни вап, ниже лиц приемлет, скончаваемых во едино. А еже свободитися есть: еже преднаписати дщицу твою. Подвизаимся, еже сотворити силу нашу, и пособит нам Бог. Тому слава. Аминь. Помолися о мне, брате, и прости мя Гос пода ради.

144. Тогожде к томужде великому старцу, прошение и моление о приличествующих души благих.

Ответ.Радуюся во Господе, и радуется во мне Господь, егда просят чада моя прошений благих, то есть о спасении души и животе вечнем. Да возрадуется же и дух твой, брате, ибо увоиних тя в преизящное воинство, еже быти тебе непрестанно во хранилищи не изглаголанных благ, и еси в нем. Прочее блюди, еже стяжати светлыя одежды, по достоинству воинства, да не испадеши от него, и премудро сердце смиренно, и лице благоустроено, удаляющееся всякаго движения, гнева и смущения. Таковых бо требует место оное служителей, огребающихся страстей, и одеянных в одежду брачну, да не извержени убо будут вне со студом великим. Се убо ввоинился еси, да не повержеши е, от тебе бо есть; введох тя, да не изыдеши; отлучих тя от шуих, не смесися с ними. Благослових тя, да не взыщеши клятвы. Исках же ввоинити тя и во иная не изглаголанная, пречестная и чистая сокровища Духа; и рече: не быти ныне времени, но егда потщится сотворити яко десницу шуйцу, и ветхаго новым человеком, ко приятию святаго и поклоняемаго Духа, тогда приимет Духа, и научит и всему, и наставит и введет и в таковыя сени, в няже мали входят, за смирение их и послушание, кротость же и терпение. Да не будеши убо празден, но делай не брашно гиблющее, но брашно пребывающее в живот вечный, о Христе Иисусе Господе нашем, о Немже укрепляйся, выну благословение.

145. Тойжде просил есть тогожде великаго старца помолитися о нем, и сказати ему, како кто сподобляется чистыя и духовныя молитвы.

Ответ.Брате возлюбленне о Господе! Даде нам Бог ходити удобно в путь хотений Его, вводящий в живот вечный, и глаголю что есть, и како можем постигнути Его, яко да сице получим вся вечная благая. Понеже Господь наш Иисус Христос рече: «просите и дастся вам: ищите, и обрящете: толцыте, и отверзется вам» (Лк. 11, 9). Помолися Самому Благому Богу, да послет вам Святаго Духа Утешителя; и Той пришед, научит вы о всех, и таинства вся открыет вам. От Сего взыщи путеводствоватися. Не попустит прелести или парения в сердце, не попустит уныния, ниже дремания в мысли. Просветит очеса; утвердит сердце; возвысит ум. Сему прилепися; Сему веруй; Сего возлюби: умудряет бо безумныя; услаждает мысль; силу подает, чистоту, и радость, и правду; долготерпению же и кротости, любви и миру учит, и дарует. Имаши убо твердый камень, не пренемогай: ветри бо и дожди и реки, не могут низложити устроеннаго на нем здания. Имаши великаго онаго Кормчия, запрещающаго ветром и морю; и утихают, и хранится не опровержен корабль.

Имаши Учителя Благаго, узаконяюща забывати задняя, а простиратися в предняя. Се сокровище некрадомое. Се неопровержимый столп. Что убо вменяеши мя нечто быти? И аз не могу приити в сия, аще не побежду гнева, и удавлю ярость, и стяжу устроение тихое, в немже почивает Бог. Оставим убо лукавство и восприимем простоту, углубим и насадим на селе нашем виноград плодоносен, да обымем и сотворим веселия вино, яко да упившеся, забудем скорби и болезни, обдержащия нас на погибель души. Брате, воля есть Божия Владыки нашего, да спасемся: чесо ради мы не хощем? Молися убо всегда прилежно, да приидет нам благодать Духа. Исполншеся бо того отцы, прилепишася Ему в совершенней любви, зовуще: «кто ны разлучит от любве Христовы?» (Рим. 8, 35) и рекоша: «ничтоже». Возлюбим убо, да возлюблени будем. Приступим всем сердцем, да прияти будем. Зело смиримся, да возвысит нас. Плачем, да возсмеемся. Опечалимся, да возрадуемся. Возрыдаем, да утешимся. Просим прияти нам Духу, да наставит нас на всяку истину; не ложен бо есть Глаголяй: «ищите и обрящете» (Ин. 16, 24). Господь да сшествует с нами во всех по милости Своей, во еже уразумети нам, каковы есмы, и чесого требуем, или чесого хощем. Тому слава вовеки. Аминь.