Анатолий Калинин - Ром. На цыганском языке (диалект русска рома)

На г’аздыи якха, Клавдя пхэндя:

– Одой сыс пхуром и тэрны ромны. Бутыр мэ ничи на дыктём…

– Мэ джином, – пхэндя ёв сочуствиёса, – И ещё мэ тумэн мангав, на запхэнэнти Ваняскэ дрэ кузня тэ заджял. Ёв смышлёно.

Ёв вежливо обгэя ла, угэя дромэса.

Пхаро исы приезжонэскэ манушэскэ машкир остра прэ чиб казакэндэ, тем более, если мануш ром. Ёнэ думинэнас со бикхэритко, лодырь. Будулаёс прилынэ сыго сыр пэскирэс пал одова, со удыкхнэ, со ёв трудяга. Кэдэ сыс замко прэ кузня, на сыс ковалёс, и дякэ, хай, куч. Кана, кэдэ откэрды цэла дэвэса, мануша протопали дром, лыджинэ саро лэскэ: гандладя, тяпки, грабли, сари мелочь. На сыс штэто ваш барипэ.

Джиндя Будулаё сыр закалить. Даже дрэ станица на джинэнас тэ кэрэн фэдыр. Дасаво секрето передыя лэскэ дад, а лэскэ лэскиро дад. Камэлас тэ передэл лэс ваврэнгэ – на выджял. Правильнэс роспхэнэла мануш, а сыр тэ кэрэс – са екх на дякэ. Набутка, а на дякэ. Ёв на нашавэл надежда тэ передэл кэдэ – нибудь секрето ваврэскэ. Ангил думинэлас тэ передэс пэскирэскэ чавэскэ. Ранней весной лэскири ромны Галя пхэндя, со явэла чаворо. Ваврэс и тэ авэл не могло. Сарэ дро родо сыс ковали. Дякэ и угэя про марибэ. Мангья лэн тэ джян кай безопасно, тэ ракхэл чавэс. Пхэндя: «– Мэ тумэн латхава. Ром ромэскэ посыкадёла дром». На удыкхтя, сыр Галя пыя про чянга, протырдыя кэ ёв васта, а пхуром, лэскиро кашуко дад, дыя лакэ паны.

Бут дрома ёв прогэя кхэтанэ казакэнца Донского кавалерийского корпуса Терекостыр кэ Австрийско Альпы. Ползинэлас пэ ивья, чяр, на сутя дрэ разведка, пасёлас дро госпиталё. И саро времё дживэлас мечтаса, кэдэ явэла, лэла пало васт первенцос, конэс Галяса доракирдэпэс тэ кхарэн Ваня. Дро перво моло подлыджия лэс кэ наковальня. Посвятит лэс дрэ папускиро секрето. Твёрдо патялас Будулаё, со Ваня явэла ковалёса, конэс никон на дыкхтя. Сыр чюрдэла прэ пхув картузо, и пхэнэла: «– Дадо, мэ уже саро джинав, ухтыла. Камам инженероса-механикоса». Дасавэ мысли сыс дро шэро Будулаёстэ, кэдэ шунэлас ракирибэ однополчан палэ пэскирэ чаворэн. Состыр лэскиро чаво Ваня явэла тэ кхэлэл про тарго машкир толпа, тэ мангэл г’аспря? Даже на совэлас, сыр подуминэла дякэ. Ёв пог’арадя мечты дрэ фэлда, кай пашлы Галя. Марибэ отлыя лэстыр Галя. Никэдэ на явэла дякэ, сыр мечтал бисоибнытка ратэнца. Нанэ конэскэ тэ передэл вастэндыр дрэ васта пэскиро секрето ковалёс. Ёв илэстыр пытался тэ передэл, на выгэя. На башавэл о састыр, на джял парамэса. Пока на явья Ваня.

Клавдия уже на запхэнэлас пэскирэ чавэскэ тэ обджял стронатыр кузня. Кана ёв каждо утро открыто скэдэлпэ сыр прэ буты. Ада и сыс лэскири буты. Будулаё вымардя председателёстыр чавэскэ полтора трудодня палэ смена сыр младшонэскэ молотобойцоскэ. Чейно – старшо молотобойцоса сыс Володька Царьков. Будулаё лэс кхарэлас. Чаво сыс зорало. Нэ одова часто капризничал, мангэл бравинта, пал адава Будулаё сарэса и отпхэндя лэскэ. Ваня понабутка мужал, выбария, кэрэл буты набаро молотоса, и Будулаё мог би старшонэскиро молотобойцоскиро.

Смугло, росло, гожо сыс Ваня. Нэ, ушундя Будулаё, со на подджял ёв ко дад муеса. Подуминдя, со савэ – то родичи дасавэ. Одова на пхэнэса палэ Нюркатэ, дакири чай. Сероякхитко шукарны, только тихо и скромно. Сыр дай прилежно. Кхэрэ и дрэ буты лынаёса дро винограднико сыс яг. Дрэ школа помогала пшалэскэ тэ решинэл задачки. Сыклёнас дро екхэ классо, дриван камэнас екх екхэс. Никон машкир чаворэндэ на дёргиндя Нюрка палэ бала. Утроса кхэтанэ гэнэ дрэ школа брэгоса Доно дро станица. Кхэтанэ рисинэнас кхэрэ. Никон ни екх моло на удыкхтя, собы ёнэ кошэнаспэс машкир пэстэ, сыр исы машкир пшалэстэ и пхэнятэ.

Сарэ джинэнас, со пшалэскиро увлечение, сыр и дай, ёй не одобряет, хоть и на ракирэл никонэскэ. Будулаё часто думинэлас, со би Ванятэ лэскэ на локхэс сыс. Дэвэс сыс тыкно. То Дарьякири бригада прияндлэ тяпки, то из огородной бригады гандладя. И саро чейно сыгэс тэ кэрэс. Будулаё адякэ кэрэл рессора, со фэдыр нэвэстыр. «– Ёв джинэл сави – то романы молитва, или саво – то порошко лэстэ сы» – ракирэлас восхищённо шоферо.

Кэдэ дасавэ слухи догэнэ ко Будулаё, ёв засандяпэ. Ничи дасаво на сыс. На патял дро чудесы одолэ молостыр, кэдэ исыс пашло дро госпиталё. Спхагирдя г’эрой. Одой и высыклякирдяпэ грамотакэ. Пал адава роскошнэпэс барэ табороса Даниласа. Ёв чюрдыя лыл Будулаёстыр дрэ яг. Будулаё семьяса угэя таборостыр, лодэлас пэскирэ семьяса жыкэ марибэ.