И. Сапожникова - Мечта о русском единстве. Киевский синопсис (1674)

СИЕ ЕМУ ГЛАГОЛЮЩУ, се принесено послание к нему от Преподобнаго Сергия Игумена, в нем же бе писано сице: «Великому Князю Димитрию Ивановичу и всем Князем Российским и всему православному воинству мир и благословение». Еще же посланник даде Великому Князю и хлеб Пресвятыя Богоматере, от Игумена Сергия присланный. Князь же Великий о писании том со всеми вои обрадовался и тем аки некими твердыми бронями на брань вооружися; посланника же целова любезным целованием: а хлеб святый приемши, возде с ним руце свои на Небо и велегласно возопи: о велико имя пресвятыя Тройцы! Пресвятая Госпоже Богородице! помогай нам на сопротивных молитвами Преподобнаго Сергия и спаси нас. Вседши же на коня своего, взем палицу свою железную, подвижеся из полку вон, хотя сам впред начати бой от великия ревности своея за Веру Христианскую, за Церкви святыя, за Землю Рускую и за свою великую обиду. Но Рускии Князи и богатыри удержаша его, глаголюще: не подобает тебе Великому Князю самому впредь битися, но особно стояти, а на битву полков смотрети, и разсуждати, где показатися. Егда ты где поденешся, то что и по нас будет? и пред ким нам явитися? Мы все готовы есмы головы свои положити за тебе, Великаго Государя, и за отечество свое. Ты же по нас память творити будеши и в книги Соборныя впишеши в память грядущим родом. Князь же Великий прослезися и рече: братия моя! добрии речи ваши: но понеже на Земли почтен есмь пред всеми вами честию большею; сего ради подобает ми прежде вас за всех вас голову положити, да прежде вас венец от Христа восприиму. Благая бо приях от Господа, злых ли не могу терпети? мне ради единаго воздвигошася врази; како же могу видети вас побиваемых? Общую поче подобает ми ныне с вами чашу пити, аще смерть, аще ли живот. В том же времени начаша передовые полцы сходитися с Татарами. Первой полк поведе Димитрий Всеволод и Владимир брат его. Правою рукою шел Микула Васильевичь с Коломны с устроенными ратьми. Поганыи же Татарове идоша обапол, яко не бяше места им где раступитися: а безбожный Царь Мамай с трема своими Князьями выехал на место вышшее смотрети на кровопролитие человеческое; и яко близ с собою войска схождахуся, се выйде Татарин един из полку Татарскаго именем Челубей, пред всеми являяся мужеством, яко древний он Голиаф. Сего видев чернец Сергиев Пересвет, абие подвижеся из полку Владимира Всеволожа и рече: сей Татарин ищет противнаго себе витязя; аз же хощу с ним во имя Господа Саваофа видетися и восприяти венец Царствия Небеснаго. Бяше же на нем шлем Ангельскаго образа, воображен схимою с Крестом; и паки рече ко всем своим: отцы и братия! простите мя грешнаго, и отвещаша вси: Бог тебе простит и благословит и поможет тебе молитвами Святаго Сергия. И напусти на Татарина того; Татарин же устремися противу ему и вси Христиане кликнуша: Боже помози рабу своему! и ударишася оба витязя, чернец с Татарином, крепко копиями, едва место не проломися, и падше оба на землю, ту скончашася.

ПО СКОНЧАНИИ ТЕЧЕНИЯ Пересветова, абие удариша кождо по своем коню и все Христианстии вои единогласно кликнуша: с нами Бог! и паки: Боже Христианский, помози нам на враги! Татарове же кликнули к своим богам, ог Магомет! и сступившеся от обою страну, начаша крепко битися. Лиется кровь богатырская по седлам, катятся шлемы златыи под ноги конскии, а за шлемами и главы богатырстии; Татарове же вдвое того падают на поли Куликове. Коль место велико и пространно межи Доном и Мечею, но то место еще бяше тесно от толикаго множества воинств; и не точию от оружия падаху, но и о самих себе разбивахуся, и от великия тесноты прочии задыхахуся, прочии под конскими ногами умираху, а реки кровавыи истекаху, мечи блещахуся аки молния, копии сокрушающеся, аки гром трещаху. От третьяго часа даже до шестаго бишася сильно. О грознаго времени! о горькаго часа! в трех бо часах безчисленное множество побито создания Божия. Час четвертый и пятый биющеся не ослабевают Христиане, ниже Татаре. Наставшу же часу шестому, начаша Божиим попущением грех ради наших погани одолевати, а Христиане изнемогати. Уже бо мнозии от сановитых побиени суть; мнози храбрыи богатыри Рускии и юноши нарочитии, аки древа дубравная приклонишася на землю; мнози сынове Рускии сотрошася копытами коней Татарских, и самаго Великаго Князя уязвиша вельми, даже нуждою склонившися с коня, пойде с побоища, яко уже не мощно бе ему битися. Стязи же (знамена) Великаго Князя многажды Татарове секоша: но Божиею силою не возмогоша их до конца истребити.