И. Сапожникова - Мечта о русском единстве. Киевский синопсис (1674)

ЗАХАРИЯ ПРИШЕД в Орду, и поемше его темныи Князи, поставиша пред Царем своим Мамаем. Захария же все посланные дары от Великаго Князя Димитрия положивши пред нечестивым Мамаем, рече: Государь наш Великий Князь Димитрий Ивановичь всея России в отчествии своем здравствует, и твоего Государскаго здравия присла мя вопросити, и сии дары присла Царския ради почести. Нечестивый же Царь возъярився и паче исполнися ярости и гордости окаянный, абие сверг башмак от правыя ноги, и рече: Захария! се ти дарую от великия славы твоея пришедшу от ноги моея отпадшее. Такова бо есть наша Царская почесть, аще кого хощем жаловати. Захария же воздаде честь мудре нечестивому Цареви. Царь же подивися мудрым ответом Захарииным и повеле присланныи дары воином взяти, рекущи: возмите себе то и купите себе плети на кони. Злато бо и сребро Князя Димитрия все будет в руку моею; Землю же его разделю служащим мне, а самаго приставлю стадо пасти верблюжее. Тогда Захария ревностию разжегшися о Государе своем и рече Мамаеви: что глаголеши сие таковому Великому Государю? Бог елико хощет, то сотворит, а не яко же ты хощеши. Предстоящии же хотяху Захарию убити: но запрети Мамай, и нача прельщати Захарию мягкими словесы, обещая его властеля в Руссии сотворити. Захариа же такожде лесть восприемши в сердце своем, да от рук его скорее свободится, рече к Царю: не подобает послу не совершивши посольства своего Государя, к иному Царю престати. Прежде повели ми книги дати посольныя и посольство совершу, и паки к тебе возвращуся Царю, да тако и тебе верен буду, яко не солгах первому Государю. Нечестивый же Царь уловлен бысть мудрыми словесы Захарьиными, и отпусти его писанием к Великому Князю Димитрию. Посла же с Захариею и четырех Князей честных и любимых своих, Постельника своего, да Дьяка, да Конюшего и Ключника, и с ними некиих Татар.

ГРАМОТА ЖЕ ОТ ЦАРЯ Мамая сицевым образом написана бяше: «От восточнаго Царя, от большия Орды, от широких поль, от сильных Татар, Царь Царей Мамай и многим Ордам Государь: рука моя многими Царствы обладает, и десница моя на многих царствах облежит: ратаю нашему Димитрию Московскому. Ведомо ти есть, яко улусы нашими обладаеши, а нашему Царству пришед не поклонишися. Да есть ти ведомо и будет, днесь рука моя хощет тя казнити. Аще ли еси млад, то прииди ко мне и поклонишимися, да помилую тя и в твое место пошлю тя царствовати. Аще ли сего не сотвориши вскоре, вся грады твоя имам разорити и огню предати, и самаго тя велицей казни предам».

ОТШЕДШИ ЖЕ ЗАХАРИЯ от проклятаго Мамая, благодарение возсылаше Богу, яко отпусти его Мамай, и не размыслив послати окаянных своих любимых с ним; и егда приближися к реце Оце и четыри Татарины с ним нарочитые и прочии послании Татарове на Русь, посла с дороги Захария тайно к Великому Князю вестника, чтобы послал в сретение ему, а Татаром рече: уже вас честно стретят от Великаго Князя. Великий же Князь скоро послал в сретение Захариино триста человек избранных Двора своего, и стретоша Захарию недалече от реки Оки. Захариа же дождався своих, абие повел хватати Татар и вязати; и взем грамату Мамаему, посланную к Великому Князю, предра ю на двое, и выбрав хуждшаго Татарина, вда ему раздранную грамату и отпусти его к Мамаю глаголя: рци безумному Царю, яко не обретох в человецех безумнейша его, а грамату его безумия пред светлыи очи Государя своего, Великаго Князя, не принесох и прочтох аз сам ю, и видев безумие Мамаево, посмеяхся. Прииде же Татарин и возвести сия вся Мамаю и грамату раздрану даде ему. Царь же нечестивый воскочи и нача яритися, и повеле всячески подвизатися воем своим на Русь.

ЗАХАРИЯ ЖЕ ПРИИДЕ благополучно в славный град Москву и удари челом своему Государю, Великому Князю Димитрию Ивановичу, и всех Татар связанных приведоша ту. Князь же Великий радостен бяше вельми о возвращении Захариином и о умном посольстве его. Уведавши же известно от Захарии о неложном востании безбожнаго Мамая, и яко скоро грядет, нача радоватися наипаче и тешитися о Бозе, укрепляя брата своего и всех Князей Руских противу безбожнаго Мамая. Готовящижеся на брань, умысли ити в Монастырь Святыя живоначальныя Троицы на поклонение единому Богу, в Троице Святой славимому, и на восприятие благословения от Преподобнаго Отца Сергия чудотворца.