И. Сапожникова - Мечта о русском единстве. Киевский синопсис (1674)

ВЕЛИКИЙ КНЯЗЬ Димитрий, повинувшися совету Митрополитову, избраннаго и благоразумнаго от предстоящих своих именем Захарию Тутчева, или Тушинина, посла с многими дарами к Мамаю, придавши ему и два толмача. Захария же дойде земли Резанския, и слышав, яко Олег Резанский и Олгерд Литовский приложилися к Мамаю, посла тайно к Великому Князю, извещая о толиком своих другов неприятелстве. Князь же Великий слышав то, нача сердцем двизатися и исполньшися печали, помолися Господеви глаголя: Господи Боже мой! на единаго тебе надеюся правду любящего. Аще бы враг пакости деял, претерпел бых; яко бо искони враг есть роду Христианскому.

Сии же друзи и искрении мои тако на мя умыслиша. Суди же, Господи, по правде межи има и межи мною, да скончается злоба грешных. По молитве пойде Великий Князь с братом своим к Преосвященному Митрополиту и поведа ему о преложении Ольга Резанскаго и Олгерда Литовскаго к Мамаю, глаголя с плачем: согреших, Отче Святый пред Богом: но им никоея обиды не сотворих. Доволен бо есмь своим княжением; не вем же, чесо ради умножишася стужающии ми. Отвеща же Митрополит, яко суетная их вражда и неправедное восстание на мя, Княже Великий; сего ради не скорби, но просветися веселием о Бозе помощнице своем. Той тя избавит и прославит. Аще бо, Государю, человека хранит Бог, то не может его весь Мир убити; от крепкия же руки его и от всевидящаго ока владычняго где мощно укрытися и избыти? и теми словесы Архиерейскими укрепися Великий Князь Димитрий и на Господа печаль свою возложи.

КНЯЗЬ ВЕЛИКИЙ Димитрий Иванович с братом своим и со всеми советниками подумавши, посла на стражу против Мамая крепких своих и разумных оружников, Иоанна Ржевскаго, Иакова Усатаго и Василия Тупника и многих с ними богатыров; и повеле им ехати со всяким опасением под Орду, языка доставати и правды о Мамаевом намерении доведатися. Потом же повеле Великий Князь грамоты разослати по всем градом, да все будут готовы на брань с безбожными Агаряны, и да снемлются все на Коломне в Успение Пресвятыя Богородицы.

ВИДЯЩИ ВЕЛИКИЙ Князь Димитрий, яко первая стража замедли, паки подумавши с братом своим и с Боляры, умысли послати вторую стражу и заповеда им возвратитися вскоре. На стражу же послани бяху Климент Полянин, Иван Свяслов, Григорий Судок и иныи многие с ними. Сии же пошедше, стретоша на пути Василия Тупника с языком, иже язык поведа Великому Князю Димитрию, яко неложно идет Царь Мамай на Русь, и како обослася с ним Олег Резанский и Олгерд Литовский, и не спешит, ждет осени. Услышавши то слово Великий Князь, нача молитися: Владыко Господи Иисусе Христе, воплотивыйся от чистыя девы Марии нашего ради спасения и избавлей нас от работы вражия! призри и ныне, пресвятый, на смирение наше, и смири, Господи, гордое сердце окаяннаго Мамая. Посем обращся к брату своему и к всем Князем и Воеводам глаголаше укрепляя их: гнездо есмы братие Великаго Князя Владимира Киевскаго, иже нас извел от тмы идолослужения и просветил истинною в Бога истиннаго верою. Поревнуем же ему, да биемся до смерти за Веру святую с погаными Татарами. Господь нам помощник, не убоимся; что сотворит нам человек? Аще кто от нас и умрет за Веру, то с Святыми мучениками в Небе венец восприимет. Отвеща же Князь Владимир, брат Великаго Князя, и вси с ним Князи реша: праведно сие есть, яко за Веру святую умирающии от Бога воздаяние приемлют вечное, и мы готовы есмы все на войне с Татарами и головы свои за Веру святую положити. Тое услышавши Великий Князь Димитрий, яко все дерзновенно тщатся к брани, зело утешился.

ПО ПОВЕЛЕНИЮ ВЕЛИКАГО Князя Димитриа приспеша Русские Князи и Воеводы и многия воинства в урочное время на день Успения пресвятыя Богородицы к Москве, и все радующеся о Великом Князе своем Димитрии, едиными усты глаголаху: соверши, Боже, течение наше имени ради святаго твоего!

Приидоша же Князи Белоезерскии с многими силами вельми чинно к бою устроенными, Князь Феодор Семенович, Князь Семен Михайлович, Князь Андрей Скимский, Князь Глеб Каргопольский, и Князи Ярославстии с своими силами, Князь Андрей Ярославский, Князь Роман Прозоровский, Князь Лев Курбский, Князь Димитрий Ростовский и иныи Князи и с ними многии Бояре и дети Боярские.