Александр Андреев: Подхватившие щит

В лето 1376 князь великии Дмитреи Иванович посылал брата своего князя Володимера Андреевича ко Ржеве и стоя у града, а града не взя.

Тое же зимы приехаша из Царяграда от патриарха Филофея некоторая два протодиакона, сановника суща, един ею именем Георгий, а другии Иван, к Алексею, митрополиту всеа Русии.

Тое же зимы князь великий Дмитреи Иванович посла князя Дмитрея Михаиловича Волынского ратью на безбожные Болгары.

В лето 1377 промежу говении, месяца февраля 12, на память святого отца Мелетиа, епископа Мелетииского, в день 5-й, а заутренюю годину, преставися пресвященныи Алексии, митрополит всея Руси, в старости глубоце, честне, быв в митрополитех лет 24, и положен бысть на Москве в церкви святого архангела Михаила, иже сам сзда общии монастырь. Сии убо преподобныи отец наш Алексеи митрополит беаше родом болярин, славных и нарочитых бояр Литовскых, от страны Русскыя, и от области Московскыя, благоверну и благородну родителю сын, отца, нарицаемого Феодора, и от матери, именем Мариа. Родижеся в княжение великое в Тверское Михаилово Ярославичя, при митрополите Максиме, до убиениа Акинфа Тверского, старее сыи князя великого Семена 17 лет; крести же его, еще младенца суща, князь Иван Данилович, еще сыи не в великом княжении; бе же преже в святом урещении наречено бысть имя ему Симеон, и еще детищем быв изучися всеи грамоте, и в юности сый всем книгам извыче, из млада Бога взлюбив и оставле родителя своя и женитву, и яже по плоти ужики и ближники, и всяко мирское пристрастие взненавиде, Богу едину работати вжеле, и видимому верстою, яко двадесяти лет сыи, изыде из мира и в едином от манастыреи постризается, и Алексеи преименование в мнишеском чину приемлет. Сеи добре подвизася на добродетель и всяко благоизволение иноческого житиа исправль и всяко писание ветхого и нового Завета проиде, и пребысть в черничестве даже до 40 лет, и добродетельного ради житиа его честенбысть и славим всеми, и любим мноземи; паче и сам князь великий Семен Иванович, купно же и Феогност митрополит зело взлюбиша его, и таино некако назнаменоваша его, и таковые благодати достоина бывши, и за премногую его добродетель избраша его и нужею взведоша его на стареишиньство, яко быти ему наместнику и наследнику по Феогносте митрополитом в Руси, еже и бысть. Того бо ради пресвященныи Феогност митрополит, еще сыи при своем животе, сам постави его епископа своима руками с прочимы епископами; и тако Алексеи пребысть епископом три лета иили четыре, деиствуя епископская и святительская, дондеже преставися Феогност митрополит, и потом по преставлении Феогноста митрополита, общим советом и думою всех людеи и избранием князя великого Ивана Ивановича, боле же рещи изволением Божиим, понужен и отпущен бысть к Царюграду на поставление митрополиа. И Божиим поспешением в малых днех путное шествие преходит, елико по суху без пакости преиде, елико по водам без беды плытье, морскую пучину преплавая, вскоре устремився постигает Царьграда, в нем же и митрополитом на Русь поставляется рукама Божиа святителя, святеишаго и блаженного архиепископа Костянтинаграда, Нового Рима, и вселенского патриарха Филофиа и елико с ним служивших тогда пресвященных митрополит и боголюбивых епископ и всех священник, бывших тогда в честнем том сборе, и не долговременно по поставлении пребыв, отпущается Царяграда благословением патриарха Филофиа и всего честного его собора, и незамедленно приходит на свою митрополию, на Русскую землю, и пребысть в святительстве и в учительстве долгоденствуя многа лета, уча слову Божию, по благочестии побарая, правя слово истинны православныя веры, поставляя епископы и священники, попы, диаконы. Бяху же епископы ставлениа его: первыи Игнатии, епископ Ростовскыи, Василеи, епископ Рязанский, Феофилакт, епискоа Смоленский, Иван Сараискыи, Парфении Смоленскии, Ыилимон Коломенскии, Петр Ростовскии, Феодор Тверскии, Нафанаил Брянскии, Афанасии Рязанскии, Алексеи Суждальскии, Алексеи Новогородскии, Василеи Тверскии, Данило Суждальскии, Матфеи Сараискыи, Арсении Ростовскии, Еуфимии Тверскии, Герасим Коломенскыи, Григореи Черниговскии, Данило Смоленскии. Поставил же есть и церковь камену во имя святого архангела Михаила, юже украсил подписью и иконами и книгами, и златыми сосуды священными. Сзда же себе таковыи монастырь за дванадесять лет до своего си преставления. Самого себе в том монастыри повеле положити преставльшася, идеже есть и до ныне гроб его входя в церковь одесную олтаря. В чернци пострижеся двадесяти лет, а в чернечестве поживе 40 лет, а в митрополиты поставлен бысть 60 лет, а пребысть в митрополитех 24 лета и бысть всех днеи житья его лет 85.