Александр Андреев - Подхватившие щит

В лето 1361 убиша царя Ходыря.

В лето 1362 ходиша князи Московские Дмитрии Иванович, Иван Иванович, Володимир Ондреевич на Галицкого князя Дмитрия, и прогнаша и а княгиню полониша. Тое же зимы князь Дмитрий Иванович сгони с Переяславля Дмитрия князя Суздальского, а сам седе на великом княжении.

В лето 1363 князь Дмитреи Иванович ходи ратью на Суждаль.

В лето 1365 пресвященныи Алексеи, митрополит всеа Русии, заложи церковь камену во имя святого архангела Михаила, единого лета и почата и кончана и священа бысть.

Того же лета Тагаи, князь ординский, из Наручади прииде ратью Татарскою на Рязанскую землю и пожже град Переяславль. Князь же великий Олег Рязанский с своею братью с Володимером Пронским и Титом Козельским, собрав силу свою, и иде вслед его, и постиже его на месте, нарицаемем под Шишевским лесом, на Воине, и бысть им бой, брань зело люта и сеча зла, и поможе Бог великому князю Олгу, и братии его Пронскому и Козельскому, а Тагаи в мале дружине едва убежал.

В лето 1368 князь Андреи Полоцкий воева Хорвань да Родие, а князь Володимер Андреевич прише ратью взял Ржеву.

Того же лета князь великии Дмитреи Иванович Московский и Алексеи митрополит князя великого Михаила Александровича Тверского зазвавши его любовия на Москву, и бысть им суд на третеи день на миру, а в правде, да его изымали, а что было бояре его около его, тех всех поимали, разно разведоша, и быша вси в нятьи, и держаша их в истоме, а князь Михайло тогды сидел на Гавшине дворе. И потом не за долго время внезапу приидоша от орды Татарове Корач; они же подумавше и тако попускаша их в свояси. Князь же Михайло сжалися вельми и о том негодоваше, и не любо ему бысть, и положи то в измену; и про то имеаше розмирие к великому князю, пачеже на митрополита жаловашеся, к нему же веру имел паче всех, яко по истине святителю. Того же лета князь великий Дмитреи Иванович собра вои многы и посылал рать на князя великого Михаила Александровича Тверского. Князь же великии побежа в Литву к князю Олгерду, зятю своему, прося помощи себе и обороны.

Тое же осени месяца декабря Ольгерд князь Литовский и брат его Кестетеи, приходили ратью к Москве и заставу Московскую побили на Тростне, а у града у Москвы стояше три дни, и во своясы возвратившеся.

А на те ж зиме князь Володимер Ондреевич Московскый ходил в Новгород Великии Плесковичем на помощь.

В лето 1370 прииде в другий ряд Ольгерд князь Литовский в силе тяжце к Москве и стоял у города 10 ден, загородеь пожже, а города не взял. Князь же великий Дмитреи Иванович затворися во граде, а Олексеи митрополит тогды был в Нижнем Новгороде, а князь Володимер Андреевич, собрався с силою, стояше в Перемышле ополчився, а еще же и к тому же приспел князь Володимер Дмитреевич Пронский, а с ним рать князя Олга Рязанского. То же слышав Олгерд и убояся и начат мира просити и всхоче дати дщерь свою за князя Володимера Андреевича, еже и бысть.

В лето 1371 выиде из Орды князь Михайло Александрович на великое княжение и восхоте сести на столе в Володимери и не прияша его, а рекучи так – взял еси лжею великое княжение; того же лета князь великыи Дмитреи Иванович поиде в Орду. В то же время за князя Володимера Андреевича обручиша Олгердову дчерь именем Олену. Тою же осень князь великий Дмитреи Иванович выиде из Орды; на ту же зиму князь великий Дмитреи Иванович посла рать на Рязань на князя на Ольга и воеводу с ними посла князя Дмитрея Михаиловича Волынского. Князь же Олег собра воя многы, изыде против их и стретошася на Скорнищеве. Рязанци же, сурови суще, друг к другу рекоша: «не имлите с собою доспехов, ни щитов, ни копья, ниже коего иного оружиа, но токмо емлите с собою едины ужища каждо вас, имже вязати начнете москвичь, понеже суть слабы и страшливы и не крепци». И бысть им брань люта и сеча велика перед Рожеством Христовым и поможе Бог князю великому Дмитрею, а князь Олег убежал в мале дружине, и седе тогда на княженьи на Рязанском князь Володимер Пронский.

Тою же зимы князь Володимер Андреевич Московский оженяся у великого князя у Ольгерда Гедиминовича Литовского.

В лето 1372 князь Олег Рязанский приде ратью на Рязань на князя Володимера Пронского и согна его, а сам седе на княжении на великом.

В лето 1373 Ольгерд князь Литовский поиде ратью к Москве, слышав же князь великии Дмитреи Иванович поиде противу и стретошася у града у Лубудска, и взяша мир и розидоша.

В лето 1374 благородныи и христолюбивыи князь Володимер Андреевич заложи град Серпухов в своей отчине и повеле его снарядити и срубити дубов, а людем приходящим и гражаном живущим в нем, и человеком тржествующим и куплю творящим и промышляющим подаст великую волю и ослабу и многую лготу; приказа наместничество держати града Якову Юрьевичу, нарицаемому Носильцу, околничему своему. Того же лета пакы тот же христолюбивыи князь Володимер Андреевич помысли в собе мысль благу, яже о святеи церкви Божии, и яже о монастырском устроении. Всхоте взградити себе монастырь в Серпохове на Высоком и всхотев создати богомолью, бяше бо князь любяи монастыри и честь велику вздая мнишскому чину.