Схиигумен Савва - Полное собрание проповедей и поучений

Величание

Ублажаем тя, преподобне отче наш Савво, и чтем святую память твою, наставниче монахов и собеседниче ангелов. Преподобному Серафиму, Саровскому чудотворцу

Тропарь, гл. 4

От юности Христа возлюбил еси, блаженне, и Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матери явился еси. Сего ради вопием ти: спасай нас молитвами твоими, Серафиме, преподобие отче наш!

Молитва

О великий угодниче Божий, преподобие и богоносне отче наш Серафиме! Призри от горния славы на нас, смиренных и немощных, обремененных грехами многими, твоея помощи и утешения просящих. Приникни к нам благосердием твоим и помози нам заповеди Господни непорочно сохраняти, веру православную крепко содержати, покаяние во гресех усердно Богу приносити, во благочестии христианстем благодатно преуспевати и достойны быти твоего о нас молитвенного к Богу предстательства.

Ей, святче Божий! Услыши нас, молящихся тебе с верою и любовию, и не презри нас, требующих твоего заступления: ныне и в час кончины нашея помози нам и заступи нас молитвами твоими от злобных наветов диавольских, да не обладает нами тех сила, но да сподобимся помощию твоею наследовати блаженство обители райския. На тя бо упование наше ныне возлагаем, отче благосердный: буди нам воистину ко спасению путевождь и приведи нас к Невечернему Свету жизни вечныя благоприятным предстательством твоим у престола Пресвятыя Троицы, да славим и поем со всеми святыми достопоклоняемое имя Отца и Сына и Святаго Духа во веки веков. Аминь. Преподобномученику Корнилию, Псково-Печерскому чудотворцу

Тропарь, гл. 6

Псково- Печерская обитель издавна славна чудесами иконы Богоматерней, многая иноки Богови воспита. Ту и преподобный Корнилий подвигом добрым подвизася. Чудную Богоматерь славя, иноверныя просвещая, иноков и многая люди спасая, обитель же свою дивно украшая и ограждая. Ту и мученичества венец по многих летах пастырства своего доблестне прия.

Темже возрадуемся, людие, Христа Бога и Пречистую Его Матерь возблагодарим. Яко дарова нам преподобномученика славна и молитвенника о душах наших достоблаженна.

Молитва

Святый преподобномучениче Корнилие! Смиренно припадаем к раце мощей твоих и умильно молим тя: милостиво призри на скорби наша душевныя и телесныя и избаву нам подаждь. Помози нам, святче Божий, от навета злых человек, от них же и сам ты невинно на земли пострадал еси, защити нас от насилия диавола, страстно воюющаго в немощных удесех наших: умоли Господа Бога и Пречистую Его Матерь даровати нам тихое безгрешное житие, взаимную братскую нелицемерную любовь и мирную христианскую кончину, да чистою совестию предстанем нелицемерному Страшному судилищу Христову и в Царствии его прославим Животворящую Троицу, Отца и Сына и Святаго Духа, во веки веков. Аминь. Ежедневная исповедь перед отцом духовным

Прости мя, отче святый, и благослови, елика согреших во вся дни живота моего и в сей день без числа согреших: душею и телом, сном и леностию, помрачением бесовским, в мыслях нечистых, в забытии ума и во осуждении, согреших сердцем и всеми моими чувствы: слухом и зрением, вкусом и обонянием, и осязанием; волею и неволею, ведением и неведением; и несть того греха, еже не сотворих, но о всех каюся. Прости мя, отче святый, и благослови и помолись о мне грешном. Аминь. Молитва перед началом всякого дела

Господи Иисусе Христе, Сыне Единородный Безначальнаго Твоего Отца, Ты рекл еси пречистыми усты Твоими: «Яко без Мене не можете творити ничесоже»; Господи мой, Господи, верою объем в душе моей и сердце Тобою реченная, припадаю Твоей благости: помози мне грешному сие дело, мною начинаемо, о Teбе Самем совершити, во имя Отца и Сына и Святаго Духа. Аминь. Молитва для путешествующих

Боже, Боже наш, Истинный и Живый Путь, путешествовавый со слугою Своим Иосифом, спутешествуй, Владыко, рабу Твоему ( имя ) и всякого обуревания и навета избави, и мир благомощне паки устрой: всякия правды Промысл творяща по заповедям Твоим, и исполнена житейских и небесных благ бывша, паки возвратитися благоволи, яко Твое есть царство и сила и слава, Отца и Сына и Святаго Духа, ныне и присно и во веки веков. Аминь.

О Пресвятая Владычице моя, Дево Богородице, Одигитрие, Покровительнице и упование спасения моего! Се, в путь мне предлежащий ныне хощу отлучитися и на время сие вручаю Тебе, Премилосердной Матери моей, душу и тело мое, вся умная моя и вещественныя силы, всего себе вверяю в крепкое Твое смотрение и всесильную Твою помощь. О Благая Спутнице и Защитнице моя! Усердно молю Тя, да не ползок путь мой сей будет, руководствуй мя на нем и направи его, Всесвятая Одигитрие, якоже Сама веси, ко славе Сына Твоего, Господа нашего Иисуса Христа. Буди ми во всем помощница, наипаче же в сем дальнем и многотрудном путешествии. Соблюди мя под державным покровом Твоим от всяких находящих бед и скорбей, от враг видимых и невидимых, и умоли о мне, Госпоже моя, Сына Твоего Христа Бога нашего, да послет в помощь мне ангела Своего мирна, верна наставника и хранителя, да якоже древле даровал еси рабу Своему Товии Рафаила, на всяком месте и во всякое время храняща его в пути от всякаго зла: тако и мой путь благополучно управив и сохранив мя Небесною Силою, здрава да возвратит мя, мирна и всецела к жилищу своему во славу имени Своего Святаго, славяща и благословяща его во вся дни живота моего и Тебя величающа, ныне и присно и во веки веков. Аминь.