авва Дорофей Array - Аскетика. Том I

Вопрос 75, тогожде к томужде старцу, о сне, колико подобает спати и

колико бдети? и коликими подобает доволну быти одеждами?

Ответ.О сне нощнем: молися два часа с вечера, считая сия от захождения солнца, и славив, спи шесть часов: и востани на бдение, и сотвори оставшияся четыре часы. И в жатву такожде: обаче сокращеннее в жатву, и мало псалмов, умаления ради нощей. И о одеждах: немощный, за слабость тела своего, должен есть имети зимния и летния. Доспевый же апостолова слова: «еже алкати, и жаждати, и наготствовати» (1 Кор. 4, 11) преходит время свое в единой ризе. Прочее, брате, да не высокомудрствуем, но смиренными да водимся, и да не ропщем, имуще по две или по три одежды.

Вопрос 76, тогожде к томужде старцу: понеже рекл ми еси отче, яко шесть часов бди; како могу познати, яко шесть часов побдех?

Ответ.Аще со опасством уразумети хощеши часы: уснув во един день за изнеможение тела, и бдев едину нощь от вечера до утра, разсмотри, сколько прочитаеши изустно Псалтыря, на часы же разделив известно. И в жатву сотвори тако, и явленни ти будут часове.

77. Тогожде к великому старцу:

Отче, помолися о мне, яко болю, и да возмогу с радостию болезнь понести, и рцы ми, како омыю скверны?

Ответ.Брате любезнейший, радость твориши мне твоими словесы: яко паче по мне еси, не разумевая глаголемых тобою. Рекл еси себе грешна в прошениих: а грешный зол есть раб; и ныне рекл еси, яко имаши болезнь: а болезнь наказание есть исповедуемо. Темже убо, наказание оно послано есть злому рабу. Аще убо тяжестно ти есть приимати наказание, престани быти зол. Аще же зол еси, то приими наказание: аще ли же радуешися наказуемь, то неси зол. Не сый же зол, возлюблен есть. Егоже бо любит Господь, наказует, виждь убо по истине, кто еси? и избери себе едино от реченных тебе. Знает же Бог, яко аще и мое презираю спасение, но творю по силе моей о вас, бояся заповеди. Скверны же аще хощеши омыти, слезами омый: всяку бо скверну омывают чисто: вопий Иисусови, дондеже измолкнет гортань твой: «Наставниче, спаси, погибаем» (Лк. 8, 24; Мф. 8, 25). Возми пепел от сердца твоего, и возжги огнь той, егоже Господь прииде воврещи на землю, и пояст вся сия, и благозвенящо изнесет злато твое и искусно горнило. Трезвения многа треба.

Вопрос 78, тогожде к томужде старцу:

Молю уразумети, откуду бывает слабость тела и истаяние сердца? и чего ради не стою во едином уставе пищи?

Ответ.Брате, удивляюся и изумляюся, како иже в мире желающе приобретати, или воинствовати, нерадят и о дивиих зверех, и о наветах разбойник, и о бедствиях моря, и о самой смерти, и не пренемогают душею желаемаго ради богатства: и сие неизвестно имуще! Мы же окаяннии и ленивии, приемшии власть наступати на змии и на скорпии, и на всю силу вражию, и слышавшия: «Аз есмь, не бойтеся» (Ин. 6, 20), явно ведяще, яко не нашею силою ратуемся, но силою укрепляющаго и вооружающаго нас Бога, пренемогаем и унываем! И откуду сие? Понеже не пригвоздишася плоти наша страху Его, и николиже забыхом снести хлеб наш от гласа воздыхания нашего: сего ради прелагаемся от сего в сие, и от единаго устава пищи в другий устав: яко не прияхом совершенно огня, егоже Господь прииде воврещи на землю: зане той имел бы сожещи и поясти терние от мысленныя нашея нивы: слабость наша и нерадение, и телолюбие не оставляют нас возникнути. И свидетель ми есть Господь, яко вем человека, и зде есть в благословенном обществе сем: и да не речет кто, яко о себе глаголю, и имать мя нечто, ничтоже суща: яко аще пребудет сей якоже есть, ничтоже ядый, ни пияй, ниже одеждою облачимь, до дне посещения Господня к нему, не востребует сих во век. Пища бо его и питие и одеяние, Дух Святой есть. Аще хощеши убо поревновати, трудися, потщися, бойся Бога, и сотворит волю твою. Рече бо, яко «волю боящихся его сотворит» (Пс. 144, 19). И аз бо, аще и ничтоже есмь, но заповеди ради творю по силе моей. Божие же есть еже утвердит, и крепость подати, и возвести во всякое дело благое, и сохранити от всякаго зла, и спасти во Своем Царствии. Тому слава, аминь. Помолися о мне, и умоли старца такожде помолитися с тобою.

Вопрос 79, тогожде к томужде великому старцу:

Молютися, отче, рцы ми: како стяжавает кто смиренномудрие, или молитву совершенную? И что творя кто не мнится парити; и что полезно есть читати?

Ответ.Еже стяжати совершенное смиренномудрие, брате, научи Господь, глаголя: «научитеся от Мене, яко кроток есмь, и смирен сердцем, и обрящете покой душам вашим» (Мф. 11, 29). Аще убо стяжати хощеши совершенный покой, уразумей, что Он претерпел есть, и претерпи, и отсецы во всех волю твою. Сам бо рече: «снидох с небесе, сотворити не волю Мою, но волю Отца Моего, Иже на небесех» (Ин. 6, 38). Сие же есть совершенное смиренномудрие, еже сносити укоризны и поношения, и елика пострада Учитель наш Иисус. Молитва же совершенна есть, еже глаголати Богови без парения, внегда собирати вся помыслы с чувствами. Наставляет же в сие человека, еже умрети от всякаго человека, и умрети мирови, и всем сущим в нем. И ничтоже вящше должен еси глаголати Богови в молитве, разве сие: избави мя от лукаваго, да будет воля Твоя во мне: имети же ум, яко Богови предстояй, и Тому глаголяй. Познавается же егда пременяется от парения, и видит, яко веселится ум, просвещся во Господе. Знамение же, яко коснуся тоя, яко не ктому смущается, аще и напаствует его весь мир. Совершенне же моляйся есть умерщвляяй себе мирови и покою его. Творяй же Бога ради прилежне дело свое, сие несть парение, но тщание по Богу. Полезно же есть чести жития отец. Тако бо просвещается ум во Господе.