Николай Кузнецов - Я люблю читать мою любимую книгу. Черновик

Ныне отпущаеши Раба Твоего, Владыко, по Глаголу Твоему, с Миром, яко видесте очи мои Спасение Твое, еже еси уготовал пред лицем всех людей:

Свет во откровение языком, и Славу людей твоих Израиля.

Иосиф и мати Его чудящася о глаголемых о Нем.

И благослови Симеон, и рече к Марии матери Его: Лежит на падение и на востание многим во Израили, и в знамение пререкаемо,

и Тебе же Самой душу пройдет оружие, яко да открыются от многих сердец помышления.

И Анна пророчица, дщи Фануилева, от колена Асирова, заматоревши во днех мнозех, живши с мужем седмь лет от Девства своего, и та вдова лет осмьдесят и четыре, яже не отхождаше от церкве, постом и молитвами служащи день и нощь.

И та в той час приставши исповедашеся Господеви, и глаголаше о Нем всем чающим избавления во Иерусалиме. Иисусу же рождшуся в Вифлееме Иудейстем во дни Ирода царя, волсви от восток приидоша во Иерусалим, глаголюще: Где есть рождейся Царь Иудейский? Видехом звезду Его на востоце и приидохом поклонитися Ему.

Слышав же Ирод царь смутися, и весь Иерусалим с ним.

И собрав вся первосвященники и книжники людския, вопрошаше от них: Где Христос раждается?

Они же рекоша ему: В Вифлееме Иудейстем, тако писано есть Пророком: И ты, Вифлееме, земле Иудова, ни чим же менши еси во владыках Иудовых, из тебе изыдет Вождь, иже упасет люди Моя Израиля.

Тогда Ирод тай призва волхвы, и испытоваше от них время явльшияся звезды, и послав их в Вифлеем, рече: Шедше испытайте известно о отрочати, егда же обрящете, возвестите ми, яко да и аз шед поклонюся Ему. Они же послушавше царя, идоша. И звезда, юже (которую) видеша на востоце, идяше пред ними, дондеже пришедши ста верху, идеже Отроча.

Видевше же звезду, возрадовашася радостию велиею, и пришедше в храмину, видеша Отроча с Мариею материю Его, и падше поклонишася Ему, и отверзше сокровища своя, принесоша ему дары: злато и ливан и смирну. И весть приемше во сне не возвратитися ко Ироду, иным путем отидоша во страну свою. Отшедшим же им, Ангел Господень во сне явися Иосифу, глаголя: Востав поими Отроча и матерь Его, и бежи во Египет, и буди тамо, дондеже реку ти, хощет Ирод искати отрочате, да погубит Е.

Он же востав, поят Отроча и Матерь Его нощию, и отиде во Египет, и тамо до умертвия Иродова, да сбудется реченное от Господа Пророком, глаголющим: От Египта воззвах Сына Моего. Тогда Ирод видев, яко поруган бысть от волхвов, разгневася и послав убить вся дети в Вифлееме и во всех пределех его, от двою лету и нижайше, по времени, еже известно испыта от волхвов.

Тогда сбыстся реченное Иеремием Пророком, глаголющим:

Глас в раме слышан бысть, плачь и рыдание и вопль мног, Рахиль плачущися чад своих, и не хотяше утешитися. Умершу же Ироду, Ангел Господень во сне явися Иосифу во Египте, глаголя: Востав поими отроча и матерь Его и иди в землю Израилеву, изомроша ищущии Души Отрочате. Он же востав, поят Отроча и Матерь Его и прииде в землю Израилеву. Слышав же, яко Архелай царствует во Иудеи вместо Ирода отца своего, убояся тамо ити, Весть же приемь во сне, отиде в пределы Галилейския. И пришед вселися во граде нарицаемем Назарет, яко да сбудется реченное Пророки, яко Назорей наречется. И яко скончашася вся по закону Господню, возвратишася в Галилею, во град свой Назарет. Отроча же растяше и крепляшеся Духом, исполняяся премудрости, и благодать Божия на Нем. И хождаста родителя Его на всяко лето во Иерусалим в праздник Пасхи. И егда бысть двоюнадесяти лету, восходящим им во Иерусалим по обычаю праздника, и скончавшим дни, и возвращающимся им, оста отрок Иисус во Иерусалиме, и не разуме Иосиф и мати Его, мневша же Его в дружине, преидоста дне путь, и искаста Его во сродницех и в знаемых, и не обретша Его, возвратистася во Иерусалим, взыскающа Его. И бысть по триех днех, обретоста Его в церкви, седящаго посреде учителей, и послушающаго их, и вопрошающаго их, ужасахуся же вси послушающии Его о разуме и о ответех Его. И видевша Его, дивистася, и к Нему мати Его рече: Чадо, что сотвори нама тако? Отец твой и аз боляща искахома Тебе. И рече к нима: Что яко искаста Мене? Не веста ли, яко в Тех, яже Отца Моего, достоит быти Ми? И та не разуместа глагола, его же Глагола има. И сниде с нима, и прииде в Назарет, и повинуяся има. И мати Его соблюдаше вся глаголы в сердцы своем. И Иисус преспеваше премудростию и возрастом и благодатию у Бога и человек.

В 15-ое (пятое же надесяте) лето владычества Тивериа Кесаря, обладающу Понтийскому Пилату Иудеею, и четвертовластвующу Галилеею Ироду, при Архиереи Анне и Каиафе, бысть глагол Божий ко Иоанну Захариину сыну в пустыни. И прииде во всю страну Иорданскую, проповедая Крещение Покаяния Во Оставление Грехов, яко же есть писано в книзе словес Исаии Пророка, глаголюща: Глас вопиющаго в пустыни, уготовайте путь Господень, правы творите стези Его, всяка дебрь исполнится, и всяка гора и холм смирится, и будут стропотная в правая, и острии в пути гладки, и узрит всяка плоть Спасение. Глаголаше же исходящим народом креститися от Него: Порождения ехиднова, кто сказа вам бежати от Грядущаго Гнева? Сотворите плоды достоины покаяния, и не начинайте глаголати в себе: Отца имамы Авраама. Глаголю вам: Может Бог от камения воздвигнути чада Аврааму, уже и секира при корени древа лежит, всяко древо, не творящее плода добра, посекается и во огнь вметается. И вопрошаху Его народи, глаголюще: Что сотворим? Отвещав же глагола им: Имеяй две ризе, да подаст не имущему, и имеяй изобилие, такожде да творит. Приидоша же и мытари креститися от Него, и реша к Нему: Учителю, что сотворим? Он же рече к ним: Ничтоже более от повеленнаго вам творите. Вопрошаху же Его и воини, глаголюще: И мы, что сотворим? И рече к ним: Никого же обидите, ни оклеветавайте, и доволни будите оброки вашими. Чающим же людем, и помышляющим всем в сердцах своих о Иоанне, еда той Христос, отвещаваше Иоанн всем, глаголя: Аз Водою Крещаю вы, Грядет же Креплий мене, Ему же несмь достоин отрешити ремень сапогу Его, Той вы Крестит Духом Святым и Огнем, Ему же лопата в руку Его, и отребитъ гумно Свое, и соберет пшеницу в житницу Свою, плевы же сожжет огнем негасающим. Многа же и ина, утешая благовествоваше людем.