Николай Посадский - Тебе, Мати Бога нашего, хвалим

45. О Всепетая Мати, Пречистая Госпоже Дево Богородице! Приими сие малое моление наше, Заступнице крепкая сущих в скорбех и печалех, умоляем Тебя Честным и Животворящим Крестом Сына Твоего, Господа нашего Иисуса Христа: подаждь нам дух сокрушенный, сердце смиренное, слезы умиления, многих согрешений наших прощение и радость неувядаемую, да поем в горнем Иерусалиме Спасителю Богу: аллилуиа.

46. От святыя иконы Твоея радости неизреченныя преисполнила еси сердце благочестивыя жены. О Пречистая Владычице мира, Всенощная Царице радосте, Приснодево твари, егда возвратила оной и мужа, и сына, и достояние ея, такожде и всем нам милосердствуеши, даруй исполнение благих желаний, источая приснотекущий источник радости молящимся Тебе и вседушно вопиющим: Радость всему миру родившая, радости исполни неоскудевающия чтущих Тя.

47. Избранней от дщерей человеческих Материю быти Христа Бога нашего, принесем от любви нашея песни хвалебная. Ты же, Сына Божия неизреченно родившая и, яко Младенца, млеком питавшая, сохрани поющих Тя от обышедших нас зол, скорбей и напастей, да зовем Ти немолчно: радуйся, Богородице Дево, Млекопитательнице, милостию Твоею нас присно питающая.

48. О Всехвальная Богородице Дево, нашего Господа и Владыку млеком питавшая! Не презри сего скорбнаго моления нашего, но умоли Сын Твоего, да дарует нам грехов прощение, болезней исцеление, да сохранит от глада, мраза, смертоносныя язвы и нечаянныя смерти и от всех бед и обстояний, да избавльшеся сих, радуяся зовем Ему: аллилуиа.

49. Без семене от Божественного Духа волею же Отчею зачала еси Сына Божия, от Отца без матере прежде век суща, нас же ради, из Тебе без отца бывша плотию, познала еси Младенца и млеком питала еси. Темже не престай молити избавитися от скорбей душам нашим.

50. Избранней от всех родов Пресвятей Госпоже Деве Богородице благодарственная пения приносим Ти, раби Твои, яко прославила еси Божественный образ Твой чудодействием. Ты же, Всемилостивая Владычице, яко имущая державу непобедимую, от всяких нас бед свободи, да зовем Ти: радуйся,

Владычице, иконою Твоею благодать и милость нам являющая.

51. О Всепетая и Всемилостивая Мати, приими ныне молебное пение наше, пред чудотворною иконою Твоею с верою и благоговением Тебе возносимое. Призри милостивно на веру и упование наше и всесильными Твоими молитвами избави нас от всякия напасти, болезни, внезапныя смерти и сподоби в блаженстве вечном со всеми святыми хвалу Богу воспевати: аллилуиа.

52. Избранней Владычице и Заступнице рода христианскаго, знамениями чудес дивных от святыя Своея иконы в стране нашей возсиявшей, благодарственная и умиленная пения немолчно приносяще, яко Матери Господней, в печалех наших и болезнех вопием: радуйся, скорая Утешительнице и Целительнице, любовь Свою и милосердие нам являющая.

53. О Всепетая Мати, Божественная славо и красото небесе и земли, неисчерпаемое чудес море, Заступнице и Хранительнице рода христианскаго и святыя обители Твоея, приими недостойное сие, обаче благодарное, от сокрушеннаго сердца возносимое к Тебе моление, яви нам до конца Матернее Твое милосердие, в скорби и напасти не остави нас сирых, и в час смертный Твоим теплым предстательством причастники вечнаго блаженства сотвори, да, памятуя выну Твоя дивная о нас заступления, со всеми святыми не престанем воспевати Богу: аллилуиа.

54. Веселися, земле Полтавская и все отечество наше православное, се бо яко светозарное солнце, явися пречудная икона Преблагословенныя Богоматере, мир озаряющи множеством чудес Своих; Тою убо обретаем яже на земли вся благая и полезная и сущих на небеси сокровищ сподобляемся, сего ради вопием: радуйся, похвало наша приснопоклоняемая, спаси ны, Тебе молящаяся, единая надеждо и радование вечное поющих Тя.

55. Боголепно во смирении красуется обитель Козельщанская, осеняемая предивным образом Владычицы Пречистыя небесе и земли, Царицы Богородицы, от него же источники благодати и чудес обильно изливаются, и усердно притекающии исцеления верою приемлют, и невернии верою крепкою сердца исполняют, и мы, раби Твои, Богомати, благодарне вопием Ти: радуйся, предстательство христиан непостыдное и обители Твоея красото и радование.

56. Избранней от всех родов Царице и Владычице мира, милостию Своею страну сию озаряющей, похвальное пение приносим Ти, Богородице; Ты же, яко имущая дерзновение к Сыну Твоему и Богу, от всяких нас бед свободи, да зовем Ти: радуйся, Пречудная Владычице, земли Муромския и Рязанския Милостивая Заступница.