Сборник: Единоверческие молитвы

Чин, како подобает пети дванадесять псалмов особь, ихже пояху преподобнии отцы пустыннии во дни и в нощи, о нихже вспоминается в книгах отеческих и в житиях и мучениих святых многих.

Сей же чин принесе от святыя горы преподобный Досифей архимандрит Киево–Печерский.

По обычнем начале глаголем:

За молитв святых отец наших, Господи, Исусе Христе, Сыне Божии, помилуй нас, аминь. [поклон]

Ограждая лице свое, читаем:

Царю небесныи, Утешителю, Душе истинныи, Иже везде сыи и вся исполняя, сокровище благих и жизни Подателю, прииди и вселися в ны, и очисти ны от всякия скверны, и спаси Блаже, душа наша.

Святыи Боже, Святыи Крепкии, Святыи Безсмертныи, помилуй нас. (трижды с поклонами).

Слава Отцу и Сыну и Святому Духу, и ныне и присно и во веки веком, аминь.

Пресвятая Троице, помилуй нас. Господи, очисти грехи наша; Владыко, прости беззакония наша; Святыи, посети и исцели немощи наша; имене Твоего ради.

Господи помилуй (трижды)

Слава Отцу и Сыну и Святому Духу, и ныне и присно и во веки веком, аминь.

Отче наш, Иже еси на небесех; да святится имя Твое; да приидет царствие Твое; да будет воля Твоя, яко на небеси и на земли; хлеб наш насущныи даждь нам днесь; и остави нам долги наша, яко же и мы оставляем должником нашим; и не введи нас во искушение; но избави нас от лукаваго.

Господи Исусе Христе, Сыне Божии, помилуй нас.

Аминь.

Господи, помилуй, 12.

Слава Отцу и Сыну и Святому Духу, и ныне и присно и во веки веком, аминь.

Приидите, поклонимся Цареви нашему Богу (поклон).

Приидите, поклонимся Христу, Цареви и Богу нашему (поклон).

Приидите, поклонимся и припадем к Самому Господу Исусу Христу, Цареви и Богу нашему (поклон).

Псалом 26

Господь просвещение мое и Спаситель мой, кого ся убою? Господь Защититель животу моему, от кого ся устрашу? Внегда приближатися на мя злобующе, снести плотии моих, оскорбляющии мя, и врази мои, тии изнемогоша и падоша. Аще ополчится на мя полк, не убоится сердце мое, аще востанет на мя брань, на Нань аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати церковь святую Его. Яко скры мя в крове Своем в день зла моего, покры мя в тайне крова Своего. На камень вознесе мя, и ныне се вознесе главу мою на враги моя, обыдох и пожрох в крове Его жертву хваления и воскликновения, пою и воспою Господеви. Услыши, Господи, глас мой, им же воззвах, помилуй мя и услыши мя. Тебе рече сердце мое: Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего, помощник ми буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на путь правыи, враг моих ради. Не предаждь мене в душах стужающим ми, яко восташа на мя свидетели неправеднии, и солга неправда себе. Верую видети благая Господня на земли живых. Потерпи Господа, мужайся, и да крепится сердце твое, и потерпи Господа.

Псалом 31

Блажени, им же отпустишася беззакония, и им же прикрышася греси. Блажен муж, ему же не вменит Господь греха, ниже есть во устех его лесть. Яко умолчах, обетшаша кости моя, зовущу ми весь день. Яко день и нощь отяготе на мне рука Твоя, возвратихся на страсть, егда унзе ми терн. Беззаконие мое познах и греха моего не покрых, рех: исповем на мя беззаконие мое Господеви, и Ты отпустил еси нечестие сердца моего. За то помолится к Тебе всяк преподобныи во время благопотребно, обаче в потопе вод мног, к нему не приближатся. Ты еси прибежище мое, от скорби одержащия мя, радосте моя, избави мя от обышедших мя. Вразумлю тя и наставлю тя на путь сей, вонь же пойдеши, утвержу на тя очи Мои. Не будите яко конь имск, имже несть разума, броздами и уздою челюсти их востягнеши, неприближающимся к тебе. Многи раны грешному, уповающаго же на Господа милость обыдет. Веселитеся о Господе, и радуйтеся, праведнии, и хвалитеся, вси правии сердцем.

Псалом 56

Помилуй мя, Боже, помилуй мя: яко на Тя упова душа моя. И на сень крилу Твоею надеюся, дондеже прейдет беззаконие. Воззову к Богу Вышнему, Богу, благодеявшему мне. Посла с Небесе и спасе мя, даде в поношение попирающыя мя. Посла Бог милость Свою и истину Свою, и изъят душу мою от среды скимен, поспах смущен. Сынове человечестии, зубы их оружия и стрелы, и язык их меч остр. Вознесися на Небеса, Боже, и по всей земли слава Твоя. Сеть уготоваша ногам моим, и смириша душу мою. Ископаша пред лицем моим яму и впадошася в ню. Готово сердце мое, Боже, готово сердце мое, пою и воспою во славе моей. Востани слава моя, востани псалтырю и гусли, востану рано. Исповемся Тебе в людех, Господи, пою Тебе во языцех. Яко возвеличися до Небес милость Твоя, и даже до облак истина Твоя. Вознесися на Небеса, Боже, и по всей земли слава Твоя.