Евдокия Агафонова - Православный советчик. Обрести телесную бодрость и уврачевать душу христианской молитвой

Господи, Господи! Праведен еси Ты, и суд Твой праведен: Ты, в предвечной Своей Премудрости, положил еси предел жизни нашея, егоже никтоже прейдет. Премудры Твои законы, неизследимы путие Твои! Ты повелеваеши ангелу смерти изъяти от тела душу у младенца и старца, у мужа и юноши, у здраваго и больнаго по несказанным и недоведомым нам судьбам Твоим; но веруем, яко на сие есть Твоя святая воля, зане, по суду правды Твоея, Ты, Преблагий Господи, яко премудрый и всемогущий и всеведущий Врач душ и телес наших, болезни и недуги, беды и злоключения посылаеши человеку, яко врачевство духовное. Ты поражаеши его и исцеляеши, умерщвляеши в нем мертвенное и оживотворяеши безсмертное, и, яко чадолюбивый Отец, наказуеши, егоже приемлеши: молим Тя, Человеколюбче Господи, приими преставльшагося к Тебе раба Твоего (рабу Твою) (имя), егоже (юже) взыскал еси человеколюбием Своим, наказавый тяжкою болезнию телесною, во еже спасти душу от болезни смертныя; и аще вся сия приял (-ла) есть от Тебе со смиренномудрием, терпением и любовию к Тебе, яко вседетельному Врачу душ и телес наших, яви убо ему (ей) днесь богатую милость Твою, яко претерпевшему (-ей) вся сия грех своих ради. Вмени ему (ей), Господи, сию привременную тяжкую болезнь в некое наказание за прегрешения, содеянныя в сей юдоли плача, и исцели душу его (ея) от недугов греховных. Помилуй, Господи, помилуй взысканнаго (-ую) Тобою, и, наказаннаго (-ую) временно, молю Тя, не накажи лишением вечных Твоих небесных благ, но сподоби его (ее) наслаждатися ими во Царствии Твоем. Аще же усопший (-шая) раб Твой (раба Твоя), не разсуждая в себе, чесо ради бысть сие прикосновение целительныя и промыслительныя Десницы Твоея, стропотно что рече в себе, или, по неразумию своему, возропта в сердце своем, яко бремя сие возмни себе неудобоносимым, или, по немощи естества своего, стужаше долгою болезнию и огорчися злоключением, молим Тя, Долготерпеливе и Многомилостиве Господи, прости ему (ей) сия согрешения по безпредельной Твоей милости и безприкладному Твоему милосердию к нам грешным и недостойным рабам Твоим, прости ради любви Твоей к роду человеческому; аще ли же беззакония его (ея) превзыдоша главу его (ея), болезнь же и недуги не подвигоша его (ю) к полному и искреннему покаянию, умоляем Тя, Начальниче жизни нашея, умоляем Твоими искупительными заслугами, помилуй и спаси, Спасе, раба Твоего (рабу Твою) от вечныя смерти. Господи Боже, Спасителю наш! Ты, по вере в Тя, даровал еси прощение и отпущение грехов, даровав помилование и исцеление тридесятиосмилетнему разслабленному, егда рекл еси: «Ощущаются тебе греси твои»; с сею же верою и упованием на Твою благость, прибегаем к Твоему, о Иисусе Прещедрый, неизреченному милосердию и во умилении сердца нашего молим Тя, Господи: рцы убо и днесь тако слово помилования, слово отпущения грехов усопшему (-шей), приснопоминаемому (-мой) нами рабу Твоему (рабе Твоей) (имя), да исцелеет духовне, и да вселится в месте светле, в месте покойне, идеже несть болезнь, ни печаль, ни воздыхание, и да пременятся тамо болезни и недуги его (ея), слезы страданий и скорбей в источник радости о Дусе Святе. Аминь.

Непобедимый, непостижимый и крепкий во бранех Господи Боже наш! Ты, по неисповедимым судьбам Твоим, овому посылаеши Ангела смерти под кровом его, овому на селе, овому на мори, овомуже на поле брани от оружий бранных, изрыгающих страшныя и смертоносныя силы, разрушающия телеса, расторгающия члены и сокрушающия кости ратующих; веруем, яко по Твоему, Господи, премудрому смотрению, такову приемлют смерть защитники веры и Отечества.

Молим Тя, Преблагий Господи, помяни во Царствии Твоем православных воинов, на брани убиенных, и приими их в небесный чертог Твой, яко мучеников изъязвленных, обагренных своею кровию, яко пострадавших за Святую Церковь Твою и за Отечество, еже благословил еси, яко достояние Твое. Молим Тя, приими убо отшедших к Тебе воинов в сонмы воев Небесных Сил, приими их милостию Твоею, яко павших во брани за независимость земли Русския от ига неверных, яко защищавших от врагов веру православную, защищавших Отечество в тяжкие годины от иноплеменных полчищ; помяни, Господи, и всех, добрым подвигом подвизавшихся за древнехранимое Апостольское Православие, за освященную и в язык свят избранную Тобою землю Русскую, в нюже враги Креста и Православия приношаху и огнь, и меч. Приими с миром души раб Твоих (имена), воинствовавших за благоденствие наше, за мир и покой наш, и подаждь им вечное упокоение, яко спасавшим грады и веси и ограждавшим собою Отечество, и помилуй павших на брани православных воинов Твоим милосердием, прости им вся согрешения, в житии сем содеянная словом, делом, ведением и неведением. Призри благосердием Твоим, о Премилосердый Господи, на раны их, мучения, стенания и страдания, и вмени им вся сия в подвиг добрый и Тебе благоугодный; приими их милостию Твоею, зане лютыя скорби и тяготу зде прияша, в нуждех, тесноте, в трудех и бдениих быша, глад и жажду, изнурение и изнеможение претерпеша, вменяеми быша яко овцы заколения. Молим Тя, Господи, да будут раны их врачеством и елеем, возлиянным на греховныя язвы их. Призри с небесе, Боже, и виждь слезы сирых, лишившихся отцев своих, и приими умиленныя о них мольбы сынов и дщерей их; услыши молитвенныя воздыхания отцев и матерей, лишившихся чад своих; услыши, благоутробне Господи, неутешных вдовиц, лишившихся супругов своих; братий и сестер, плачущих о своих присных, – и помяни мужей, убиенных в крепости сил и во цвете лет, старцев, в силе духа и мужества; воззри на сердечныя скорби наша, виждь сетование наше и умилосердися, Преблагий, к молящимся Тебе, Господи! Ты отъял еси от нас присных наших, но не лиши нас Твоея милости: услыши молитву нашу и приими милостивно отшедших к Тебе приснопоминаемых нами рабов Твоих (имена); воззови их в чертог Твой, яко доблих воинов, положивших живот свой за веру и Отечество на полях сражений; приими их в сонмы избранных Твоих, яко послуживших Тебе верою и правдою, и упокой их во Царствии Твоем, яко мучеников, отшедших к Тебе израненными, изъязвленными и в страшных мучениях предававшими дух свой; всели во святый Твой град всех приснопоминаемых нами рабов Твоих (имена), яко воинов доблих, мужественно подвизавшихся в страшных приснопамятных нам бранех; облецы их тамо в виссон светел и чист, яко зде убеливших ризы своя в крови своей, и венцев мученических сподоби; сотвори их купно участниками в торжестве и славе победителей, ратоборствовавших под знаменем Креста Твоего с миром, плотию и диаволом; водвори их в сонме славных страстотерпцев, добропобедных мучеников, праведных и всех святых Твоих. Аминь.