Николай Маркевич - История малой россии - 3

О тоже, если ся хто за светого удает, а нас видить, вшак не есть ни чого так тайного, же бы на потом не было явного. То толко вем, жем не было початком до жадное речы, але если же все пойдут а за чым добрым и без образы сумненья и я бым не хотел на заде зостати, много бым мел з Вашим мостею, моим милостивым Паном, речей, велми пыльных и потребных мовити, але Бог то ведает, яко рахлося з. Вашим мостею увижу. А через папер таковых речей великих небезпечно отправовать; а што ми Ваша мость рачиш залецати порядок иноверцов, бы был налепшый, коли не на правом фундаменте все то засметье стоит, и школы их и друкарни и множество казнодеов, Бо если же сами суть неприятельми сына Божего и лупежцами фалы маестату его Бозького певне, и овощы тыи не суть приятны Богу, и все будованье их, яко на песку, а не намоцной опоце, которая есть Хрыстос сын Божый, Бог и человек правдывый. Бо яко то есть истинная правда, же есть человеком правдывым во всем нам подобным опрочь греха, так, кто есть истанная правда, же есть Богом правдивым, прироженым, неучыненным не з божоным, албо боством дарованным, нестворенным, але пред всими веки, з Бога отца уроженым, хто такового исповедания и веры не мает, не на камню але на песку и на се не будует, водлуг оных слов: всяка плоть сено. Также оные слова: проклят, который надею свою в человеце покладает, и другие значнейшые прокляти Боговеко, которые неба и земли не сотворили. А пророк Исия именем Божим мовит, яко Бог перший и остаточный передо мною не был Бог иный, и по мне небудет. А не докладает того, яко они мовет, то есть, таковый Бог, яко я. А на другом местцу мовит фалы моее ни кому не дам, отож если Христос не есть прирожоным Богом, и тогож существа, которого отец; а як же то правда будет, што мовит: по мне иный Бог небудет. Также и то фалы моее ни кому не дам; понеже дал ее, яко они мовет, человеку Христу, з Марии девицы нарожденному, и учинил его другим по себе Богом; а так не зазру я им того их порядку. Бо где бы ся еще тая трутизна тым медом не осолодала, певне бы ото тые убогие мухи на ней не лнули. Але иж ся идявол звыкл в Ангела светлисти пременять, и волцы в скуру овечую оболокать. Не треба им верити. А если же то по собе берут, же зовощов их познавати кажут. Ино и то часто трафляется, же зверху бывают красный а внутр полный смроду и червей. И тож, яко сам оних не благоволю, так и Вашу мость перестерегаю лепей ся згожати, справдивыми фалцами Бога во тройце единого а ниж ли зблюзнерцами и явными неприятельми сына Божого. Лепей з Иваном Евангелистою, а ниж ли сцеринтом — Лепей з-отцы светыми, а ниж ли з Арием проклятым; лепей зо всим християнством, а ниж ли з Юлияном, апостатою, который Христа называл Нотус, а тоиж поведа, не будучи прирожоным сыном Божим, чинился тым, то для того до Вашей мости пишу жеми ся не подобают овые присмаки, которые Ваша мость у них упатруеш, и не помалу мися серце ужасает, слышаны то от Вашей мости. Але маю я надею вмилосердью Божом иж он сам, яко почал так и до конца Вашу мость стеречи будеть, абысь неотразил о тот камень, не только сумненья свого, але и ноги своее, о што Пана Бога уставичне вмолитвах моих просечы. Ему же самому Вашу мость у вопеку и в оборону поручаю, а себе милостивой извыклой ласце Вашей мости оферую. Дан з Володымера, 25 дня Марта року 1595

Освецоное Княжа Пане а пане мой милостивый, службы мое на нижшые и молитвы уставичные убогие чернецкие ласце вашей Княжацькой милости покорне залецам.

А ижем через так час долгий до вашей мости, своего милостивого Пана, ничого не писал, иншая причина того не есть, одно тая, и жем ничого певного у себе еще немел, хотя ж то люде тыми часы непевные новины у нас всех розсевали, яко бых мовже до Рымское веры на всем пристать, мшу служить и опреснока их заживати мели, што все правда ли есть, сам то Ваша мост, яко Пан мудрый и Богобойный, обачивши здальшого писанья, уважити и осудити можеш, бо если же чоловеку приватному, который немаючи в пороченью своем душ людских, але только сам о своем пекучисе, и так мает се, на што розмышляти, якобы души своей ни якого ущербку не учинил, яко далеко большей тым, которые не только свое, але и иншых людей души впороченью своем от Бога мают, старатисе потреба, же бы и своего и людского сумненья не завести, ведаючи, иж и наменшое светых Пан Бог зрук наших смотрети будет, а кутому вспомневши на Христа збавителя своего, который мовил в Евангелии своем, што запожиток чоловеку, хотя бы и увесь свет собе позыскал, а еслиже души своей який ущербок учинит, и якую отмену даст за душу свою, то теды все ныньшне, местцатым подобные, вписме светом маючи пред очима своима, и хтож бы ся неулекнул, и хтож бы так запаметалым был, же бы для куска марное роскоши, альбо пожитку сего светнего, который яко тень мимо идет, мельбы запомнивши Бога и повинности своее хрестиянское, што такового противку сумненью чинити, чым бы и маестат Божый образивши и сумненья людские заведши, собе вечную погибель позыкати, про то не рач Ваша мость всему верити, хотя ж вем иж не маю новин непевных до ушью Вашей мости благочестивых о некоторых знас донесет, яко бых мо што противного вере и церкве нашой становити мели, а хотя еще ничого не сталося, не только лихого чого Боже уховай, але и доброго, а то ли есьмо так нещастливи, же нас за отщепенцы и за геретики люде удают, и ни якого старания и обмышляляванья о церкви Божой и о покою ее чинити не допущают зезды наши и иншые справы, церкви Божой потребные, за подзорные мают, а то надивнейшая, иж всим геретиком, якоеж кольвек секты вольно зеждчатися, порядок в соборищах своих становити, наконец не только противко веры и релией Христианских але и противно маестатови Божому, и превечной хвале одинеродного сына Божого, писма заразливше, выдавать, людей христианских от старожытное веры и от хвалы Божое на свое проклятые ереси наворочать, не маючи ни якое порадное зверхности церковное, а наш ркомо то горким Епископом, которые сукцесию свою почитавши от Христа самого, найвысшого пастыра, и его апостолов его светых порядную, и не разорваную маем, не мает быти вольно о порядку Церкви Божои, о покою ее промышлять и радить, яко бы мо не только сами тепер во в покою могли запомочью Божею церкви свое и веру православную вцале задержать, але и потомком нашим што доброго на прышлые часы справити, азвлаща маючи еще Благочестивых Господарей и Панов потроше веры нашое; тут втом Панстве его Королевское милости Господара нашого, межи которыми ваш Княжацкую милость на преднейшее светило релии нашое, без всякого похлебства признавати мусим а так, гдебыс Ваша мость, яко Пан и оборонца наш милостивый, мел нам до всего доброго допомогати, и побудкою до всего быть, тут, яко нас слухи доходят, немилостиве и не ласкове нас слуг и Богомольцов своих вспоминати рачиш, ачь не див за такими непевными новинами такого мниманя о нас быти, але кгды Ваша мость, отложивши на сторону гнев свой, пильне втую справу угленуты будеш рачыл, так разумею о благочестию Вашей милости, же нам и сам до того ласкаве допоможеш для хвалы имени Божого, и для задержанья втых злых и не безпечных часех веры и Релии нашой, ту теж и для славы своее несмертельное, прикладом оных светобливых предков своих, которые в тых панствах Фундаторми тое светое Релии Церкви светое Восточное были. А так я, слуга и Богомолец Вашей Княжецкое милости, паметаючи на ласку Вашей милости, и на то, жем з воли Божее, за усилованьем твоим благочестивым, на той убогой столицы Епископской усел, паметаючи теж и на повинность мою, которая та есть, абым о порядку церкви Божое промышлял и то, што се вней нарушило, изыншими братьею своею за помочью Божею о ниправу ее спильностью старал не садечисе на благий разум и довстип свой, але маю чи уста вичне пред очима своима писмо светое а видечи иж нам барзо малый ратунок од восточников наших. Так вписме, яко и внауках Церкве Божой потребно, а не див бо тиранство поганьское и неволя через так долгий век все вынищила, иж тепер чого у себе не маем, всего у противников наших позичати и доведыватися мусим, поколь теды ничого певного межи нами еще не было, Вашей милости своему милостивому Пану ознаймити не моглем, але тепер што межы собою маем, и на што згажаемсе, то Вашей мости, своему милостивому Пану на письме посылаю, при котором писме и сам рад бым был и Вашей мости, своему милостивому Пану, то ясне указал, для чого то чиним, паметаючи, теж и на упоминание Вашей мости, и не до Берестя на писме через Пана Василия, Суразского Наместника посланое, где нас, Ваша мость, напоминати рачиш, а бых мо се о згоду с — Костелом Рымским старали, и якобы без нарушения веры и релии нашое быти могла. Даи же то Пане Боже, абысь Ваша мость и теперь тоее-ж хути будучи, и нам, яко слугам и богомольцам своим, до того ласкаве допомог и по важностью зацного имени своего до тое справы старанье прыложил, о што унижене и слезне прошу, и именем Божим, яко сына церкви Божое милого и благочестивого, упоминаю, не обрушай се гневом, але спокойным, а умиленным умыслом прочитай тые артыкулы, обачиш, иж ни чого нового, але зсторони веры нашое нет, опрочь только единого календара, и тот не есть артыкул веры, але церемония такая, которую безнарушенья сумненья церков Божая одменити может. О чом всем ширшую справу и выводы, на каждую речь досконалые, дал бым кождому, хтобы того потребовал, иж мало не все вруках своих маем, только не бачым, альбо видечи розумети не хочем. Дал бы то Пан Бог, абым се звашей милостью, моим милостивым Паном, где видети мог пред одеханьем моим до Его Королевское милости, у которого не мешкаючи за росказаньем его милости, Господарским быти мушу, ведь же первей бывши в — Люблине у Трибуналу, для убогих справ своих, бо мене борздо, але добре сусиди мое мыти починают, притом прошу покорне, абы ми, Ваша мость, на тое писанье мое, если ласка Вашей милости будет, отписати рачил, а мене змилостивое ласки своее, яко слугу и богомольца своего, уставичного опущати не рачил и противного мниманья о мне быти не хотел. Писан у Рожанце 16 Июня року 95.