А. Андреев: Великий князь Ярослав Всеволодович Переяславский

В лето 6750 (1242). Посла князь великий Ярослав сына своего князя Андрея в Великий Новгород, в помощь сыну своему Александру на Немцы. Приидоша Немци к Новугороду, и князь Алескандр с братом своим князем Андреем и с новогородцы стретишася с ними на Ладожском озере, и бысть бой велик, и побиша князь Александр немец, а иных руками яша, а князь Андреи возвратился к отцу своему с честию великой.

Того же лета приидоша Татарове в Суздаль к князю Ярославу Всеволодовичу, взяша его к царю Батыю.

В лето 6751 (1243). Великий князь Ярослав поеха в Татаровы к Батыеви, а сына своего князя Константина посла к канови. Батый же князя Ярослава почтив дасть ему великое княжение и старейшинство над Русскими князьми и отпусти его на Русь. Того же лета прииде князь великий Ярослав ис Татар в землю свою честно и славно, и бысть радость в Русской земле велика. И много пришельцев утеши и множество людей собра. Сами прихожаху к нему в Суждальскую землю от славные реки Днепра и от всех стран Русские земли: галичане волынскии, кияне, черниговцы, переяславцы и славные киряне, торопчане, меняне, мещижане, смольняне, полочане, муромцы, рязаньцы и вси подражаху храбрости его и обевахуся ему живот свой полагати за избаву християнскую; и тако множахуся и всяким богачеством исполяхуся; и бысть необычной скорби радость велия християном и благодарствоваху Бога, преспевающе во благочестии.

В лето 6753 (1245). Великий князь Ярослав с бра-тиею своею и своими сыновцы покы поиде в Татары к Батыю царю.

И того ради Богом подражательный самодержец храбрый душею и телом великий князь Ярослав второе прииде во Орду к беззаконному царю Батыю с ним же и братия его и сыновцы. Пришед же не устыдеся царския его темные власти, ни ужасеся бесстудные его ярости, добре подвизаяся о истинно глаголати за люди Божия земли, обличая поганых безумное веление. Его же ради Батый посла его к кановичем. И тамо инем образом инеми завистными винами оклеветан бысть от некоего Феодора Яруновича, тако именуема, и сице, его же не начаяшеся страдати, и сия доблествено со благодарением претерпе от безбожных татар, и многу истому восприят за всю братию свою, и за множество христоименитого достояния, иже в Рустей земли. И таковым своим страданием доблий подвижник сотвори многу и благу пользу и велику помощь и ослабу християнству от тягости и от злого насильства татарского.

В лето 6754 (1246). Тое же осени преставися князь великий Ярослав, сын Всеволода, в Татарах, на пути идучи от канович септемвриа 30 день.

Князь великий Ярослав тогда бе у Канович, обижен Феодором Руновичем, и много пострада от безбожных Татар за землю Русскую, и много истомление подъят, и отпустиша его уже изнемогша, и пошед от Канович, преставися нужною смертью в иноплеменницех, месяца септебря в 30 день, на память святого великого Григория Великиа Армениа.

«Что убо сего больши» ~ яко же Святое Писание глаголет, «еже положити душу свою за други своя?» И тако сии приснопамятный великий князь Ярослав в дальней земли, в Канове Орде положи душу свою за святые домы церковные и за веру християнскую и за все люди земли Русския. И сего ради причте его Бог ко избранному своему стаду проведных селения.

В лето 6755 (1247). Слыша князь великий Александр Ярославич отца своего смерть, прииде из Нова-города в Володимер. Того же лета седе на великое княжение Святослав Всеволодович.

Русские летописи.

Лета 6698 (1191) февраля 2 родился Всеволоду, великому князю, пятый сын и наречен Ярослав, а в крещении Феодор.

Лета 6701 (1194) князь великий Всеволод учинил подстриги сыну Ярославу, для которого созваны были князи, також от клира и вельможи многие, и веселилися довольно.

Лета 6709 (1201) Всеволод, как примирился с сватом своим Рюриком и, взяв от него Переяславль Русский, поадил в нем перво сына Константина, но он хотя жену имел, но более наукам прилежал и, не терпя многих беспокойств, просил отца, чтоб его пременил. И зане Юрий, другий сын, тогда был болен, а Ярослав младости ради не мог править, послал Всеволод сыновца своего Ярослава Мстиславича. И той, недолго быв, скончався. Того ради Всеволод послал сына Ярослава в Переяславль и с ним лучших дву воевод. Сам тогда Всеволод был в Переяславле (Залесском — А.А.) и отдал чына своего переяславцам августа 3 дня от церкви святого Спаса пред образом с тяжкою ротою, како его хранить. Они же, приняв с радостью, поехали. И проводили его брат Костянтин и Юрий.