Александр Андреев - Иван III

«13 апреля – 16 мая 1389 года.

Духовная грамота Великого князя Димитрия Иоанновича:

о разделе, по смерти его, всего движимого и недвижимого имения сынам своим князю Василию, князю Юрию, князю Андрею, князю Петру, князю Ивану и княгине своей Евдокие Дмитриевне.

Во имя Отца и Сына и Святого Духа, се яз, грешныи худыи раб божий Дмитрии Иванович, пишю грамоту душевную целым своим умом. Даю ряд сыном своим и своеи княгини.

Приказываю дети свои своеи княгине. А вы, дети мои живите заодин, а матери своее слушаите во всем.

А приказываю отчину свою Москву детем своим, князю Василью, князю Юрью, князю Андрею, князю Петру. А брат мои, князь Володимер, ведает свою треть, чем его благословил отец его, князь Андреи. А сына своего, князя Василья, благословляю на стареишии путь в городе и в станех моего удела двою жеребьев половина, а трем сыном моим половина, и в пошлинах и в городских половина. А тамга из двою моих жеребьев княгине моеи половина, а сыном моим половина. А восмьничее мои два жеребья княгине моеи. А на старешии путь сыну моему, князю Василью, Васильцево сто и Добрятинская борть с селом с Добрятинским. А бортници в станех в городских, и конюшии путь, и соколничии, и ловчии, тем сынове мои поделятся ровно. А численых людии моих двою жеребьев сыном моим по частем, а блюдут с одиного.

А се даю сыну своему, князю Василью, Коломну со всеми волостми, и с тамгою, и с мыты, и сбортью, и с селы, и со всеми пошлинами. А волости коломеньские: Мещерка, Раменка, Песочна, Брашева с селцем с Гвоздною и с Иванем, Гжеля, деревни Левичин, Скулнев, Маковец, Канев, Кочема, Комарев с берегом, Городна, Похряне, Усть-Мерско. А из московских сел даю сыну своему, князю Василью: Митин починок, Малаховское, Константиновское, Жырошкины деревни, Островское, Орининское, Копотенское, Хвостовское, у города луг Великии за рекою. А из Юрьевских сел даю сыну своему, князю Василью: своего прикупа Красное село с Елизаровским, с Проватовым, да село Василевское в Ростове.

А се даю сыну своему, князю Юрью, Звенигород со всеми волостми, и с тамгою, и с мыты, и с бортью, и с селы, и со всеми пошлинами. А волости Звенигодское: Скирменово с Белми, Тростна, Негуча, Сурожык, Замошская слобода, Юрьева слобода, Руза городок, Ростовци, Кремична, Фоминское, Угожь, Суходол с Ыстею, с Истервою, Вышегород, Плеснь, Дмитриева слободка. А из Московских сел даю сыну своему, князю Юрью: село Михалевское, да Домантовское, да луг Ходынскии. А из Юрьевских сел ему: прикупа моего село Кузмыдемьянское, да Красного села починок за Везкою придал есмь к Кузмыдемьянскому, да село Богородицкое в Ростове.

А се даю сыну своему, князю Андрею, Можаеск со всеми волостми, и с тамгою, и с мыты, и с бортью, и с селы, и со всеми пошлинами, и с отъездными волостми. А волости Можаиские, Исмея, Числов, Боянь, Берестов, Поротва, Колоча, Тушков, Вышнее, Глинское, Пневичи с Загорьем, Болонеск. А Коржан да Моишин холм придал есмь к Можаиску. А се волости отъездные: Верея, Рудь, Гордошевичи, Гремичи, Заберега, Сушов, да село Репинское, да Ивановское Васильевича в Гремичах. А Колуга и Роща сыну же моему, князю Андрею. И что вытягал боярин мой Федор Андреевич на обчем рете Тов и Медынь у смолнян, а то сыну же моему, князю Андрею. А из московских сел ему: Напрудское село да Луцинское на Яузе с мелницею, Деунинское, Хвостовское в Перемышле, да луг Боровский, а другии противу Воскресенья. А из Юрьевских сел ему Олексинское село на Пекше.

А се даю сыну своему, князю Петру, Дмитров со всеми волостми, и с селы, и со всеми пошлинами, и с тамгою, и с мыты, и с бортью. А се дмитровские волости: Вышегород, Берендеева слобода, Лутосна с отъездцем, Инобаш. А из московскии волостии князю Петру: Мушкова гора, Ижво, Раменка, слободка княжа Иванова, Вори, Корзенево, Рогожь, Загарье, Вохна, Селна, Гуслеца, Шерна городок. А из московских сел князю Петру: Новое село, Сулишин погост. А из юрьевских сел ему прикупа моего село Богородское на Богоне.

А се даю сыну своему, князю Ивану: Раменеице с бортники и что к нему потягло, да Зверковское село с Сохонским починком, что отошло от князя от Володимера. А Сохна сыну же моему, князю Ивану. А в том уделе волен сын мои, князь Иван, которыи брат до него будет добр, тому даст.

А се благословляю сына своего, князя Василья, своею отчиною, великим княженьем.

А сына своего благословляю, князя Юрья, своего деда куплею, Галичем, со всеми волостми, и с селы, и со всеми пошлинами, и с теми селы, которые тягли к Костроме, Микульское и Борисовское.